Gögnin sótt í Seattle, Washingston

Jæja, eftir 2 löng flug komum við í nótt til Seattle... það var ekki eftir neinu að bíða... við ákváðum að kíkja í nokkrar búðir í dag, en mannfjöldinn var slíkur, (Thanksgiving-útsölurnar) eins og á Þorláksmessu, að við ákváðum að sækja bara gögnin fyrir Seattle-maraþonið og tékka á starti og marki.
Hlaupið er sæmilega stórt, veðrið verður lala... vonandi þurrt. Við gleymdum mynda-vélinni á hótelinu, enda átti upphaflega að kíkja í búðir... en það gerir ekkert til.
Expo-ið var ágætt, margt um manninn og spenna í loftinu. Hlaupið verður ræst kl. 8:15 á sunnudagsmorguninn, tímamunurinn er 8 klst. svo ég hleyp af stað kl. 16:15 á íslenskum tíma.

Mason City Marathon, Iowa 26.10.2008

On the Road for Education
Marathon & Half-Marathon, 10K & 5K, Mason City, IA USA. 26.okt. 2008
http://www.ontheroad4edu.org

Start at Music Man Square. 
Finish at Newman High School.

Klukkan var stillt á 5:45, enda erum við stutt frá bæði starti og marki. Veðurspáin var ekki glæsileg, spáði þurru þó það ætti að vera kalt. Þegar við keyrðum framhjá auglýsingaskilti á leið á startið, var hitinn á því 38F... þ.e. 3-4 °c.

Hlaupið var ræst kl 8 í skítakulda. Ég sem hleyp ekki með vettlinga heima, þó það sé frost... var með vettlinga mesta alla leiðina. Vindurinn var þvílíkur á móti og á hlið (Lúlli sagði, 32 metrar eða 12 vindstig) að maður átti í vandræðum með að stjórna fótunum...

Leiðin lá út í sveit, undirlagið malarvegir og margir að týna grjót úr skónum. Frá 14-19 mílu hélt ég að ég væri komin á ,,Laugaveginn" og þá brast á stórhríð... trúið þið því ??? Eftir nokkrar mílur slotaði hríðinni, en mótvindurinn var slíkur síðustu míluna að ég tommaði varla á móti veðrinu.

Þjónustan á leiðinni var í alla staði til fyrirmyndar og starfsfólkið yndislegt. Eftir hlaupið var boðið upp aðgang að sturtu, handklæði og eitthvað í gogginn.

Ég get ekki annað en verið hæstánægð, eftir allt þetta streð... 5:11:01 á mína klukku... en þeir voru ekki með flögutíma. Lúlli hafði tékkað okkur út á meðan ég hljóp og strax eftir hlaupið og sturtuna keyrðum við beint til Minneapolis.

Wichita Marathon, Kansas 19.10.2008

Wichita Marathon & Half Marathon, Relay, Wichita, KS USA, 19. okt. 2008
http://www.wichitamarathon.org

Eins og segir í færslunni á undan, þá keyrðum við beint úr Kansas City Maraþoninu í Missouri til Wichita í Kansas (svolítið ruglandi þetta Kansas - en fyrra er borg en síðara er fylki). Þar náði ég á síðustu stundu í gögnin fyrir Wichita-maraþonið.

Klukkan var stillt á 4:10... en flautandi bíll vakti mig um miðnætti og mér tókst ekki að sofna aftur. Lúlli keyrði mig í fyrstu rútu (5:45) sem keyrði mig til  Derby þangað sem hlaupið byrjaði. Fyrra start - fyrir fólk sem er lengur en 5 og hálfan tíma, var kl 7. Við hlupum fyrst í niðamyrkri og skítakulda.

Það var merkilegt hve vöðvarnir voru tilbúnir að hlaupa... samt ákvað ég að kraftganga inn á milli. Ég hafði hlaupið í Ecco-hlaupaskónum í gær en skipti yfir í vetrartýpu Nike í dag og ég hef hlaupið með ný innlegg í síðustu 4 maraþonum. Þegar sólin fór að skína hitnaði verulega og ég klikka ekki á sólarvörninni síðan ég brann illilega í Wyoming og New Mexico.

Ég kom í mark á 6:02:46 og þakka Guði fyrir það.

Þetta er í fyrsta sinn sem ég hleyp maraþon 2 daga í röð... en í þessari ferð er ég búin að hlaupa 6 maraþon á 4 vikum. 

