Riverboat Series, Vienna IL, 24.apr 2022

Í þetta skiptið gisti ég í mílu fjarlægð frá starti. Ég hafði stillt vekjarann á 3:30 en var vöknuð áður. Eitthað hef ég verið utanveltu því ég gleymdi að teypa tærnar á öðrum fæti... Fór á startið rétt fyrir kl 5,

Startið var í sögufrægum garði... The Trail of Tears" kl 5:30 og í myrkri. Þetta var síðasti dagurinn í seríunni. Brautin var marflöt eftir hjólreiðastíg, 10 hringir. Það var heitt á köflum, stöku sinnum þægileg vindkæling og nokkrir regndropar. 

Þetta maraþon er nr 256

Vegalengdin mældist 44,2 km og tíminn yfir 9 tímar

Illinois er 31.fylkið í þriðja hring.

Riverboat Series, Columbus KY, 22.apr 2022

Ég keyrði í gær frá Chicago, 385 mílur eða 623 km og það sat aðeins í mér... Ég gisti í Cairo IL, 28 mílur í burtu frá Columbus. Var með vekjarann stilltan á 3:30 en var vöknuð fyrr, enda á röngum tíma. Hlaupið var ræst 5:30 í myrkri og leiðin meðfram Mississippi River. Leiðin var mjög krefjandi, 5 brekkur í hring og 14 hringir og þetta varð mjög heitur dagur... en ég komst í gegnum þetta. 

Ég hitti marga vini sem sögðu allir að þetta væri erfiðasta brautin í seríunni,.. Ég fékk ,,The cabuch" síðasta lestarvagninn, nú eru nýjar reglur, sama persónan getur aðeins fengið síðasta vagninn einu sinni í hverri seríu...

Þetta maraþon er nr 255

Vegalengdin mældist yfir 46 km og tíminn yfir 9 klst

Þetta er 30.fylkið í 3ja hring

Appalachian Series, Eufaula Alabama 25.mars 2022

Já, góðan daginn, fyrsta maraþonið í tvö ár og 4 mán og fyrsta langa vegalengdin eftir ökklabrotið. Ég flaug til Orlando og keyrði tæpar 400 mílur eða rúml 600 km til Eufaula. Ég áttaði mig ekki á að hlaupið var við fylkismörkin og síminn stillti sig við rangt mastur og ég vaknaði (2:45 í stað 3:45) og mætti á staðinn klst of snemma.

Hlaupið var ræst kl 5:30 á staðartíma og heilt maraþon var 12x fram og til baka. Fyrstu tvær ferðirnar voru í myrkri og ég hafði gleymt höfuðljósi... Ég var með göngustafi með mér sem ég notaði flestar ferðirnar...

Margir af mínum gömlu vinum voru mættir... og fagnaðarfundir. Það hitnaði fljótlega, en á stöku stað fékk maður ferskan vind á móti. Síðustu tvær ferðirnar fann ég þreytuverk þar sem skúfurnar voru í ökklanum.

Ég komst í gegnum þetta, eiginlega undrandi að ökklinn var í lagi en restin af skrokknum var þreyttur... Ég gekk það allt, þorði ekki að hlaupa fyrstu 5 km í myrkrinu án höfuðljóss... eins og ég hafði ætlað.

Maraþon nr 254
29. Fylkið í hring 3 um USA
Vegalengdin mældist 43,27 km og skráður tími er 8:39:39

 

Áramóta-annáll fyrir covid árið 2021

GLEÐILEGT ÁR 2022

Við óskum öllum Guðs blessunar, gæfu og góðs gengis á árinu 2022 um leið og við þökkum fyrir árið sem er að líða. 

Annáll þessa árs er skrifaður heima í Hafnarfirði... og eins og í fyrra voru engin maraþon hlaupin, enda fór ég ekki erlendis og Reykjavíkurmaraþoni var aflýst annað árið í röð... en verðlaunahrúgan hér til hliðar er fyrir ,,virtual" hreyfingu.

Ég átti ferð til Japans í Tokyó maraþonið í mars 2020 en því var aflýst og ég gat fengið öruggt númer í mars 2021... sem var frestað til okt 2021... því var aflýst og aðgangur minn fluttur til 5.mars 2023... 

Ég var prestur á Patró til 31.maí í ár, ég notaði tímann, hljóp og gekk... en það er hægara sagt en gert í svona ástandi að halda sér í formi en ég reyndi að hlaupa með Völu þegar ég fór suður... Ég sakna þess að vera ekki ráðin þangað þennan veturinn. 

Lengi vel vonaði ég að Reykjavíkurmaraþon myndi verða... sem hefði ekki gagnast mér neitt, því ég ökklabraut mig á 17.júní... en því var aflýst... 

