Róm Maraþon 2.apríl 2017

acea Roma (Rome) Marathon & 5K
Roma, Italy

2.apríl 2017

http://www.maratonadiroma.it/?lang=en

Við erum sérstaklega heppin með staðsetningu hótelsins en óheppin að herbergið er fyrir ofan úti-bar. Start og finish á maraþoninu er hér stutt frá og á morgun byrjar morgunmaturinn klst fyrr fyrir hlaupara.

Við náðum í gögnin fyrir maraþonið degi fyrir hlaup, ss á laugardegi. Það var þvílíkur gangur í gegnum Palazzo Dei Congressi... og engin leið að stytta sér leið. Númerið mitt er F1855.

Klukkan var stillt á 5 en það var kannski óþarflega snemmt... sérstaklega því við höfum varla sofið síðustu tvær nætur vegna hávaða frá fullu, syngjandi fólki. Barinn er opinn til 3 am og þá tekur hreinsunarlið við og flöskuglamur við rúllandi gler undan kústunum...

Það var fáránlega langur gangur til að komast að innganginum að startlínu... kringum hálft Hringleikahúsið. Það byrjaði að rigna áður en ég komst af stað kl 8:45... og miklar þrumur. Colosseo er í elsta hluta borgarinnar og göturnar steinlagðar með smásteinum sem voru glerhálir í rigningunni. Fyrri hluti leiðarinnar var um marga þekkta staði m.a. Vatikanið, falleg torg með flottum gosbrunnum og nóg að sjá en síðari hlutinn var ekki eins fyrir augað. 

Í miðju hlaupsins stytti upp í ca 2 tíma en svo kom hellidemban aftur. 

Ég er bara ánægð með þetta maraþon, ég þurfti að hafa fyrir því, bleytan og erfitt undirlag á meirihluta leiðarinnar. Garmurinn datt tvisvar út í löngum undirgöngum. Vatnsstöðvar voru á 5 km fresti sem dugði vegna rigningarinnar en á síðari hlutanum var ég líka farin að taka mér vatnsflöskur til að halda á.

Þetta maraþon er nr 212
Garmurinn mældi maraþonið 42,88 km og tímann 6:03:21

 

Little Rock Marathon 5.mars 2017

Little Rock Marathon and Combo, with 5 km 

http://www.littlerockmarathon.com

Ég lenti í Little Rock á föstudegi og sótti þá númerin fyrir bæði hlaupin. Í fyrsta sinn bjóða þeir upp á Combo... og ég valdi Marathon og 5 km... sem eru í fyrramálið. Öll hlaupin byrja á Scott st og enda á Main street.

Ég er auðvitað í tímaflakki svo ég var vöknuð á undan vekjaranum sem hringdi kl 4 am. Ég var búin að sigta út bílastæði og var komin þangað 2 tímum fyrir start.
5km voru ræstir kl 7:30 og mér gekk ágætlega,um 38 mín, passaði mig að vera ekki með neinn æsing. Veðrið var frábært, aðeins kalt í upphafi en svo hlýnaði... og peningurinn flottur.

Klukkan var stillt á 3:30 fyrir maraþonið kl 7 am. Ég heyrði strax að það var rigning. Eftir hefðbundinn undirbúning fór ég af stað, til að fá bílastæði á betri stað... það þýðir að maður þarf að mæta snemma. Ég beið um klst í bílnum en fór síðan í Convention Center fyrir Marathon Maniac hópmyndina...og til að komast á almennilegt klósett.

Myndatakan átti að vera kl 6:30... og af 137 MM var bara einn mættur og hann kom alla leið frá Íslandi... en svo komu nokkrir í viðbót.

Það dróst um nokkrar mínútur að ræsa hlaupið... og það rigndi jafnt og þétt. Göturnar eru mjög sleypar í rigningu. Hálfa marathonið fór af stað með okkur og leiðin var nokkuð slétt þar til leiðir skildu... þá fengum við allar brekkurnar sem voru eftir í borginni...

Ég hafði farið af stað með 6 tíma hópnum og týndi honum í lengstu brekkunni. Þegar míla var í mark hljóp ég fram úr fyrirliðanum sem var búinn að týna öllum úr hópnum. Ég var því á undan honum í mark. 

