Óveður og kvef

Við Vala hlupum einusinni eftir að ég kom heim frá Florida. Við hlupum með jólasveinahúfur mánudaginn 9.des en þá neitaði úrið mitt að sýna tímann... kannski hafði ég gleymt að hlaða það.

12,5 km Hrafnistuhringur á ca 1:30:00 í snjó, hálku og ófærð. við vorum á broddunum okkar og skemmtum okkur vel.

mánudaginn 16.des ætluðum við að hlaupa aftur en Vala varð að afboða og ég var að fyllast af kvefi svo ég sleppti því að fara út.

Space Coast Marathon 1.12.2013 Cocoa Village Florida

Space Coast Marathon & Half Marathon Cocoa, FL USA
http://www.spacecoastmarathon.com

Ég svaf ágætlega, klukkan hringdi kl 4 am. Ég hafði áætlað mjög stuttan tíma til að undirbúa mig, því ég ætlaði að taka rútuna frá Best Western hér við hliðina kl 5.

Ég teypaði tærnar, fékk kaffi og morgunverðarpoka í lobby-inu og borðaði þegar ég kom yfir á startið. Það var bara snilld að losna við að finna bílastæði því það var allt mjög þröngt í kringum marksvæðið í gær þegar við fórum þangað að kanna aðstæður. 

Veðrið var ágætt, skýjað og svali frá hafinu. Maraþonið var ræst kl 6:30 og hlaupið fram-og-til-baka meðfram ströndinni, fyrst norður en síðan í suður. Seinni lúppan var miklu skemmtilegri.

Ég hengdi mig á Galloway pacer 5:45 sem var skynsamlegt þar sem ég hef ekki æft neitt.
Ég missti síðan af þeim þegar ég fór á klósettið í annað sinn.

Fyrri hluta leiðarinnar drakk ég ekki nóg, fannst ég ekki þurfa þess í svalanum en það var ekki skynsamlegt hjá mér því ég varð allt í einu svo þyrst að ég þambaði heilu glösin.

Berghildur og Edda komu á marksvæðið kl 9:30 með rútu sem var að skila hlaupurum aftur á Cocoa Beach og þær biðu eftir mér þar sem ég kom inn á marksvæðið, urðu svo að hlaupa að markinu til að ná markmynd og þar fengu þær bæði pening og handklæði fyrir  

Þetta maraþon er nr. 168
Garmin mældi vegalengdina 26,35 mílur og tímann 6:07:?? 
Ég er mjög sátt við þetta allt og gaman að hafa systurnar með 

Gögnin sótt í Kennedy Space Center Canaveral

Við keyrðum frá Orlando fyrr um daginn en það voru síðan 20 mílur frá hótelinu á Cocoa Beach að Kennedy Space Center á Canaveral höfða. Við vorum mjög heppnar með bílastæði... því himinn lak öðru hverju.

Ég er með keppnisnúmerið 4567 flott númer. Það er virkileg upplifun að skoða stöðina og flottir verðlaunapeningarnir sem verða næstu 5 ár. 

Við tókum helling af myndum og drifum okkur svo aftur á hótelið, keyptum morgunmat og fengum okkur kvöldmat.

Nú er bara að reyna að fara snemma að sofa :P 

Öðruvísi dagar

Ég hef lítið hlaupið síðan ég kom heim úr síðustu ferð, 15.okt . Sama dag og ég kom heim hné pabbi minn niður og var dáinn fyrir hádegi daginn eftir. Blessuð sé minning hans.

Þessi mánuður síðan hefur verið mjög óraunverulegur og annasamur. Þrátt fyrir það hefur mér tekist að hlaupa nokkrum sinnum.

21.okt hljóp ég með Völu, Hrafnistuhringur 12,5 km

23.okt hljóp ég upp Krísuvíkurveginn 12,0 km

28.okt hljóp ég aftur með Völu, Hrafnistuhring 12,5 km

8.nóv hljóp ég ein upp Krísuvíkurveginn, 12,2 km

15.nóv var ég enn ein á Krísuvíkurveginum, 12 km  

United Healthcare Marathon, Newport, RI USA 13.10.2013

United Healthcare Breakers Marathon,
Newport, RI USA
http://www.uhcmarathon.com 

ÉG ætlaði að sofa á mínu græna og sleppa þessu maraþoni... EN ég glaðvaknaði kl 4:30 í nótt. Fór upp í aftur og reyndi að sofna... sagði NEI, NEI ég ætla ekki... en mér leið ágætlega, svo ég byrjaði að klæða mig, tautandi "ég trúi því ekki að ég ætli að fara"

Í stuttu máli sagt... var ég með fyrstu mönnum á staðinn þar sem heila maraþonið átti að leggja bílunum og fara í rútu. Ég átti nefnilega eftir að sækja númerið mitt.

