Gögnin í Little Rock AR

Ég man svo greinilega þegar ég hljóp Little Rock 2008...
Verðlaunapeningurinn var lengi vel sá stærsti sem ég hef fengið... það voru brekkur og einn maður (27 ára) dó í markinu...  (ég vonaði að leiðin væri breytt en ég sá "góðar brekkur" á hæðarkortinu)
Síðast flugum við ekki hingað heldur keyrðum frá New Orleans LA sem ég hljóp þá vikuna áður. 

Það sem stendur efst í minni er Clinton-safnið... þar var nokkuð ítarlega sagt frá Íslandsferð hans EN mér fannst vanta mynd af honum að borða pylsuna á Pylsubarnum. 

Nú er ég ein á ferð - bara skot-túr - eitt maraþon og heim aftur.  

Ég fór snemma út í morgun, fór í nokkrar búðir, sótti gögnin fyrir maraþonið og valdi mér bílastæði til að miða út í nágrenninu... Borðaði á Golden Corral og snéri aftur á hótelið... Ég þarf að taka daginn snemma á morgun 

Allt að færast til betri vegar :)

21.febr... Við Edda hittumst í Ástjarnarlauginni og syntum... þetta er frábært, við syntum hraðar en áður en sömu vegalengd, ég 300m skrið... við höfum báðar verið fullar af kvefi og þá borgar sig ekki að sýna einhverja heimsmeistaratakta 

24.febr... Það var ógeðslega kalt  og ég ógeðslega mikil skræfa  og nenni ekki að halda þessu kvefi við með því að hlaupa úti... svo ég blikkaði Völu í gegnum símann og við hlupum 60 mín á brettinu inni og tókum 3 hringi í tækjunum - BARA SNILLD að vera skræfa. Hvað mig hlakkar til þegar kuldinn og klakinn er farinn 

26.febr... ég vildi ómögulega missa úr einni viku, svo ég labbaði í Ásvallalaugina og synti mína 300 m skrið. Það er svolítið misjafnt hvort 50m lína er í boði eða ekki, en nú var hún í boði. Ég flýg á morgun til Denver og þaðan til LittleRock.

Kvef og aumingjaskapur vonandi að baki :)

Undanfarnar tæpar þrjár vikur hef ég verið að ná mér í hnénu eða síðan ég datt 29.jan... ná mér í bakinu og reyna að ná úr mér kvefinu... eitt hefur tekið við af öðru.

10.febr... ákvað ég að prófa hnéð, keypti mér kort í sundlaug Garðabæjar með aðgangi að ræktinni og mætti þar eftir ferð til kírópraktorsins. Það gekk bara vel, ég hljóp í 20 mín á hlaupabrettinu, hjólaði í 10 mín, var 5 mín í skíðavélinni, teygði og synti síðan 200 metra skriðsund. Þetta lofaði góðu 

13.febr... ákvað að taka prufuhring úti... og fannst tilvalið að fara kringum Ástjörnina... BIRR... kolvitlaust val... þegar ég kom út af malbikaða göngustígnum var "malarstígurinn" einn klakabunki... eftir að hafa skreiðst meðfram honum og vonast sífellt eftir betra, þá snéri ég við. Ég nánast skreið út á göngustíginn aftur, DATT einu sinni á leiðinni, án meiðsla... ég snéri heim og ætlaði að teygja við vegginn... Um leið og ég lagði hendurnar á vegginn fann ég að ég gat ekki sleppt honum aftur... BAKIÐ VAR FARIÐ... með herkjum komst ég inn... hvernig gat þetta skéð  ég var ekki að gera neitt !!!  4-5 km þann daginn.

14.febr... mætti hjá kíró og labbaði fín út... hitti Eddu í Ásvallalaug og við syntum, ég tók 300 m skrið.