Næst á dagskrá er að slappa af

PS... Það duga ekki minna en 2 maraþon til heiðurs Lovísu (sem átti afmæli á föstudag) því hún er ,,eigi einsömul"

Kansas City Marathon, Missouri, 18.10.2008

Waddell & Reed Kansas City Marathon & 1/2 Marathon, Relay and 5K, Kansas City, MO USA, 18.okt. 2008
http://www.waddellandreedkcmarathon.org/

Klukkan hringdi kl 5, og við vorum komin út 6:10, borgar sig ekki að vera seint í því, þá fær maður hvergi bílastæði. Við enduðum á ágætis stað. Það var skítkalt og allir svo vel klæddir að ég hélt að ég hefði einu sinni enn klætt mig vitlaust, en svo hlýnaði. Leiðin var ágæt, mér finnst skemmtilegt að hlaupa í húsahverfum og krókóttar leiðir í stað endalausra þjóðvega...

Á mílu 7, fór ég úr skónum í fyrra skiptið, vinstri skó... til að athuga hvort ég væri tábrotin, ég rak tána nefnilega í í gærkvöldi, en í gegnum allt hlaupið plagaði mig verkur í tánni. Rétt á eftir fór ég að finna sviða og þreytu í táberginu á hægra fæti... og fór úr skónum til að athuga hvort ég væri með steina í honum.... þessi verkur var að gera mig vitlausa alla leiðina... ég fann fyrir uppgjöf á miðri leið vegna þessa. En það er gott að eiga Guð... sem er í stanslausu sambandi.

Ég get ekki annað en verið ánægð.. bara að klára hlaupið.... tíminn var 5:30:00
Lúlli, Bíðari nr 1 beið eins og venjulega við marklínuna, búinn að tékka okkur út af hótelinu og tilbúinn að keyra 200 mílur til Wichita í Kansas... þar sem við sóttum gögnin fyrir næsta maraþon. 

WhistleStop Marathon, Wisconcin, 11.okt.2008

WhistleStop Marathon & Half Marathon, 10K, 5K, Ashland, WI USA, 11. okt. 2008  
http://www.whistlestopmarathon.com

Klukkan var stillt á 6:15, þar sem það var stutt fyrir mig að fara í rútuna. Við vorum mætt um 7:30.  Hlaupið byrjaði við Iron River... og hlaupið sem var ræst kl 9, var eftir malar-sveitavegi.
Umhverfið var ótrúlega fallegt í fyrstu - allt í haustlitunum- eins og mynd úr póstkorti.

En sveitavegurinn var beinn og 24 mílna langur... og maður hætti að sjá og meta fegurðina eftir nokkrar mílur.
Ég var alltaf að fá steina í skóna. Leiðin átti að vera "flat at first and then down hill" og ég segi ykkur að hún var öll á fótinn nema síðustu 50 metrarnir í markið voru "down hill."
Hver einasti hlaupari spurði ,,átti þetta ekki að vera down hill?  Tíminn var 5:28:02, bæði flögutíminn og úrið mitt.

Lúlli hafði tékkað okkur út af mótelinu á meðan ég var í brautinni og við keyrðum af stað til Minneapolis, strax og ég var búin að fá hlaupajakkann, verðlaunapeninginn, peysuna mína og nærast smávegis.  Þar fórum við beint á sömu áttuna og við vorum á um síðustu helgi.

Ég hef hlaupið 2svar áður í Wisconcin svo ekki fékk ég nýtt fylki hérna. Ég hljóp Fox Cities Marthon í Appleton heimabæ Houdini árið 2000 og Lakefront Marathon í Milwaukee árið 2001. Það var áður en það hvarflaði að mér að fara að hlaupa í öllum fylkjunum. 

Twin Cities Marathon, Minnesota, 5.10.2008

Medtronic Twin Cities Marathon & 10 Mile, 5K, Minneapolis/St.Paul, MN USA, 5.okt 2008 
http://www.mtcmarathon.org/

Hótelið okkar er mitt á milli start og finish. ca 7 mílur að keyra á startið.
Ég lét klukkuna hringja kl 5. Svaf sæmilega á köflum... þ.e.a.s. ég fór snemma að sofa, en vaknaði við sennilega drykkjulæti í herberginu fyrir ofan okkur... ótrúlegt plamp og dynkir í 2-3 tíma... en svo gat ég sofnað aftur.  Ég er svo sem vön að vera þreytt, þar sem ég hef aðeins einu sinni á allri minni ævi vaknað óþreytt.

