Center of The Nation #2, SD 17.9.2013

http://mainlymarathons.com/center_series 

ÞETTA MARAÞON VAR ERFITT.

Startið var í garði við þessa götu. Það var óþarfi að vakna "eld"-snemma. Klukkan var því stillt á 4:30... en mér varð ekki svefnsamt, ég held ég hafi örugglega gleymt mér öðru hverju en mér fannst ég ekki sofa neitt.

Við vorum mætt á startið á réttum tíma. Á þessum bletti er nákvæmlega miðpunktur Ameríku, og sjálfsögðu tókum við myndir af okkur á þeim bletti og þær fara á facebook.

Eins og í gær voru 12 leggir fyrir heilt og 6 fyrir hálft. Það var ekki jafn auðvelt og í gær og margar ástæður fyrir því. Stærsta ástæðan var hitinn. Fljótlega hitnaði verulega og eftir 2 tíma var götuhitinn kominn í 35°c og síðan 37°c þegar ég kláraði.

Eftir tvo tímana voru það aðeins þeir hörðustu sem hlupu eitthvað að ráði - hinir voru farnir að ganga meira en skokka. Við vorum á steinsteyptri stétt allan tímann og hún var frekar mjó fyrir þennan fjölda.

Ég hef sjaldan verið eins fegin að klára hlaup, var komin með stóra blöðru á hælinn og svakalega þreytt í bakinu af því að ganga svona mikið.

Tíminn er ekki glæsilegur... yfir 7 klst og ég var ekki síðust.
Garmin mældi leiðina 42,7 km... of langt eins og í gær.
Þetta maraþon er nr 163 

Center of The Nation # 1... ND, 16.9.2013

Við fórum snemma að sofa enda þreytt eftir langar keyrslur. Klukkan var stillt á 4:00. Við borðuðum og dunduðum okkur hin rólegustu því ég hélt að startið væri "rétt hjá" golfvellinum...
Þess vegna lögðum við alltof seint af stað. Þegar enginn var þar og Lúlli var sannfærður um að við ættum ekki að keyra suður eftir þessum ófærum - þá snérum við við og náðum í leiðbeiningarnar.

Mikið rétt - það var 21 míla á startið - en það er auðvitað "rétt hjá" í Ameríku. Ég var viss um að ég myndi missa af startinu, enda orðin allt of sein - en hópurinn var að fara af stað þegar við lögðum bílnum. 

Leggurinn sem við áttum að hlaupa var rúm míla að lengd, rúmar 2 fram og til baka - 12 ferðir. Í hvert sinn sem ég kom á startið fékk ég teygju um úlnliðinn.
Tímataka var ónákvæm - engar mottur.
Vegurinn var frekar grófur með einni frekar langri brekku og ég bjóst við að verða leið en það var ekki því við vorum svo mörg að enginn var einn á ferð.

Það var skítkalt í upphafi og vindur - loksins var ég ekki of mikið klædd... en síðan hitnaði, held að hitinn hafi farið í 30°c en með sólinni hvessti enn meira svo hitinn fannst varla.

Ég er sátt við minn tíma sem Garmin mældi slétta 6 tíma og vegalengdina 42,8 km
Þetta maraþon er nr 162 

Eftir maraþonið keyrðum við 120 mílur suður til Belle Fourche SD, þar sem hlaup nr 2 verður kl 6:30 í fyrramálið. 

Gögnin sótt í Bowman N-Dakota

Við lentum í Denver síðasta föstudag (13.9) og vegna hörmungarflóða sem ollu neyðarástandi fyrir norðan Denver, vorum við teppt fyrsta kvöldið í Denver og við vorum óviss um hvort ferðin væri ónýt hjá okkur... EN við vorum blessuð og komumst krókaleið framhjá flóðasvæðinu og keyrðum um 600 mílur til Bowman.

Fyrst keyrðum við í gegnum Wyoming til S-Dakota og og þaðan norður til N-Dakota. 

Hér er ekkert um að vera... engin veitingahús opin, búðir eða neitt. Lúlli borðaði afganginn af kjúklingnum en ég fékk mér SUBWAY, það var eina sem var hér.

Við sóttum gögnin, ég hef númerið 27 í öllum hlaupunum. Ég fékk glæsilegan start-pening sem ég hengi síðan hvern nýjan pening neðan í... og þeir eru sko ekkert slor.

Við gistum á Áttu, og þau ætla að hafa morgunmatinn til kl 4:30 svo við fáum að borða áður en við förum.
Maraþonið verður ræst kl 6:30 á morgun (mánudag 16.9).

Á leið til Denver CO

4.sept hljóp ég 12 km í ágætis veðri. Hljóp frekar seint að deginum, var ein og eitthvað svo þreytt. Ætlaði að hlaupa þrisvar þessa viku en það varð ekki af því, ég fór í Vatnaskóg á fimmtudeginum með fermingarbörnum sóknarinnar og kom heim um 3 á laugardag. Veðrið var síðan að smá versna þar til það var geðveik rigning og hífandi rok.

