Hljóp ein...

Ég hafði verið í sambandi við Þóru Hrönn og vissi að hún hvílir fram á mánudag.
Það var smá von um að einhverjar aðrar myndu mæta og þess vegna var ég mætt tímanlega við Lækjarskóla. Engin mætti svo ég hljóp heim til Möggu til að segja henni að það væri ekki til afsökun fyrir að hlaupa ekki... veðrið var svo gott.  En hún var ekki heima...

Í dag átti að hlaupa Áslandið, en ýmsir annmarkar hefðu verið á Áslandshringnum ef ég hefði hlaupið hann ein... m.a. hefði hann getað verið styttur verulega þ.e. frá þeim stað þegar ég hefði horft heim... Svo ég ákvað að skella mér Hrafnistuhringinn einu sinni enn - ég fæ aldrei leið á honum. Með króknum heim til Möggu mældist hringurinn 12,4 km.
Framvegis ætla ég að hlaupa fyrr ef ég veit að ég verð ein, betra að hlaupa í björtu.

Næst er það þá á laugardagsmorgunn... ekkert nema gleði og gaman

Fjúkandi vinkonur í fárviðri

Við Vala hlupum á móti hvor annarri, hittumst við Haukavöllinn. Það var fárviðri, hífandi rok og rigning... ekki hundi út sigandi. Það var svo langt síðan við hlupum saman síðast, það var svo mikið að spjalla og gaman hjá okkur... að við hlupum eins og ósjálfrátt Hrafnistuhringinn. Alla leiðina börðumst við við vindinn, rigninguna og myrkrið... mér finnst svo langt síðan ég hef hlaupið í svona miklu myrkri.
Hringurinn mældist 12,2 km hjá mér og við höfum ákveðið að hlaupa þennan hring saman á þriðjudögum.

Næsta hlaup er Áslandsbrekkuhringurinn á fimmtudag... 6.nóv. vonandi hitti ég einhverjar til að hlaupa með

Hrafnistuhringur

Ég nennti ekki að bíða til kl 5:30... ef engin skyldi svo mæta við Lækjarskóla. Svo ég hljóp fyrr, ákvað að ryfja upp gamla Hrafnistuhringinn minn sem ég hljóp svo oft með Bláu könnunni.
Það var svolítið rok, rigndi öðru hverju en dimmdi ekki fyrr en undir það síðasta. Þetta var ágætis hringur, mældist 12,3 km. hjá mér.

Á morgun er ég búin að mæla mér mót við Völu. Hún er að vinna til kl 5... svo við hlaupum af stað eitthvað um 5:30 

Komin á götuna aftur :)

Jæja, það er erfiðast að komast yfir þröskuldinn heima, en mér tókst það
Ég lagði af stað rúmlega 10 í morgun, hljóp niður að gamla Lækjarskóla... en þar var auðvitað engin, ég var ekki á réttum tíma... þaðan fór ég Garðabæjarrúntinn þ.e.a.s. hringinn í kringum Garðabæ utan Arnarnesið, síðan lá leiðin eftir Álftanesveginum, framhjá Hrafnistu  og sjávarleiðina heim. Það virtist alltaf vera rok á móti.

Ég hafði gleymt að stilla úrið aftur á km. en þegar ég umbreytti úr mílunum kom í ljós að ég hafði hlaupið 19, 2 km.

Þá er að koma sér á götuna aftur!

Ég er enn í skýjunum eftir frábæra hlaupaferð... og enn á vitlausum tíma, en ég hef ákveðið að koma mér aftur á götuna á morgun. Veðrið verður kanski ekki það albesta en hvað um það 
Ég hef nú sagt það undanfarin ár, að það séu ótvíræð ellimerki hjá mér að vera farin að spá í veðrið. Hér einu sinni var farið út á vissum dögum á vissum tíma... no matter what!

En... æfingar byrja aftur á morgun

Mason City Marathon, Iowa 26.10.2008

On the Road for Education
Marathon & Half-Marathon, 10K & 5K, Mason City, IA USA. 26.okt. 2008
http://www.ontheroad4edu.org

Start at Music Man Square. 
Finish at Newman High School.

Klukkan var stillt á 5:45, enda erum við stutt frá bæði starti og marki. Veðurspáin var ekki glæsileg, spáði þurru þó það ætti að vera kalt. Þegar við keyrðum framhjá auglýsingaskilti á leið á startið, var hitinn á því 38F... þ.e. 3-4 °c.

Hlaupið var ræst kl 8 í skítakulda. Ég sem hleyp ekki með vettlinga heima, þó það sé frost... var með vettlinga mesta alla leiðina. Vindurinn var þvílíkur á móti og á hlið (Lúlli sagði, 32 metrar eða 12 vindstig) að maður átti í vandræðum með að stjórna fótunum...

Leiðin lá út í sveit, undirlagið malarvegir og margir að týna grjót úr skónum. Frá 14-19 mílu hélt ég að ég væri komin á ,,Laugaveginn" og þá brast á stórhríð... trúið þið því ??? Eftir nokkrar mílur slotaði hríðinni, en mótvindurinn var slíkur síðustu míluna að ég tommaði varla á móti veðrinu.

Þjónustan á leiðinni var í alla staði til fyrirmyndar og starfsfólkið yndislegt. Eftir hlaupið var boðið upp aðgang að sturtu, handklæði og eitthvað í gogginn.