19.febr... ég hafði fengið Völu til að skipta um dag, en svo var veðrið orðið brjálað seinnipartinn. Við æfðum þess vegna inni í Sjúkraþjálfaranum. Við byrjuðum á hlaupabrettinu í 45 mín og tókum síðan 3 hringi í tækjunum. Þetta var hreinasta snilld, ég fann hvorki til í hnénu eða bakinu  

Sund

Ég fór þrisvar til Kiróproktors í vikunni... og fann breytingu til batnaðar eftir fyrsta tímann. Tveir hryggjaliðir eru farnir að slitna... annar þeirra er efst, við hálsinn og hinn á mjaðmasvæði. Þar er ég líka með 1 auka-lið. 

Ég þarf að vinna með og gera æfingar til að fá liðleika aftur neðst í bakið - var orðin frekar stirð fyrst á morgnana... og svo þarf ég að ná mér í hnénu.

ég hljóp ekki á mánudag (3.febr) með Völu en fór með Eddu systir í sund í gær, föstudag 7.febr. Við fórum í Ásvallalaugina og syntum á 50 metra braut, 6 ferðir. ég synti 250 metra skrið og 50 metra bringu. Svo var það heiti potturinn á eftir.

þetta verður sennilega fastur punktur héðan í frá að hitta Eddu og fara í sund :) 

Datt einu sinni enn...

Við Vala fórum Hrafnistuhringinn síðasta mánudag (27.jan) og allt gekk vel... við fengum frábært veður og við vorum hæst ánægðar með hringinn okkar.

29.jan...
Í dag dreif ég mig út fljótlega eftir hádegið... og ég ákvað að hlaupa extra rólega til að geta hlaupið afslappað... ég er eitthvað svo lurkum lamin eftir þessar byltur undanfarið... Allt gekk mjög vel fyrstu 7,5 km en þá flaug ég í götuna og snéri á mér hægra hnéð... Tvær litlar stelpur kölluðu til mín og spurðu hvort ég væri í lagi eftir þetta... Í alvöru þá var ég ekki viss um að ég kæmist heim en svaraði þeim að ég væri óbrotin.

Þetta er svakalegt slag fyrir mig... ég gekk rúma 3 km heim en það er útilokað að ég hlaupi næstu 2 vikur  ég er stokkbólgin og get ekki beygt hnéð almennilega... ég verð bara að ná mér eftir þetta.

Datt tvisvar í dag

Ég er að jafna mig eftir byltuna á Krísuvíkurveginum síðasta laugardag, mesta bólgan er farin er þessar djupu rispur verða einhvern tíma að gróa.

Við Vala gátum ekki hlaupið saman á mánudaginn svo við ákváðum að vera saman í dag í staðinn. Ég var nú farin að vona að klakabunkarnir væru að mestu leyti farnir en svo var ekki... planið hér úti var autt og í bjartsýnisbrjálæði taldi ég mig ekki þurfa broddana í dag 

Það rigndi létt þegar ég fór út en ég var ekki hálfnuð til Völu þegar það var farið að snjóa... Það voru mín stóru mistök að hafa skilið broddana eftir... við Vala fórum Hrafnistuhringinn og ég datt tvisvar á leiðinni... svo nú hef ég gömlu skrámurnar á vinstra fæti, nýja á hnénu og mar á lærinu... skrámur á rassinum og er marin og aum í báðum úlnliðum.

Fall í þriðjaveldi hlýtur að boða gott framhald...

Hrafnistan tókst engu að síður vel og er enn 12,5 km  

Fall er fararheill á nýju ári :)

Mánudagur 13.jan. 2014
Við Vala eigum mánudagana saman en síðasta mánudag var ömurlegt veður, hvasst og glerhálka... svo Vala bauð mér inn í Sjúkraþjálfann. Þetta var snilld, ég skokkaði löturhægt í 40 mín á bretti og síðan tókum við törn á æfingatækjunum. Í allt vorum við tvær klukkustundir.

Laugardagur 18.jan
ég fékk síðan ekki tækifæri til að fara út aftur, fyrr en í morgun... þá var ég komin út 8:30 í niðamyrkri. Það rigndi hressilega í nótt og rigningin virkaði sem þvottur á klakabunkana, svo ég varð að hlaupa út á götu. Leiðin lá upp Krísuvíkurveginn (smá mistök)... vegurinn var að vísu nær auður en engir ljósastaurar á leiðinni.

