Hlaupa annáll fyrir árið 2020

GLEÐILEGT ÁR 2021

Við óskum öllum Guðs blessunar, gæfu og góðs gengis á komandi ári 2021 um leið og við þökkum fyrir árið sem er að líða. 

Annáll þessa árs er skrifaður á Patreksfirði... og hann verður öðruvísi en allir hinir. Það verður engin verðlaunapeningamynd hér til hliðar... því ég fór ekkert erlendis og hljóp EKKI EITT EINASTA MARAÞON á þessu ári þó árið væri HLAUPÁR. Ég átti að hlaupa Texas Marathon 1.jan 2020 en hætti við það að beiðni biskups. Í lok febrúar kom Covid-19 veiran sem var erfiðari viðureignar en flestir áttu von á og flestum maraþonum og íþróttaviðburðum í heiminum var aflýst eða frestað.

Ég átti ferð til Japans í Tokyó maraþonið í mars en því var aflýst og ég gat fengið öruggt númer í mars 2021... sem er nú búið að fresta til okt 2021.
Ég var ráðin á Patró til 31.maí í ár, ég notaði tímann þegar veður batnaði og gekk á Geirseyrarmúlann, upp að Kríuvötnum og á Hafnarmúlann með góðum konum. Eins reyndum við Lúlli að skoða okkur eitthvað um, en annars hljóp ég og gekk á Patró... það er hægara sagt en gert í svona ástandi að halda sér í formi en ég reyndi að hlaupa með Völu þegar ég fór suður. 

Í júlí átti ég ferð til USA og tvö maraþon sem voru flutt til næsta árs, það var í San Fransisco og Anchorage Alaska. Lengi vel vonaði ég að Reykjavíkurmaraþon myndi verða en svo var því aflýst... 

Ekki ráðum við við neitt svona, svo næsta skerf er að fylla tímann með einhverju öðru. Við systur tókum Ratleikinn, öll 27 spjöldin, Helgafellið var kysst oft og mörgum sinnum og ég gekk Selvogsgötuna tvisvar frá Kaldárseli.

Um sumarið halaði ég niður strava. Nokkrir vinir mínir í Marathon Globetrotters ákváðu að stofna ,,virtual" hlaupahóp og hlaupa í kringum Eystrasaltið. Við ætluðum að vera 3 mán að því en vorum bara um 50 daga... ég fór síðan að ganga myndir og set inn fyrstu myndina SNOOPY hérna... Mér tókst að draga fleiri í fjölskyldunni í þetta. 

1.nóv fluttum við aftur vestur á Patró til vetursetu og ég hef reynt að fara út amk 5x í viku, helst að hlaupa 3x og ganga 2x en stundum hefur það snúist við vegna hálku.

Það er komið meira en ár síðan ég hljóp maraþon... staðan um síðustu áramót var svona og tölurnar hafa ekkert breyst.

Maraþonin eru orðin 253
að auki, Ultra-hlaup 10
búin með 28 fylki í 3ja hring um USA
maraþonlönd 27
Heimsálfur 5
4/6 Majors

GLEÐILEGT NÝTT HLAUPÁR 2021

Hreyfing í des 2020

Ég var veðurteppt fyrir sunnan í byrjun des, keyrði vestur 4.des. Veðrið hefur verið ágætt til útivistar, engin ,,óveður" en það hefur rignt rosalega mikið og verið mjög hvasst. Ég hef haldið áfram að skrifa með strava hér. Nota fótboltavöllinn WEMBLEY til þess... náði að klára ,,trú von og kærleik" þegar ég gerði hjartað... en annars hef ég reynt að halda því út að fara út amk 5 sinnum í viku, þrisvar til að hlaupa og tvisvar til að ganga. stundum hefur það snúist við vegna veðurs. 

 5.des... 5,2 km ganga
 7.des... 5,3 km ganga
 8.des... 10,3 km hlaup en það var algjört skautasvell úti
 9.des... 5,1 km ganga, gerði hjarta á Wembley  
10.des... 5 km ganga,
11.des... 10,2 km hlaup
14.des... 10 km hlaup í brjáluðu roki
15.des... 6 km ganga, gerði jólatré í brjáluðu roki
16.des... 6,3 km ganga í roki
17.des... 10,1 km hlaup og sama rokið
20.des... 6 km ganga
21.des... 10 km hlaup í nístingskulda
22.des... 10 km ganga á Wemley, skrifaði gleðileg jól
27.des... 5,3 km ganga
28.des... 10,2 km hlaup í miklum kulda
29.des... 4 km í glerhálku, skrifaði 2020

Hreyfing í nóv 2020

Já, 1.nóv keyrði ég vestur á Patreksfjörð og verð prestur þar til loka maí... þar hleyp ég í allt annari færð og umhverfi en í Hafnarfirði. Ég er enn að taka þátt í hlaupahópum gegnum Strava... ég setti mér takmark að ganga og hlaupa 200 km í nóv og ég náði því.

 3.nóv... 10 km ganga á Patró
 4.nóv... 5,5 km ganga í roki og rigningu
 5.nóv... 10,2 km skokk eftir vegi 62, brjálað veður og datt illa.
 6.nóv... 6,1 km ganga
 7.nóv... 10 km skokk, er að ná mér eftir fallið.
 8.nóv... stuttur göngutúr, viðraði kallinn.
 9.nóv... 10,3 km skokk 
10.nóv... 10,1 km ganga
12.nóv... 10,2 km skokk
13.nóv... 7 km ganga
14.nóv... 10 km skokk í snjó
15.nóv... 10,5 km ganga
17.nóv... 10 km skokk
18.nóv... 10,2 km ganga... gerði STJÖRNU á Wembley
19.nóv... 10,15 km skokk í nístandi kulda
20.nóv... 10,35 km ganga... gerði KROSS á Wembley
21.nóv... 10,1 km skokk
22.nóv... 1 km ganga
23.nóv... 10,23 km skokk, snjór og mikill kuldi
24.nóv... 10 km ganga á Wembley, bjó til AKKERI.
27.nóv... 8,2 km hljóp m/Völu með strandlengjunni í HF
29.nóv... 10,2 km Hrafnistuhringur m/Völu
30.nóv... 10 km ganga í hálku, að Hvaleyrarvatni