Ég var alltof snemma í því en gat sest niður í 1 klst. Fljótlega dreif að fólk og ég fór að heyra sögurnar frá Hartford og aðal spurningin var: fékkst þú verðlaunapening ?... og fljótlega var fundið út að verðlauna peningarnir höfðu klárast löngu áður en 4 tímar voru liðnir.

Ég missti af hópmyndatökunni í gær en náði henni í dag... heppin, því ég er ekki með ljósmyndarann minn með mér í þetta sinn. Maraþonið var ræst kl 8 á Easton´s Beach.

Fyrri helmingur hlaupsins var mjög fallegur og hér eiga víst að vera stærstu hallir í Ameríku...síðan hlupum við í gegnum markið og seinni helmingurinn var "út í sveit" sem sagt - ekki eins skemmtilegir fram-og-til-baka leggir. Þann hluta hljóp ég með Melanie sem hljóp líka í Hartford í gær. Við hlupum eftir 1-1 kerfi (Galloway) 
http://beta.active.com/running/articles/run-walk-run-to-faster-times-faster-recovery

Ég reyndi að hlaupa rólega og afslappað... og maginn var til friðs alla leiðina. Þökk sé Guði :)

Þetta maraþon er nr 167, garmurinn mældi það 42,84 km og tímann 6:27:51 

ING Hartford Marathon CT, 12.10.2013

ING Hartford Marathon Hartford, CT USA
http://www.inghartfordmarathon.com

Klukkan var stillt á 5:00 vegna þess að það voru bara 10 mín. á startið. En ég svaf eiginlega ekkert um nóttina þó ég færi snemma uppí. Ég var með magakveisu og sat á klósettinu mest alla nóttina. Þegar klukkan hringdi var maginn galtómur... Nú voru góð ráð dýr því það er mjög erfitt að ætla maraþon svona í maganum. En ég seldi mér þá hugmynd að komast einhvernveginn í gegnum það.

Ég tékkaði mig út og fór að stað fyrir 7 og fékk stæði á ágætis stað. Hefði kannski átt að hugsa betur um staðsetninguna gagnvart markinu en ekki startinu þá hefði ég verið fljótari og farið styttri leið að bílnum eftir hlaupið.

Hlaupið var ræst kl 8 og í upphafi var kalt. Það hitnaði fljótlega og sólin skein allan tímann. Ég passaði mig að smitast ekki að þeim sem voru hraðari og tókst að halda maganum góðum fyrstu 7-8 mílurnar. Þá byrjaði ballið - það er að eftir það átti ég stefnumót við klósettin á leiðinni og varð að ganga.

það þýddi ekkert að reyna að hlaupa - og stundum varð ég að hæga á göngunni.  Ég ætlaði ekki að lenda í þrumu-skoti á leiðinni og ég ætlaði að klára. Þetta var orðið skelfilega erfitt í lokin og ekki gerlegt að fara annað á morgun.

Þegar ég kom í markið - og ekki síðust... voru verðlaunapeningarnir búnir, svo ég fæ minn sendan í pósti... ég fór strax að bílnum og keyrði til Rhode Island þar sem ég á pantað næsta hótel og maraþon. Alla leiðina gældi ég við að sækja gögnin til vonar og vara og sjá til hvort ég kæmist á morgun... EN ÞAÐ ER BARA BULL að ætla það... Það er ákveðið - ég sleppi því.

Ing Hartford maraþon er nr 166 og 26. fylkið í hring nr tvö
Garmurinn mældi vegalengdina 42,86 km og tímann 6:51:??

Gögnin sótt í Hartford CT

Ég var frekar sein í Exp-ið því ég var í "shopping-stuði" náði næstum að klára listann minn....
Á leiðinni niður stigann í expo-ið mætti ég Steve Boone í stiganum og hann beið eftir mér á meðan ég hentist inn að sækja númerið og bolinn og ég fór út aftur til að vera samferða honum á REUNION hjá 50 States Marathon Club.

Það kom mér á óvart að hann og Paula kölluðu mig fram... það er hefð að mynda þá sem hafa "Finished the States" næst þegar þeir mæta á reunion. Þetta er í fyrsta sinn sem ég mæti. Ég þekkti helling af fólki og ég varð að vera með smá ræðu og tala eitthvað á íslensku :)  

Vona að haustið verði fallegt :)

Dagurinn í dag var virkilega fallegur þó ég hafi ekki notað hann til að hlaupa. Frá síðasta maraþoni hef ég aðeins farið á stjá... 