Lúlli keyrði mig á startið, við vorum komin þangað um sjö. Lentum í vandræðum með gjaldmælirinn en bílastæðið var á besta hugsanlega staðnum, hinum megin við gatnamótin þar sem hlaupið byrjaði, ég þurfti bara að ganga ca 100 metra.

Hlaupið var ræst kl 8 og á annarri mílu byrjaði að rigna eins og spáin sagði. Þvílíkt úrhelli, ég hefði ekki verið blautari þó ég hefði hent mér í ána. Þeir gorta af því í bæklingnum um maraþonið að hlaupaleiðin sé sú fallegasta í Usa... ég segi nú bara - þeir hafa ekki farið í önnur hlaup og ég man nú ekki mikið frá hlaupinu hérna fyrir 8 árum, annað en að mér fannst hlaupið ,,ekkert sérstakt" og nú hefur það enn lækkað í áliti. Þjónustan á leiðinni var mjög léleg.  

Eftir 9 mílur hafði ég einungis farið í gegnum 2 drykkjarstöðvar    en svo voru þær á ca 2ja mílna fresti. Áhorfendur eiga allan heiður skilið eftir daginn... að hafa komið að hvetja þrátt fyrir úrhellið í dag... Það stytti upp þegar hlaupið var u.þ.b. hálfnað.

Ég kláraði þetta hlaup á 5:30:19 á mína klukku og var þá orðið nákvæmlega sama á hvað tíma ég kæmi. Ég hafði fengið í bakið á leiðinni... sennilega verið of bogin í rigningunni.

Matartjöldin sem ganga undir heitinu Míla 27... var bara svipur hjá sjón miðað við fyrir 8 árum... það var allt skammtað ofan í mann og ég hefði gjarnan viljað meira.

Ljósmyndari: Bíðari nr 1 og birting mynda með góðfúslegu leyfi hans 

Omaha Maraþon, Nebraska, 28.9.2008

Omaha Marathon & Half-Marathon, 10K, Omaha, NE USA, 28.sept. 2008
http://www.omahamarathon.com/

Klukkan var stillt á kl 5 AM, en það var óþarfi að stilla hana. Hótelið fylltist í gær af unglingum sem skemmtu sér, þangað til ég átti að vakna svo það var lítið um svefn. Við vorum mætt á startið á hárréttum tíma... þ.e. þegar klósettröðin var enn tiltölulega stutt.

Hlaupið var ræst 2 mín fyrir kl. 7 AM. Fyrri helmingurinn var ekkert nema brekkur... OMG og ég fór allt of hratt af stað og eyddi síðan allt of mikilli orku í brekkurnar.  Leiðin var frekar leiðinleg, 3svar var hlaupið fram og til baka eftir beinum og leiðinlegum götum, engir áhorfendur og eftir að 10k og hálfmaraþonið var síað úr, var frekar einmannalegt á leiðinni. Fólkið á drykkjarstöðvunum gerði sitt besta til að skapa stemningu og var frábært í alla staði.

Nóg var að drekka á leiðinni af vatni og Gatorade... og einu sinni var gel, milli 18 og 19 mílu. Um leið og hlaupið var ræst birti og síðan smá hitnaði... og fljótlega var hitinn rétt undir 30°c... og ég sem var að vona í gær að það yrði aðeins skýjað.  

Seinni helminginn af hlaupinu, var því allt of heitt fyrir mig, örsjaldan aðeins andvari til að kæla og allan tímann var steikjandi sól. Ég var því alveg búin að fá nóg þegar ég loksins kom í mark.

Maraþonið mældist 41,56 km, en það er ekki alveg að marka því gps-úrið datt út undir hraðbrautunum... tíminn hjá mér mældist 5:16:25 og var ég 4. í mínum aldursflokki

90. maraþonið mitt, Bismarck, N-Dakota, 20.9.2008

http://www.ndroughridermarathon.com/
Kroll's Diner ND RoughRider Marathon (formerly Bismarck Marathon) & Half Marathon, Marathon Relay, Bismarck, ND USA , 20 Sept. 2008

 
Ég fór snemma að sofa og svaf ágætlega  ... píndi þar með Bíðara nr. 1 til að sofna líka, þó hann hafi sofið mest allan daginn af því hann var svo slappur.