Ég get ekki annað en verið hæstánægð, eftir allt þetta streð... 5:11:01 á mína klukku... en þeir voru ekki með flögutíma. Lúlli hafði tékkað okkur út á meðan ég hljóp og strax eftir hlaupið og sturtuna keyrðum við beint til Minneapolis.

Gögnin sótt í Mason City, Iowa

Gögnin voru afhent í Newman High School, frá 4-7 í dag, laugardag...

Ég var ekki búin að ákveða að fara í þetta hlaup, en við urðum að keyra framhjá bænum á leiðinni til Minneapolis, svo það er eiginlega ekki til afsökun að sleppa þessu hlaupi, þó ég sé búin að hlaupa í þessu fylki áður. Þetta er nokkuð stór bær, þó hann sjáist varla á korti.

Held þetta sé mjög lítið og fámennt maraþon

Wichita Marathon, Kansas 19.10.2008

Wichita Marathon & Half Marathon, Relay, Wichita, KS USA, 19. okt. 2008
http://www.wichitamarathon.org

Eins og segir í færslunni á undan, þá keyrðum við beint úr Kansas City Maraþoninu í Missouri til Wichita í Kansas (svolítið ruglandi þetta Kansas - en fyrra er borg en síðara er fylki). Þar náði ég á síðustu stundu í gögnin fyrir Wichita-maraþonið.

Klukkan var stillt á 4:10... en flautandi bíll vakti mig um miðnætti og mér tókst ekki að sofna aftur. Lúlli keyrði mig í fyrstu rútu (5:45) sem keyrði mig til  Derby þangað sem hlaupið byrjaði. Fyrra start - fyrir fólk sem er lengur en 5 og hálfan tíma, var kl 7. Við hlupum fyrst í niðamyrkri og skítakulda.

Það var merkilegt hve vöðvarnir voru tilbúnir að hlaupa... samt ákvað ég að kraftganga inn á milli. Ég hafði hlaupið í Ecco-hlaupaskónum í gær en skipti yfir í vetrartýpu Nike í dag og ég hef hlaupið með ný innlegg í síðustu 4 maraþonum. Þegar sólin fór að skína hitnaði verulega og ég klikka ekki á sólarvörninni síðan ég brann illilega í Wyoming og New Mexico.

Ég kom í mark á 6:02:46 og þakka Guði fyrir það.

Þetta er í fyrsta sinn sem ég hleyp maraþon 2 daga í röð... en í þessari ferð er ég búin að hlaupa 6 maraþon á 4 vikum. 

Næst á dagskrá er að slappa af

PS... Það duga ekki minna en 2 maraþon til heiðurs Lovísu (sem átti afmæli á föstudag) því hún er ,,eigi einsömul"

Kansas City Marathon, Missouri, 18.10.2008

Waddell & Reed Kansas City Marathon & 1/2 Marathon, Relay and 5K, Kansas City, MO USA, 18.okt. 2008
http://www.waddellandreedkcmarathon.org/

Klukkan hringdi kl 5, og við vorum komin út 6:10, borgar sig ekki að vera seint í því, þá fær maður hvergi bílastæði. Við enduðum á ágætis stað. Það var skítkalt og allir svo vel klæddir að ég hélt að ég hefði einu sinni enn klætt mig vitlaust, en svo hlýnaði. Leiðin var ágæt, mér finnst skemmtilegt að hlaupa í húsahverfum og krókóttar leiðir í stað endalausra þjóðvega...

Á mílu 7, fór ég úr skónum í fyrra skiptið, vinstri skó... til að athuga hvort ég væri tábrotin, ég rak tána nefnilega í í gærkvöldi, en í gegnum allt hlaupið plagaði mig verkur í tánni. Rétt á eftir fór ég að finna sviða og þreytu í táberginu á hægra fæti... og fór úr skónum til að athuga hvort ég væri með steina í honum.... þessi verkur var að gera mig vitlausa alla leiðina... ég fann fyrir uppgjöf á miðri leið vegna þessa. En það er gott að eiga Guð... sem er í stanslausu sambandi.

Ég get ekki annað en verið ánægð.. bara að klára hlaupið.... tíminn var 5:30:00
Lúlli, Bíðari nr 1 beið eins og venjulega við marklínuna, búinn að tékka okkur út af hótelinu og tilbúinn að keyra 200 mílur til Wichita í Kansas... þar sem við sóttum gögnin fyrir næsta maraþon. 

Gögnin sótt í Kansas City, Missouri

Gögnin eru afhent: 
Crown Center Exhibit Hall A

(connected to Hyatt Regency Crown Center, Pershing and McGee)

Fim.16.okt: 4:00-9:00 p.m.

Fös.17.okt:10:00 am-9:00pm

Hlaupið er á laugardag... ég var ekki búin að ákveða hvort ég færi í þetta hlaup og þar af leiðandi ekki búin að skrá mig. Þess vegna mætti ég fyrri daginn þ.e. í dag og skráði mig. Þetta var lítið expo en ágætt, ekkert að smakka, fáar kynningar á maraþonum utan fylkisins en gaman að skoða.

Þetta maraþon verður hlaupið til heiðurs Lovísu sem á afmæli á morgun 17.okt.