Ég fór í augasteinaskipti 9.júní og var varla búin að jafna mig eftir það þegar ég ökklabrotnaði...
Ökklabrotið stal af mér sumrinu... því ég mátti ekki stíga í fótinn fyrstu 6 vikurnar og síðan rétt tilla í hann næstu 6v eða þangað til það var búið að taka skrúfurnar. Um leið og ég gat hökkt um á hækjunum reyndi ég að fara í gönguferðir um hverfið... og finna ratleiksspjöld sem voru amk ekki langt frá bílastæðum... Ég náði að finna 13 spjöld og fara aftur með barnabörnum að finna þau... Við urðum Léttfetar en til þess þarf að finna 9 spjöld.

Ég gekk hvorki á Helgafellið eða Esjuna né gekk Selvogsgötuna í ár.

Það eru komin rúm 2 ár síðan ég hljóp maraþon... staðan frá því áramótin 2019-2020 var svona og tölurnar hafa ekkert breyst.

Maraþonin eru ennþá 253
að auki, Ultra-hlaup 10
búin með 28 fylki í 3ja hring um USA
maraþonlönd 27
Heimsálfur 5
4/6 Majors

GLEÐILEGT NÝTT HLAUPÁR 2022

 

Hlaupa annáll fyrir árið 2020

GLEÐILEGT ÁR 2021

Við óskum öllum Guðs blessunar, gæfu og góðs gengis á komandi ári 2021 um leið og við þökkum fyrir árið sem er að líða. 

Annáll þessa árs er skrifaður á Patreksfirði... og hann verður öðruvísi en allir hinir. Það verður engin verðlaunapeningamynd hér til hliðar... því ég fór ekkert erlendis og hljóp EKKI EITT EINASTA MARAÞON á þessu ári þó árið væri HLAUPÁR. Ég átti að hlaupa Texas Marathon 1.jan 2020 en hætti við það að beiðni biskups. Í lok febrúar kom Covid-19 veiran sem var erfiðari viðureignar en flestir áttu von á og flestum maraþonum og íþróttaviðburðum í heiminum var aflýst eða frestað.

Ég átti ferð til Japans í Tokyó maraþonið í mars en því var aflýst og ég gat fengið öruggt númer í mars 2021... sem er nú búið að fresta til okt 2021.
Ég var ráðin á Patró til 31.maí í ár, ég notaði tímann þegar veður batnaði og gekk á Geirseyrarmúlann, upp að Kríuvötnum og á Hafnarmúlann með góðum konum. Eins reyndum við Lúlli að skoða okkur eitthvað um, en annars hljóp ég og gekk á Patró... það er hægara sagt en gert í svona ástandi að halda sér í formi en ég reyndi að hlaupa með Völu þegar ég fór suður. 

Í júlí átti ég ferð til USA og tvö maraþon sem voru flutt til næsta árs, það var í San Fransisco og Anchorage Alaska. Lengi vel vonaði ég að Reykjavíkurmaraþon myndi verða en svo var því aflýst... 

Ekki ráðum við við neitt svona, svo næsta skerf er að fylla tímann með einhverju öðru. Við systur tókum Ratleikinn, öll 27 spjöldin, Helgafellið var kysst oft og mörgum sinnum og ég gekk Selvogsgötuna tvisvar frá Kaldárseli.

Um sumarið halaði ég niður strava. Nokkrir vinir mínir í Marathon Globetrotters ákváðu að stofna ,,virtual" hlaupahóp og hlaupa í kringum Eystrasaltið. Við ætluðum að vera 3 mán að því en vorum bara um 50 daga... ég fór síðan að ganga myndir og set inn fyrstu myndina SNOOPY hérna... Mér tókst að draga fleiri í fjölskyldunni í þetta. 

1.nóv fluttum við aftur vestur á Patró til vetursetu og ég hef reynt að fara út amk 5x í viku, helst að hlaupa 3x og ganga 2x en stundum hefur það snúist við vegna hálku.

Það er komið meira en ár síðan ég hljóp maraþon... staðan um síðustu áramót var svona og tölurnar hafa ekkert breyst.

Maraþonin eru orðin 253
að auki, Ultra-hlaup 10
búin með 28 fylki í 3ja hring um USA
maraþonlönd 27
Heimsálfur 5
4/6 Majors

GLEÐILEGT NÝTT HLAUPÁR 2021

Hlaupa annáll fyrir 2019

G L E Ð I L E G T  Á R

Síðasti annáll var skrifaður í Thailandi, í ár ætlaði ég að skrifa hann í Texas, en vegna vinnu varð ég að hætta við þá ferð og skrifa annálinn því á Patreksfirði þar sem ég er settur prestur í vetur. Ekki var ég svo forsjál að taka mynd af verðlaunapeningum þess árs áður en ég keyrði vestur, svo myndin verður að bíða... en hún kemur. 