9.sept hlupum við Vala Hrafnistuhringinn okkar í ágætis veðri. Það er að koma haust... eða er ekki búið að vera haust í nokkra mánuði ;)

11.sept hljóp ég 6 km upp Krísuvíkurveginn og til baka, samtals 12 km. Það var rok og rigning... maður verður eiginlega að taka það fram ef það er gott veður - þá er það nefnilega undantekning. 

Á morgun fljúgum við til Denver og keyrum til WY... spennandi tími framundan :)

Komin aftur á götuna ;)

Ég hef sjaldan verið eins eftir mig og nú eftir Reykjavíkurmaraþon. Fyrir nokkru var ég að grafa í hlaupaskó-hrúgunni minni og fann innanfótarstyrkta létta skó og hljóp í þeim fram að Reykjavík...

Ég vissi að þeir væru of þunnbotna til að ég kæmist Ó-sárfætt í þeim gegnum maraþonið og valdi því að skó sem ég hleyp maraþonin venjulega í þ.e. utanvega NIKE. Þyngdin á skónum hafði áhrif á lærvöðvana, lyftuvöðvana framan á lærunum. Ég var virkilega aum daginn eftir... en það lagaðist þegar ég fór að hjóla aftur.

27. ág hjólaði ég í hífandi roki 16,7 km

30. ág hjólaði ég í hífandi roki og grenjandi rigningu 17,6 km

2.sept. byrjaði ég aftur að hlaupa, ætlaði að hitta Völu en varð að svíkja hana og hlaupa fyrr. Ég hljóp 6 km upp Krísuvíkurveginn og snéri þar við. Það var hífandi rok en ótrúlega oft á leiðinni var ég stödd á kafla, í grennd eða á stöku stað - því ég var ansi oft í beljandi rigningu... og ótrúlega fegin þegar ég kom heim aftur. 

Reykjavíkurmaraþon 23.8.2013

Við Lúlli sóttum númerið í gær og fengum okkur pasta með Lovísu, ég náði aldrei í Svavar til að tékka á honum og óska honum velgengni í hlaupinu.

Ég hitti Imke, þýska konu sem hafði fundið mig og Matthías á Youtube.com og skrifaði mér email eftir að hún komst að því að ég hlypi maraþon. Hún er ótrúleg kona, talar 6 tungumál, þar á meðal íslensku þó hún hafi aldrei búið hér.

Eftir pastað, fórum við heim og ég tók saman dótið fyrir maraþonið. Ég hafði sofið svo illa nóttina áður að ég hélt að ég myndi detta út af áður en ég hitti koddann - en það var víst bara óskhyggja... ég upplifði aðra vökunótt... og slökkti dauðþreytt á klukkunni kl. 5:40

Ég verð að muna það næst að ég vaknaði klukkutíma of snemma núna... það gerði svo sem ekkert til.
Við fórum af stað inneftir 7:15 því ég var búin að setja á Maniac-myndatöku kl. 8

Veðrið var ekki alveg í uppáhaldi... vindur og rigningarúði. Myndatakan var því innandyra, 5 Maniac-ar mættir og Imke.

Maraþonið var ræst kl 8:40
Ég fór alltof hratt af stað og var að kafna fyrstu kílómetrana en svo jafnaði ég mig. Auðvitað var ég ekki í æfingu - frekar en vanalega.
Lovísa og Svavar hlupu 10 km og Lúlli náði þeim á mynd í startinu.

Það rættist úr veðrinu öðru hverju en inn á milli komu skúrir. Lúlli hitti mig hjá 30 km keilunni og hjólaði með mér síðustu 12 km. Hann kom með Orku fyrir mig. Lovísa og Matthías biðu síðan við hringtorgið hjá Granda.

Garmin mældi maraþonið 42,64 og tímann 5:23:28
Ég get ekki annað en verið sátt við niðurstöðu dagsins en þetta maraþon er nr. 161

Hefðbundin uppfærsla

Ég færði síðast inn hreyfingu 5. ágúst. Ég ætlaði að vera duglegri en ég hef verið en hvað um það.

6. ágúst - 3,3 km ganga með Matthíasi í ratleiknum.

8. ágúst - hljóp 12,1 km í brjáluðu roki og rigningu

10. ágúst - hljóp ég 15,4 km upp Krísuvíkurveginn.

11. ágúst - hjólaði ég 18,6 km að og frá Kaldárseli og gekk á Húsfell 8,6 km.

12.ágússt - hjólaði ég 37,4 km eftir Reykjanesbrautinni.

13. ágúst - hljóp ég 12,5 km þ.e. Hrafnistuhringinn með Völu.

15. ágúst - hljóp ég 13 km, upp Krísuvíkurveginn. 

17. ágúst - hljóp ég 13 km fh og gekk 6,3 km eh með systrunum að leita að 2 spjöldum í ratleiknum.