Þetta er í 3ja sinn sem ég hleyp Little Rock Marathon, í fyrsta sinnið var það í ágætis veðri, síðan í ísregni og núna í rigningu fyrst en síðan nær þurru veðri.  

Þetta marathon er nr 211 
Garmurinn mældi það 42,64 km og tímann 6:06:26

Í dag hljóp ég til heiðurs þrem afmælisbörnum, yngst er Eva Karen langömmu-dúlla sem er 3ja ára í dag, Helga frumburður og amma Evu Karenar er 42 ára í dag og Emil mágur sem er 51.árs í dag. Þau fá öll ómældar hamingjuóskir.

ALOHA Series #3 Kaua´i Hawaii 21.jan 2017

 

 

http://mainlymarathons.com/series-3/aloha

Ég nota sama númerið áfram í seríunni, sem er nr 18. Við tókum það rólega seinnipartinn og fórum snemma að sofa... tókst samt ekki að sofa mikið. Klukkan var stillt á 2:30 því það er lengra á stöndina í Kapaa en í garðinn síðast. 

Eftir að hafa borðað, teypað tær og tekið saman dótið, lögðum við af stað. Það var hávaða rok og hafði rignt mikið um nóttina. Áður en hlaupið var ræst var komið íslenskt hágæða slagveður. Eins og síðast þurftum við að hlaupa fyrstu tímana með höfuðljós... og þá blandaðist saman hágæða slagveður, myrkur og sleypar gangstéttir. Við fórum 12 ferðir út og til baka.

En allt hefst þetta, eftir sirka 3 tíma rigndi bara með köflum en vindurinn jókst á snúningsstaðnum úti á tanga. Ég þekki örugglega annan hvern mann í Seríuhlaupunum og ALLIR þekkja mig... ég geri ekki annað en að auglýsa maraþonin heima (búin að gera það í mörg ár) og landið, sem hefur verið núna á BUCKET LIST svo margra í nokkur ár.

Mér gekk ágætlega, varð að vísu mjög stíf af hálkunni á gangstéttunum... en fóturinn hélt og ég var sæmilega góð eftir fyrri maraþonin... þetta er þriðja maraþonið í ferðinni. 
Maraþonið er til heiðurs elsku pabba sem hefði átt afmæli í dag. :*

Þetta maraþon er nr 210, 
Garmin mældi vegalengdina 42,61 km
og tímann 6:52:44

PS... verð að setja myndir seinna :) 

ALOHA series #1, Kaua´i Hawaii 19.jan. 2017

 

http://mainlymarathons.com/series-3/aloha/

Við sóttum númerið í gær, á sama stað og maraþonið byrjar á morgun. Eftir afhendinguna vorum við búin að panta miða á ,,bestu Luau" sýninguna á eyjunni sem er einmitt í Smith Family Garden Luau. Þetta var skoðunarferð, matur og sýning. Það eina sem hefði mátt vera betra, var að vera ekki í maraþoni daginn eftir.

Við fórum að sofa milli 10 og 11 um kvöldið og þurftum að vakna kl 3am. Ég er viss um að ég svaf eitthvað. Þetta var ekkert of langur tími til undirbúnings því það er 15-20 mín keyrsla á staðinn.

Hlaupið var ræst kl 4:30am, í niðamyrkri og maður eyddi mikilli orku í að fylgjast með undirlaginu, sum staðar slétt, sum staðar óslétt, dýraskítur, blaut laufblöð eða akörn sem gátu kostað fall. Hver lykkja var um 1,6 mílur - maraþonið var 16 ferðir.

Þessi sería er ný, í fyrsta sinn, maraþon 4 daga íröð og þetta var fyrsti dagurinn. Umhverfið í Smith Family Garden Luau (Wailua Kaua´i) er ótrúlega fallegt og dýralífið líka... auðvitað voru brúnu hænsnin út um allt og hanarnir stanslaust galandi, eins og um alla eyjuna... en svo voru páfuglar spígsporandi við hliðina á okkur og kisa innan um alla smáfuglana.