Ég var ekki komin langt þegar ég blindaðist af bíl sem kom á móti og steig óvart út fyrir kantinn og datt í götuna. Vinsti fótur er allur skrapaður og ég er enn með verki í sárunum... fyrir utan að sárin hafa ljókkað eftir því sem líður á daginn... ég þarf varla að taka það fram að bílstjórinn hélt áfram eins og ekkert hefði gerst þó ég lægi í götunni.

New Year's Race in Hollywood 4.jan.2014

Ég man ekki lengur hvar ég frétti af þessu hlaupi en mig langaði til að hlaupa það þó það væri bara hálf-maraþon. Ég sakna stóru borgarhlaupanna... búin að vera alltof oft í einhverjum fámennum, krummaskuðs-maraþonum.

Við vorum í Santa Barbara en keyrðum suður, fyrst til Camarillo þar sem ég sótti númerið fyrir Camarillo Maraþon og síðan keyrðum við í miðborg LA til að sækja númerið fyrir Nýjárshlaupið.

Expo-ið var sæmilegt... og þetta verður nokkuð stórt hlaup. Startið er ekki langt frá en markið er ca í 2ja mílna fjarlægð.  Hótelið sem við erum á er í 14 mílna fjarlægð... og þar var SKELFILEGT bílastæðavandamál. 

Við vorum aftur mætt á staðinn kl 17 en hlaupið var ræst kl 19.
Ég hélt að kynnirinn væri að grínast þegar hann talaði um brekkur en ég held það séu ekki fleiri brekkur í LA.

Það var svolítið skrítið að hlaupa í myrkrinu, sérstaklega þegar við hlupum í dimmum hverfum. Það var skemmtilegt að hlaupa kringum DODGER STADIUM og líka hring í kringum völlinn inn á leikvanginum (Ég hef farið á Dodgers leik þarna).

Hlaupið gekk vel, ég var á nýjum NIKE skóm sem virkuðu vel. ég þurfti að stoppa einu sinni og færa ball-foot-púðann, það særði mig eitthvað milli tánna á v-fæti en annars var þetta ágætt.

Ég hljóp í fyrsta sinn með símann minn og tók fullt af myndum.

Garmurinn mældi vegalengdina 13,36 og tímann 3:07:00

............................................................................................... 

 

Allt umfangið eftir hlaupið, gangan til baka að bílnum, umferðin á leiðinni út úr miðborginni og keyrslan að hótelinu tók ótrúlegan tíma, ég var ekki komin í rúmið fyrr en rúmlega 1 am... og ákvað að það væri best að sleppa maraþoninu morguninn eftir, enda klst keyrsla til Camarillo. Ég hefði einhvertíma getað það en ekki núna, svona æfingalaus.

Frétti síðar að það hefði verið mikið sandrok á meðan hlaupið var. 

Hlaupa-annáll fyrir árið 2013

Gleðilegt nýtt HLAUPA-ÁR 

Árið 2013 hefur verið viðburðaríkt, bæði gleðilegir atburðir og sorglegir. Við misstum kæran vin okkar, Braga Freymodsson í byrjun janúar og í október dó elsku pabbi minn mjög snögglega. Þó maður viti að einhvern tíma komi að sorgardegi í lífi manns þá vonar maður alltaf að hann komi einhvern tíma seinna.
Blessuð sé minning þeirra.

Árum saman höfðum við Lúlli þann sið að fara erlendis á milli jóla og nýjárs og ég hljóp einhversstaðar á nýbyrjuðu ári... en nú gerðist í annað sinn, það sem ég hélt að myndi aldrei gerast... að vera erlendis á jólum. Í fyrra vorum við í Texas en nú erum við í Californíu hjá okkar kæru Jonnu. 

Ég byrjaði árið 2013 með því að hlaupa Texas-Marathon á nýjársdag og má segja að þá hafi línurnar verið lagðar fyrir árið...
ég er sem sagt lögð af stað í annan hring um fylki USA. Ég held ég hafi ekki hlaupið eins mörg maraþon á einu ári í eins fáum ferðum og í eins lélegu formi áður.