18. ágúst - hjólaði ég 9 km

19. ágúst hjólaði ég 4,6 km til Völu og hljóp með henni 8 km. 

20. ágúst hjólaði ég 8,2 km og gekk 15,5 km í leit að 3 síðustu spjöldunum í ratleiknum. Var alls 7 klst og 18 mín í ferðinni. 

Mikið að gera hjá minni !

Síðasta færsla innihélt Selvogsgötuna... sem ég hraðspólaði í gegnum með vindinn í fangið.

24.júlí hjólaði ég upp í Kaldársel og gekk á Helgafellið
           hjól 18 km og ganga 5 km

25.júlí hjólaði ég og tók 3 spjöld í Ratleik Hafnarfjarðar
           hjól 19 km og ganga 8,2 km

26.júlí hjólaði ég upp í Vatnsskarð og fann eitt spjald.
           hjól 19,7 km og ganga 2,6 km

29.júlí hjólaði ég upp í grjótnám og tók 2 spjöld með systrunum
           hjól 21,6 km og ganga 4,3 km

30.júlí byrjaði ég aftur að hlaupa eftir tannaðgerðina mína. Við Vala hlupum kringum Ástjörnina og um Vallarhverfið. Eftir það hjólaði ég að Undirhlíðarstígnum og tók 2 spjöld með systrunum.
           hlaup 7 km, hjól 17,1 km og ganga 4,7 km

31.júlí hjólaði ég upp í Kaldársel, hitti þar Lovísu og Matthías og við fundum 2 spjöld og skoðuðum nokkra hella.
           hjól 18,4 km og ganga 6,8 km

1.ágúst fundum við Matthías 2 spjöld
          ganga 4,2 km

2.ágúst hljóp ég upp Krísuvíkurveginn, síðan hjólaði ég upp að Bláfjallaafleggjara og hitti systurnar og við fundum 1 spjald.
          hlaup 12 km, hjól 11,6 km og ganga um 4 km 

4.ágúst  hjólaði ég 13,9 km

5.ágúst hljóp ég 5 km upp Krísuvíkurveginn, hjólaði síðan að skotsvæðinu til að hitta systurnar og finna spjald nr 20
          hlaup 10 km, hjól 11 km og ganga 3,7 km

Ég hef sem sagt ekki alveg verið aðgerðalaus síðustu daga ;) 

An Update !

10.júlí hjóluðum við Vala upp í Kaldársel og gengum á Helgafellið. Þetta kom í stað hefðbundins Hrafnistuhrings. Ferðin hjá mér var 19 km hjól og 5 km ganga. 

11.júlí var ég að passa Matthías og við gengum ca 4,5 km og fundum 3 spjöld í ratleiknum.

12.júlí fór ég í beinmótunar-aðgerð yfir jöxlum í efrigómi og skrúfur... Ég er með 5 sauma-raðir í gómunum og er nauðbeygð til að taka það rólega í viku til 10 daga - má ekki hlaupa. Það verður ekki erfitt, því þetta tók á.

13.júlí gekk ég ca 4 km með Eddu og Berghildi að finna sömu spjöldin og við Matthías fundum, en þegar maður er að fara í 3ja sinn á staðina, þá þarf ekki að leita ;)

16.júlí fórum við nokkur og fundum 4 spjöld saman, ca 5 km ganga. 

17.júlí hjólaði ég rólega 10 km og fór síðan í spjaldaleit, gengum ca 3 km

19.júlí hjólaði ég í roki og rigningu upp í Vatnsskarð og náði 20,5 km

20.júlí hjólaði ég eftir Reykjanesbrautinni að brúnni við Vatnsleysuströnd og Keili og náði þá 31,7 km.

21.júlí gekk ég Selvogsgötuna í roki og rigningu. Venjulega geng ég hana héðan til Selvogs en að þessu sinni lagði ég af stað frá Selvogi og gekk að Bláfjallaafleggjara. Eini kosturinn var að hafa vindinn og rigninguna í bakið. Leiðin mældist 15 km á nýja úrið og tíminn var 3:05:05

Er sumarið á leiðinni ?

Það hefur verið í nógu að snúast, en þetta blessaða "sumar" ætlar að hlaupa mjög hratt framhjá, maður verður sennilega að reikna það út í haust hvenær það kom !!!

Síðast bloggaði ég að ég hafi hlaupið í slagveðurs-haust-veðri... 

6.júlí... hljóp ég up Krísuvíkurveginn, 12,6 km... hann hékk þurr en rokið gleymdi ekki að mæta.

9.júlí... hljóp ég upp að Hvaleyrarvatni, göngustíginn meðfram vatninu, einhverja fleiri stíga og fór Kaldárselsveginn til baka, stytti mér leið yfir Áslandið þar sem ég fékk nóg af bröttum brekkum og síðan "down-hill" heim sem gerði 13,2 km. Á þessari leið náði ég 3 spjöldum í ratleiknum.

Í dag leit út fyrir að sumarið væri að koma - vona að það sé ekki plat.