Ég fór 9 hlaupaferðir erlendis á árinu og hljóp í allt 15 maraþon.

Ég bætti við 8 nýjum löndum, Indlandi, Kýpur, Tékkóslovakíu, Kambodiu, VétNam, Argentínu, Malasíu og Singapore... Argentína var um leið í nýrri heimsálfu fyrir mig.

Að sjálfsögðu hljóp ég nokkur (5) maraþon í USA, ég hitti í einni ferð á tvö einhver erfiðustu maraþon sem ég hef hlaupið og svo ætlaði ég að taka 4 maraþon í Heartland seríunni en varð að lúta í lægra haldi fjórða daginn í röð og láta mér nægja 10 km... þetta varð til þess að ég varð að fara aukaferð út til að ná því að Reykjavík yrði nr 250.

Aukaferðin var til Stevenage UK... off road and self navigated challenge through the picturesque Hertfordshire countryside around Stevenage og til þess að komast í gegnum það prentaði ég út 3 og hálfa bls af leiðbeiningum... 

Í byrjun árs sá ég að það væri möguleiki fyrir mig að hlaupa maraþon nr 250 í Reykjavík... sem mér tókst síðan og er virkilega glöð að hafa fengið 250 sem keppnisnúmer, en ég hljóp heilt maraþon þar 23.árið í röð.

Síðasta maraþon ársins hljóp ég í Singapore á 63 ára afmælisdaginn minn.

Maraþonin eru orðin 253
búin með 28 fylki í 3ja hring um USA
maraþonlönd 27
Heimsálfur 5
4/6 Majors

GLEÐILEGT NÝTT HLAUPÁR 2020

Singapore Int. Marathon 30.nóv 2019

Standard Chartered Singapore International Marathon,
Half Marathon, 10K, 5K, Marathon Relay
Singapore, Singapore
30.Nov. 2019

http://www.singaporemarathon.com

Þetta er seinna hlaupið í þessari ferð. Rakinn í báðum hlaupum hefur verið ótrúlega mikill, raunar eru fötin okkar alltaf þvöl enda rigningartími núna. Þetta var kvöldhlaup sem gerði allt erfiðara... vera búin að vaka allan daginn, vandi að borða rétt og svo rakinn og myrkrið.

Ég var komin á startið upp úr kl 16. þetta er stórt hlaup, troðið af fólki. Hlaupið byrjar á Formúlu 1 brautinni en endar annarsstaðar. 

það var ræst kl 18 en það leið rúmur hálftími þar til það kom að mínum bási. Hitinn var 29° götuhiti 34°og rakinn ótrúlegur. Daglega drynja þrumur hér og við fengum þrumur en sluppum við rigningu. 

Leiðin var svo sem ágæt en þó nokkuð um fram og til baka leiðir. Drykkjarstöðvar ágætar þegar maður var búinn að uppgötva uppsetninguna, en síðustu 12 km var lítið til. Vegna rakans var ég öll í nuddsárum eftir hlaupið og gjörsamlega búin, ég þurfti að bíða einn og hálfan tíma eftir leigubíl og hélt ég myndi ekki halda það út.

Þetta maraþon er nr 253
Garmurinn mældi tímann 7:32:21
og vegalengdina 43,53 km

Penang Bridge Int Marathon 24.nóv 2019

Penang Bridge Int.Marathon
Penang, Malaysia
24.November 2019

http://www.penangmarathon.gov.my/portal/?RL=1

Öll Asíu-hlaupin sem ég hef farið í hafa verið um nótt. Eftir langt og strangt ferðalag hingað og +8 tíma mun við Ísland... þá hefur verið mikið rugl á svefni. Ég gat t.d. ekki sofið kvöldið fyrir þetta hlaup.

Maraþon startið var kl 1:30 am í nótt. Það var 26°c hiti og mikill raki í loftinu.

Þetta var erfitt maraþon, myrkur nær allan tímann, brautin eiginlega bara tvær langar götur fram og til baka og of langt á millidrykkjarstöðva sem voru litlar og því troðningur við þær. Brúin sem hlaupið heitir eftir er 13,5 km og við hlupum hana fram og til baka. Ég get ekki sagt að það sé skemmtilegt að hlaupa alltaf beint... fyrir utan að það var ekkert útsýni í myrkrinu.