Ég komst í gegnum 18 maraþon í 8 ferðum... þrisvar fór ég ein... í þrem þeirra fór ég aðeins eitt maraþon í ferðinni, í tveim ferðum fór ég 4 maraþon í hvorri. Tvisvar hljóp ég 2 daga í röð og einu sinni 3 daga í röð. Ég tók þátt í tveim hlaupaseríum,
The New England Challenge og
Center of the Nation... þar sem við stóðum á Geographic Center of the Nation í S-Dakota.
Heima hljóp aðeins Reykjavíkur maraþon... Ég held það hafi aldrei gerst áður að ég hafi hvorki hlaupið vor-eða haust-maraþonið hjá FM.

Mér tókst að komast á Reunion hjá 2 klúbbum, í maí í Seattle hjá Marathon Maniacs og hjá 50 States Marathon Club í Connecticut í október.

Næst síðasta ferðin á þessu ári var SYSTRA-ferð til Florida yfir Thanksgiving... en það er algjör nýbreyttni að ég taki einhverja aðra en Bíðara nr 1 með... en í Flórida hljóp ég Space Coast Marathon og voru Berghildur og Edda svo ánægðar með ferðina að hún verður árviss og þær fara að æfa svo þær komist hálft-maraþon. 

Síðasta maraþon ársins 2013 var Operation Jack á annan í Jólum. En það maraþon er 17 maraþonið mitt í Californíu... I LOVE CALIFFORNIA.

Operation JACK Marathon 26.12.2013

Train 4 Autism Operation Jack Marathon
& Half Marathon Los Angeles, CA USA  26. des 2013
http://operationjack.org/marathon

Við gistum hjá Jonnu í Santa Barbara. Gögnin fyrir þetta litla hlaup voru afhent kl 6 am en fyrra start var kl 6:45. Klukkan var stillt á 3 am og við vorum lögð af stað rétt fyrir kl 4...
Við vorum 2 klst að keyra niður á Dockweiler State Beach, Los Angeles, CA 

Ég var nr 115 og fór auðvitað af stað í fyrra starti... ég get ekki sagt að ég hafi æft síðan í október... það kallast ekki æfingar að fara út sjaldnar en 1x í viku. 

Með alla mína maraþon reynslu gerði ég samt stór mistök... Ég hljóp í nýrri tegund af skóm. Ég hef hlaupið í nýjum skóm og ekkert mál... Um daginn keypti ég mér nýja skó, fann ekki Nike með innanfótar styrkingu og keypti því Asics... Botninn á þeim er allt of þunnur fyrir tábergssigið mitt. Ég var ekki komin 10 km þegar ég var orðin svo aum að ég var farin að skekkja mig alla til að forðast sársauka.

Við það að skekkja sig allan þá misnotar maður alla aðra vöðva og þá er ekki langt í sinadrætti. Veðrið var dásamlegt, við byrjuðum í 15°c og hlupum meðfram ströndinni, öll leiðin var á steinsteyptum strandstíg í tvöfaldri breidd fyrir hjól.

Þegar leið á hlaupið var hitinn kominn yfir 30°c og ég alveg hætt að reyna að hlaupa... þetta maraþon var mér mjög erfitt og ég hef heitið því að fara ekki svona æfingalaus í maraþon aftur.

Þegar ég átti 4 mílur eftir fór ég framhjá markinu í síðasta sinn og var þá sagt að þeir ætluðu að stoppa hlaupið vegna hita (fáar drykkjarstöðvar), svo ég fór yfir mottuna, skilaði flögunni og fékk pening... en hélt svo áfram á eigin ábyrgð til að klára maraþonið. 

Þetta maraþon, sem var hlaupið til heiðurs afmælisbarni dagsins Tinnu Sól og farið til heiðurs syninum... er nr 169
Garmin mældi vegalengdina 26,2 mílur eða 42,2 km og tímann 7:19:07