Klukkan var stillt að vekja okkur kl 5 en við vorum vöknuð korteri fyrr. Maraþonið var sama leið fram og til baka, byrjaði og endaði á sama stað, sem er ágætt. Vegna þess að það eru engin bílastæði við rásmarkið voru rútur frá bílastæði háskólans. Við vorum mætt í síðustu rútu kl. 6:45. 

Það var svo skítkalt úti... Hlaupið var ræst á réttum tíma kl. 7:30 en þá var orðið bjart.  Fljótlega kom sólin og hitaði heldur mikið... það er ýmist of eða van.  Þjónustan á leiðinni var mjög góð en fáir áhorfendur, enda var leiðin eiginlega á skógarstígum og lá út í sveit.

Ég var slétta 5:10:00 að hlaupa þetta maraþon sem var nr. 90 hjá mér og 26. fylkið mitt. 
Ég var 4. í mínum aldursflokki 

Reykjavíkurmaraþon, 23.ág. 2008

Það leit ekkert sérlega vel út með veður, en Bylturnar eru svo blessaðar... það hélst nær þurrt fyrstu klukkutímana. Startið var kl 8:40... fínt að byrja snemma. 
Ég fór aðeins of hratt af stað en hélt það út þar til ég lenti í mótvindi síðustu 7 kílómetrana á Nesinu.... svo bættist við úði og síðan rigning... en það var ekkert miðað við spána. 

Gullið, Bíðari nr 1, beið á 32 km. blettinum og hjólaði með mér síðustu 10 km. Hvílíkur munur að geta farið úr jakkanum, fengið almennilegan orkudrykk hjá honum og félagsskap....  ég er hvorki fyrir Gatorade eða Powerade... svo var þessi elska með súkkulaði og auðvitað myndavélina. 

Síðasta km hjólaði hann á undan til að ná mynd í markinu.  Ég er hæst ánægð með tímann minn, 5:03:48.... sem ég náði þrátt fyrir mikið æfingaleysi.

4 úr Byltuhópnum hlupu hálft maraþon, Magga og Þórdís hlupu í fyrra en Þóra Hrönn og Ingileif voru að hlaupa vegalengdina í fyrsta sinn... og þetta var glæsilegt hjá þeim öllum.

Til hamingju með hlaupið stelpur     

Margrét Halldórsdóttir   2:05:30
Þórdís Bjarnadóttir        2:21:17
Þóra Hrönn Njálsdóttir  2:21:24
Ingileif Malmberg          2:22:02

Dam-maraþon Rexburg Idaho, 14.júní 2008

Rexburg Teton DAM Marathon & Half-Marathon, Marathon Relay, 10K, 5K, Fun Run
Rexburg, ID USA, June 14, 2008 .....  http://www.dammarathon.com

      

Klukkan hringdi kl 4:15, og ég hafði eina ferðina enn sofið illa. Lúlli ákvað að keyra mig alla leið upp að stíflu..... réttara sagt leifunum af henni, því stíflan var ekki endurbyggð. Við eltum því rúturnar uppeftir. Hann fór svo á hótelið í sturtu og morgunmat og tékkaði okkur út fyrir kl 11.

Ég hljóp af stað með hinum kl. 6:30.... fann strax fyrir lofthæðinni... átti erfitt með að anda.  Vildi samt ekki gefast strax upp og fara að ganga. Leiðin var erfið, margar langar brekkur og 8 mílur af leiðinni var á malarvegi.
Ég varð fljótt ein.... og nákvæmlega ekkert að sjá á leiðinni. Þau eru oft svona þessi litlu hlaup... í litlum bæjunum.

Svo varð kominn 25 stig hiti um kl 8.   Ég hætti að reyna að hlaupa fljótlega, og stóð oft á öndinni við að reyna að ganga hratt.  Ca helminginn af leiðinni fékk ég heitan vindinn í fangið.
Kom í mark á 6:00:59 á mína klukku....

Idaho var 25. fylkið og þar með er helmingurinn að þeim búinn... og vonandi er ég þá búin með öll fjallafylkin..... Bíðarinn verður að fara að velja borgarhlaup fyrir mig   

Strax eftir hlaupið keyrðum við til Salt Lake City (ca 4 tíma keyrsla)