Það voru ca 10 km eftir þegar það fór að birta og hitna um leið... og um 4 km seinna hlupum við inn í þvögu af gangandi 10 km hlaupurum sem bókstaflega fylltu brautina. Ég fór framhjá tveim maraþonhlaupurum sem fóru síðan burt í sjúkrabílum nokkra km frá markinu.

Ég held það hafi haft áhrif á frammistöðuna að mér tókst ekki að sofna kvöldið fyrir hlaupið og að ég er bæði á sveppalyfi við sveppum í vélinda og á sýklalyfi við svöðusári á stóru tá.

Guði sé lof þá tókst mér að klára þetta... en ég er alls ekki "sprettharður" prestur eins og greinin í Fréttablaðinu segir.

Þetta maraþon er nr 252
Garmin mældi það 42,61 km og tímann 6:49:24
Penang er nýtt land hjá mér

Buenos Aires Marathon, Argentína 22.sept.2019

Buenos Aires Marathon
Buenos Aires, Argentina
22.Sept. 2019

http://www.maratondebuenosaires.com/

Það er ótrúlega langt flug hingað, fyrst 6 tímar, síðan bið, og svo 11 tíma flug.

Við sóttum gögnin daginn fyrir hlaupið, expo-ið var ágætt, ca 10 km frá okkar hóteli sem var nálægt startinu. 

Ég stillti klukkuna á 4:00, græjaði mig, áætlaði um klst til að ganga á start og taka eina klósettröð. Hlaupið var ræst kl 7, leiðin var ágæt en samt tókst þeimm að finna amk 3 brekkur fyrir okkur.  Fyrsta drykkjarstöð var eftir 5 km en síðan á 2,5 km fresti. Hitinn var þolanlegur og nokkrum sinnum fengum við smá golu. 

Mér gekk ágætlega að halda áfram, fór að vísu aðeins of hratt í upphafi en ekkert sem kom að sök. Á leiðinni tók ég nokkrar selfie með Globetrotturum sem ég hitti. 

Marathon Globetrotter klúbburinn hefur alltaf samband við hlauphaldara og fær lengri tímamörk og í þessu maraþoni lofuðu þeir 7 klst... sem þeir svo sviku, þeir lokuðu markinu eftir 6:12... og amk einn Globetrotter fékk ekki skráðan tíma og verðlaunapening.

Þetta er maraþon nr 251
Garmin mældi leiðina ... 44,01 km
og tímann ... 6:04:30

Þetta maraþon færði mér nýja heimsálfu S-Ameríku og á ég þá 2 eftir, Ástralíu og Suðurskautið.

Reykjavíkurmaraþon 24.ág. 2019

Reykjavíkur maraþon
24.ágúst 2019
https://www.rmi.is

Ég sótti númerið á fimmtudegi og mætti í heiðursklúbbinn. Reykjavíkurmaraþon var svo vinsamlegt að láta mig hafa nr 250 og þau bentu fjölmiðlum á mig og stöð 2 og mbl tóku viðtöl við mig. Ég vona að það skili sér í meiri áheitum fyrir Einhverfusamtökin. 

Nóttina fyrir hlaup svaf ég frekar lítið og illa. klukkan var stillt á 5:45 og ég var farin út kl 7:30... ég mátti ekki vera seinni til að fá stæði og koma mér á startið. Það rigndi á leiðinni inneftir en var þurrt í hlaupinu. Ég var búin að tilkynna Maniac myndatöku kl 8:25. Nokkrir mættu.

Hlaupið var ræst kl 8:40. Mér gekk ágætlega fyrst, alltaf stuð á Nesinu. Ég verð að viðurkenna að ég fann heldur fljótt fyrir þreytu í hlaupinu, enda búin að hafa mikið fyrir því að þetta maraþon yrði nr 250... Indland í febrúar, Kýpur í mars, Prag í maí, 2 erfið fjallamaraþon í júní, 4 maraþon í júlí og Reykjavik er 3ja maraþonið í ágúst... 
Kannski var þetta líka spennufall í dag... en ég kláraði þetta maraþon eins og öll hin... en þetta er 23. árið í röð sem ég hleyp heilt maraþon í Reykjavík.

Ég hef bent á það mörg undanfarin ár að 4 km á milli drykkjarstöðva er of langt, tilhneigingin er að drekka annað hvort of mikið eða of lítið þegar svona langt er á milli... en það gerist ekkert í þessum málum. Í dag var brautin ný að hluta og ágæt nema síðustu km fyrir ofan Lækjargötuna... þeir virtust aldrei ætla að taka enda...

Þetta maraþon er nr 250, stór áfangi hjá mér
Garmurinn mældi það 42,67 km 
og tímann 6:20:42