Ég var búin með 6 ferðir þegar það fór að birta og hitna... smá hluti af leiðinni var aðeins lengur í skugga. Þegar ég hafði klárað hálft, fékk ég mér afmælisköku og var tekin í blaðaviðtal eins og fleiri, hjá fréttablaði staðarins/eyjunnar... það tók smá tíma.

http://thegardenisland.com/sports/running/mainly-marathons-race-series-underway-on-kauai/article_16226e1d-4053-5e0a-8fd4-4b8af8187f24.html

Hitinn var sennilega um 30°c sem er ekki mitt besta hlaupaveður... en mér gekk samt ágætlega, fann ekki fyrir fætinum, var ekki að berjast við krampa (enda drakk ég amk 2 full glös af kóki á hverri drykkjarstöð) og ég datt ekki í leiðindi enda alltaf nóg af fólki á brautinni. Verðlaunapeningarnir hjá Clint eru stórglæsilegir og alltaf tilhlökkun að fá þá í hendurnar.  Ég tók fullt af myndum sem ég set inn seinna, hér og á FB.

Þetta maraþon er nr 209... Garmin mældi vegalengdina 43,28 km
og tímann 7:42:20 

Með þessu maraþoni held ég að ég sé búin að hlaupa maraþon á öllum (4) eyjum Hawaii sem eru með maraþon... Honolulu, Hilo, Maui og Kaua´i.

Maui Oceanfront Marathon 15.jan 2017

Maui Oceanfront Marathon & Half, 15K, 10K, 5K
Lahaina, Maui, HI USA
15.janúar 2017

http://www.MauiOceanfrontMarathon.com

Við sóttum númerið í gær, ekki lengi gert, númer og bolur og þetta var í göngufæri frá hótelinu okkar. Rúturnar stoppa rétt hjá og endamarkið er líka í sömu götu. Þeir sem ætla að taka Early start þurfa að mæta í rútuna fyrir kl 3:30 og verða ræstir 4:30.

Ég ákvað að taka early-start þó ekki væri nema til að vera lengur í svala. Það var 30°C í gær og gæti verið heitara í hlaupinu.
Við erum hvort sem er kolvitlausum tíma, svo við sofnuðum kl 18 og vöknuðum um kl 1am. Eftir að hafa borðað og græjað mig labbaði Lúlli með mér í rútuna.

Það er skelfing að vera keyrður leiðina sem maður á að hlaupa til baka og hún er ekki spennandi, á mjóum renningi í umferðinni meðfram sjónum.

Ég var með höfuðljós og vatnsflösku eins og reglurnar sögðu. Í myrkrinu var ekkert annað að gera en horfa niður fyrir sig. Þegar birti var ekki mikið að sjá, við vorum þá komin út fyrir þennan bæ og á þjóðveginn.
Það var ekki spennandi leið, sólin skein alltaf á bakið á mér og það varð mjög fljótt heitt, götuhitinn gæti hafa verið um 35°C.

Þetta var allt of heitt fyrir mig og ég fór fyrst að hlaupa/ganga eftir kerfi, síðan kraftganga en síðustu 4 mílurnar fór ég rétt fetið og farin að berjast við sinadrætti. Míluspjöldin töldu niður þannig að ég hef aldrei verið eins fegin og þarna, þegar ég kom að mílu 1.

Lúlli beið eftir mér í markinu.. en marksvæðið skartaði íslenska fánanum á besta stað. 

Þetta maraþon er nr 208
Garmin mældi vegalengdina 42,4 km 
og tímann, 7:26:08

Texas Marathon 1.jan. 2017

Metal Sawing Technology Texas Marathon
Kingwood, TX USA
1.jan 2017
http://www.50statesmarathonclub.com/texas.html

Við sóttum númerið í gær og hittum um leið okkar kæru vini Paulu og Steve Boone. Þau eru alltaf jafn frábær. Það er ekkert venjulegt hvað þau hafa mikið fyrir þessum hlaupadegi. Veðurspáin var slæm fyrir hlaupið... hellirigning og tvær þrumur á kortunum. Það hellirigndi alltaf öðru hverju á gamlársdag. Það gerði ekkert til fyrir okkur, við tókum því bara rólega.

Klukkan var stillt á 5 am. Ég svaf ágætlega. Við vorum tilbúin þegar morgunmaturinn byrjaði kl 6 og stuttu seinna vorum við lögð af stað... og máttum ekki seinni vera til að fá sæmilegt bílastæði. Loftrakinn var 100% sagði veðurspáin en það var hætt við rigningu.