26.sept... Við Vala hjóluðum upp í Kaldársel og til baka, 18,6 km

31.sept... Hrafnistuhringur í góðum gír með Völu 12,5 km

2.okt... hljóp ég ein upp Krísuvíkurveginn 12,5 km... Veðrið var fallegt og þetta var mjög gott hlaup í rólegheitum og íhugun :)

5.okt... dreif ég mig út og hljóp Ástjarnarhringinn, hafði varla tíma fyrir meira í dag. Veðrið var gott og ég naut hverrar mínútu þó hringurinn væri stuttur... 5,1 km 

Center of The Nation #5 NE 20.9.2013

http://mainlymarathons.com/center_series 

Síðasta maraþonið í þessari seríu. Öll hlaupin hafa verið nálægt litlum bæjum þar sem var aðeins lámarks þjónusta. Við vorum í menningu og verslunum í gær í Rapit City og nutum okkar :) en hér í Chadron er fátt um fína drætti.

Ég og önnur kona gátum grátið út í gær að fá morgunmatinn kl 5 í morgun og þess vegna var klukkan stillt á 4:30.  
Ég svaf ágætlega eftir búðar-maraþonið í gær. Tærnar voru teipaðar og reynt að búa um blöðruna á hælnum. Morgunmaturinn var fjörlegur, maður fékk að heyra hverjir slepptu gærdeginum og hverjir hættu í miðju hlaupi.

Hlaupið var ræst kl 6:30 eins og öll hin... nú í Chadron State Park. Við höfum hlaupið fram og til baka til þessa en nú fengum við hring (12 hringi)... hluti leiðarinnar var trail en svo komu 4 brekkur :/

Þegar hlaupið var ræst skakk-lappaðist liðið af stað, margir sárir en nokkrir ferskir því það var hægt að skrá sig á staðnum. Það var kalt í upphafi um 2°c en fljótlega hlýnaði og hitinn fór í 25°c

Ég hafði voðalega litla lyst, borðaði vatnsmelónur á drykkjarstöðinni og tók með mér snakk til að fá salt... svo drakk ég kók og bruddi klaka. Við gengum mörg saman og sumir fóru öfugan hring til að mæta fólki. Ég sá einhverja heltast úr og hélt um tíma að ég fengi "The Caboose" sem er síðasti lestarvagninn, en það var einhver á eftir mér. Lúlli lauk þessu síðasta maraþoni með mér. 

Þetta maraþon var nr 165
Garmin mældi tímann rúma 8 tíma og vegalengdina 42,66 km

 

Center of The Nation #3 WY 18.9.2013

http://mainlymarathons.com/center_series 

Mér fannst ég sofa lítið betur í nótt en síðustu nótt... var amk alltaf að hrökkva upp, við þrumur og eldingar, beljandi regn, umferð úti eða á ganginum inni. Klukkan var stillt á 4:10 og við vorum komin á sjá áður.

Það átti að vera erfiðast að finna þetta start svo Lúlli fékk hnitin sett inn í Garmin. Ég var svo þreytt og líka með blöðru á hælnum, svo ég ákvað fyrirfram að ganga allt maraþonið.

Við keyrðum yfir í Wyoming og þar var hlaupið eftir malavegi... 12 leggir eins og áður. Fyrstu 2 leggirnir voru farnir í frekar köldu veðri, síðan fór hitinn upp í 30°c, næstsíðasta legginn hrönnuðust upp ský og komu nokkrir dropar og síðasta legginn var svo mikið skýfall, kalt og hart að ég hélt fyrst að þetta væri hagl. Á augabragði varð ég holdvot og skítkalt frá toppi til táar. 

Þegar ég kom í markið var ég gjörsamlega búin að fá nóg. Síðustu leggina hafði ég ekki haft lyst á neinu sem var í boði á drykkjarstöðinni - auðvitað gengur það ekki. Svo var ég alveg búin að gleyma að það er allt annað að vera í svona mikilli lofthæð 3 maraþon í röð.

Þetta maraþon var þriðja í röðinni af 5 í Center of The Nation seríunni og ég er skráð í öll en ég ætla að hvíla á morgun, ss sleppa MT í þetta sinn og taka það með ID seinna. 

Tíminn var skelfing, nærri 9 tímar og Garmin mældi þetta 42,8 km.
Þetta maraþon er nr 164