Fyrir maraþonið var hefðbundin viðurkenningarathöfn, ef fólk var að hlaupa t.d. 100asta maraþonið eða í 5, 10 eða 15 sinn hjá þeim... þó fólkið fengi ekki verðlaunin fyrr en í markinu eftir hlaupið.
Ég var kölluð upp og fékk afhentan verðlaunagripinn fyrir tvo hringi um USA... Vá hvað ég er stolt af þessum grip.

Marathonið var ræst kl 8am. Sama leiðin var hlaupin 4x og ég þekkti hana vel... yfir 3 götur, 2 undirgöng og yfir 11 svell-sleipar trébrýr, kringum vatn og til baka sömu leið. Hálkan á brúnum var verst, rakinn var svo mikill að ég var mörgum sinnum næstum farin á hausinn, stígarnir voru líka sleipir og ekki bættu blaut laufblöðin stöðuna... ég hef aldrei hlaupið í öðrum eins raka og svo var óvenju heitt.

Ég get ekki kvartað, ég fann ekki til í fætinum, veðrið hélst "þurrt", ég hitti ótrúlega marga sem ég þekki, ég fékk viðurkenninguna mína og geðveikislega flottan verðlaunapening.

Þetta maraþon er nr 207 og er sjöunda maraþonið sem ég hleyp í Texas. 
Garmin mældi tímann 6:43:29 og vegalengdina 42,56 km.
ég kom nr 242 í mark

Ég set fleiri myndir á Facebook

Þetta maraþon var að sjálfsögðu hlaupið til heiðurs afmælisbarni dagsins Emilíu Líf langömmu dúllunni minni sem er 5 ára í dag.

 

Space Coast Marathon, Cocoa Beach 27.nóv. 2016

Space Coast Marathon & Half Marathon
Cocoa, FL USA
27.nóv 2016

http://www.spacecoastmarathon.com

Við keyrðum frá Orlando til Cocoa Beach í gær, laugardag, sóttum númerin okkar og tékkuðum okkur inn á Days Inn. Þessi ferð hefur verið óslitin verslunarferð og við héldum áfram að versla áður en við tókum saman fötin og dótið fyrir morgundaginn. 

Klukkan var stillt á 3am... og við sváfum allar ágætlega. Eftir hefðbundinn undirbúning töltum við yfir á Best Western til að taka rútuna... Það vantaði aðeins upp á skipulagningu rútumálanna en við komumst í tæka tíð á startið.

Berghildur og Edda voru skráðar í hálft maraþon sem startaði kl 6am en ég var í starti 6:30. Þær voru að fara í fyrsta sinn rétta hálfmaraþon leið.

Fyrri hlutinn af minni leið var nokkuð erfiður, þar eru meiri smábrekkur en verst var að þar var stafalogn sem gerði steikarhita... ég var alveg að fara að ákveða mig að taka "the wormhole" það er stytta niður í hálft... en þá dró ský fyrir sólu og ég fékk blástur....

Seinni helmingurinn af leiðinni var betri, alltaf blástur og skuggar á milli. Ég hitti fullt af vinum bæði Maniökum og 50Statum... Alltaf svo gaman hjá okkur og eitthvað til að tala um.

Þetta maraþon er nr 206, garmurinn mældi það 42,91 km og tímann 6:26:51

Aþenu maraþon 13.nóv 2016

Athens Marathon


(Greece) & 10K, 5K Athens, Greece
13.nóv. 2016

http://www.athensauthenticmarathon.gr/

Í fyrsta sinn í Grikklandi og gaman að hressa upp á grískuna...

Við vorum svo heppin að það voru fleiri hlauparar á hótelinu og hótelið framreiddi morgunmatinn 2 tímum fyrr (kl.5) svo við gætum borðað fyrir hlaup.
Klukkan hringdi kl 4 am og þetta var ein af þeim nóttum sem ég hvíldist ekkert... ég er ekki einu sinni viss hvort ég svaf eitthvað.

Við lögðum af stað fyrir kl 6 því síðasta rúta á start frá Sygrou Fix átti að fara kl 6:15. Lúlli labbaði með mér. Hvílíkur straumur af rútum og þeir sem þekktu til voru ekkert að spá í tímann. Í rútunni sat ég við hliðina á konu sem býr í Melbourne Ástralíu... hún var 18 tíma í flugi fyrir hlaupið... hún var búin að stúdera leiðina vel og upplýsti mig.

Það var svakaleg örtröð á leikvanginum í Marathon fyrir hlaupið og ræst í hollum, ég þurfti að bíða 40 mín í básnum. Fyrstu 8 km voru sléttir, næstu 24 km voru brekkur, allar upp nema tvær og þaðan lá leiðin niður...

Ég get ekki kvartað, gekk bara ágætlega... gekk eitthvað í brekkunum og þá þá þreytist ég alltaf í bakinu... ég hélt að heltin ætlaði að taka sig upp en ég slapp við það... mjöðmin fékk smá álag af veghallanum en það hvarf við Panodil... þjónustan á leiðinni var góð og leiðin sjálf auðvitað EINSTÖK... þetta er mekka maraþonsins... Hið eina sanna.

Lúlli lenti í smá veseni, göturnar voru lokaðar fyrir umferð svo hann varð að ganga á endamarkið... en hann stóð eins og hetja við markið þegar ég kom - enda er hann "Bíðari nr 1"

Þetta maraþon er nr 205, Garmurinn mældi vegalengdina 42,61 km og tímann 6:21:06

Stavanger Maraton 27.ág 2016

Stavanger Maraton & Half Maraton
Stavanger, Norway
27.ágúst 2016

http://stavangermarathon.no/en

Við komum til Stavanger í gær og sóttum númerið... Við erum mjög vel staðsett, 1 mínúta frá hóteli í gögn og start EN 5-7 mínútur í bílastæðahúsið þar sem við verðum að geyma bílinn því það eru engin önnur bílastæði í boði.

Við fórum snemma að sofa... ég hef verið hálf slöpp af kvefi. Við sváfum ágætlega og þægilegt fyrir okkur að geta borðað morgunmat á hótelinu fyrir hlaup.

Hlaupið var ræst kl 9 am... og ég varð fljótlega með þeim síðustu enda fáir í heilu. Fyrir hlaupið spurði ég hvort það væri mikið um brekkur og svarið var NEI... kannski skildi hann ekki ensku...

Það var þó nokkur raki í loftinu og fljótlega sögðu lungun upp... og heltin á hægra fæti ágerðist aðeins þegar ég byrjaði að ganga... svo ég tók þá ákvörðun á 17 km að láta hálft maraþon duga í þetta sinn.

Ég var ekki viss hvort ég fengi pening en þeir létu mig fá hálfmaraþon pening en ég fór 22,5 km.

Þá er ég búin að hlaupa í Noregi.

Governers Cup Helena MT 11.júní 2016

Governers Cup Marathon Helena MT
11.júní 2016
http://www.govcupmt.com 

Í dag náði ég þeim ótrúlega áfanga að hafa farið maraþon í öllum 50 ríkjum USA í ANNAÐ SINN. Það eru ekki mörg ár síðan ég hefði talið það útilokað.

Ég sótti númerið í gær (120). Vala og Hjörtur eru með okkur og allt var svo planað í kringum markmyndatökuna að það vantaði bara að við æfðum hana ;)

Ég stillti klukkuna á 2:50 og fór snemma að sofa... og svaf ágætlega. Eftir hefðbundinn undirbúning fórum við af stað, því ég þurfti að ná amk síðustu rútu á startið kl 4:45.

Hlaupið var ræst kl 6am. Þetta er ekki stórt maraþon... og fljótlega var ég orðin ein. Það var búið að breyta leiðinni síðan ég hjóp hérna síðast en leiðin varð ekki skemmtilegri... langir sveitavegir eins og augað eygir, hlaupið á jarkanum á öðrum fæti í vegkantinum.

Veiki fóturinn gaf sig á miðri leið... en það var ekkert til umræðu annað en að klára. 

Leiðin var ekki skemmtileg og of fáar drykkjarstöðvar... og með litla þjónustu.

Bíðari nr1, Vala og Hjörtur biðu samviskusamlega í markinu með íslenskan fána-borða fyrir mig til að hlaupa gegnum... ÆÐISLEGT 

Þetta maraþon er nr 203, Garmurinn mældi það 26,65 mílur og tímann um 7 klst

EN MARKMIÐIÐ NÁÐIST Í DAG - TVEIR HRINGIR UM AMERÍKU :)