Gögnin sótt í Bowman N-Dakota

Við lentum í Denver síðasta föstudag (13.9) og vegna hörmungarflóða sem ollu neyðarástandi fyrir norðan Denver, vorum við teppt fyrsta kvöldið í Denver og við vorum óviss um hvort ferðin væri ónýt hjá okkur... EN við vorum blessuð og komumst krókaleið framhjá flóðasvæðinu og keyrðum um 600 mílur til Bowman.

Fyrst keyrðum við í gegnum Wyoming til S-Dakota og og þaðan norður til N-Dakota. 

Hér er ekkert um að vera... engin veitingahús opin, búðir eða neitt. Lúlli borðaði afganginn af kjúklingnum en ég fékk mér SUBWAY, það var eina sem var hér.

Við sóttum gögnin, ég hef númerið 27 í öllum hlaupunum. Ég fékk glæsilegan start-pening sem ég hengi síðan hvern nýjan pening neðan í... og þeir eru sko ekkert slor.

Við gistum á Áttu, og þau ætla að hafa morgunmatinn til kl 4:30 svo við fáum að borða áður en við förum.
Maraþonið verður ræst kl 6:30 á morgun (mánudag 16.9).

Reykjavíkurmaraþon 23.8.2013

Við Lúlli sóttum númerið í gær og fengum okkur pasta með Lovísu, ég náði aldrei í Svavar til að tékka á honum og óska honum velgengni í hlaupinu.

Ég hitti Imke, þýska konu sem hafði fundið mig og Matthías á Youtube.com og skrifaði mér email eftir að hún komst að því að ég hlypi maraþon. Hún er ótrúleg kona, talar 6 tungumál, þar á meðal íslensku þó hún hafi aldrei búið hér.

Eftir pastað, fórum við heim og ég tók saman dótið fyrir maraþonið. Ég hafði sofið svo illa nóttina áður að ég hélt að ég myndi detta út af áður en ég hitti koddann - en það var víst bara óskhyggja... ég upplifði aðra vökunótt... og slökkti dauðþreytt á klukkunni kl. 5:40

Ég verð að muna það næst að ég vaknaði klukkutíma of snemma núna... það gerði svo sem ekkert til.
Við fórum af stað inneftir 7:15 því ég var búin að setja á Maniac-myndatöku kl. 8

Veðrið var ekki alveg í uppáhaldi... vindur og rigningarúði. Myndatakan var því innandyra, 5 Maniac-ar mættir og Imke.

Maraþonið var ræst kl 8:40
Ég fór alltof hratt af stað og var að kafna fyrstu kílómetrana en svo jafnaði ég mig. Auðvitað var ég ekki í æfingu - frekar en vanalega.
Lovísa og Svavar hlupu 10 km og Lúlli náði þeim á mynd í startinu.

Það rættist úr veðrinu öðru hverju en inn á milli komu skúrir. Lúlli hitti mig hjá 30 km keilunni og hjólaði með mér síðustu 12 km. Hann kom með Orku fyrir mig. Lovísa og Matthías biðu síðan við hringtorgið hjá Granda.

Garmin mældi maraþonið 42,64 og tímann 5:23:28
Ég get ekki annað en verið sátt við niðurstöðu dagsins en þetta maraþon er nr. 161

New England Challenge #5 Old Colony Marathon, 24.5.2013

OLD COLONY MARATHON Springfield, Massachusetts

Friday May 24, 2013 - 6am Start
Four laps of 6.24 Miles, plus 1.24 Miles at start
http://www.newenglandchallenge.org/oldcolony.html

Við vorum 4 mílur frá Forrest Park þar sem startið var, svo ég stillti klukkuna á 4 am... Síðan reyndi ég að fara snemma að sofa. Það lítur ekki vel út með veður, það hefur verið úrhelli í dag... síðan er það hlaupagallinn... ég verð að hlaupa undan vindi í fötum sem ég skolaði um daginn.

 

Þegar klukkan hringdi byrjaði venjulegur undirbúningur, hella á kaffi, borða, vasilín, teypa tærnar og troða sér í aðeins rök föt. GOTT að þetta er síðasta maraþonið í þessari ferð.

 

Lúlli varð eftir á mótelinu, Joe við hliðina fékk að elta mig í garðinn... veðrið var nokkurnveginn þurrt. Hlaupið var ræst kl 6 eins og hin en þetta er síðasta hlaupið í NEC-seríunni.

 

Eins og vanalega var myndataka áður, af þeim sem hlupu í dag og þeim sem eru að klára séríuna. Þetta maraþon er jafn erfitt og hin, þó hringirnir séu mislangir þá eru þeir allir í einhverjum görðum með bröttum brekkum bæði upp og niður. Hringirnir í dag voru frekar langir og aldrei þurrt á leiðinni. Ég fékk blöðru á annan hælinn í öðru maraþoninu og hún plagaði mig fyrstu tvo hringina - síðan held ég að hún hafi bara fyllt út í skóinn og stífað mig af 

 

Þegar við Nick nálguðumst markið sáum við að það vantaði mílu upp á vegalengdina, svo við stöggluðumst við að bæta við leiðina, hlupum í allar áttir þar til við náðum 26,1 og fórum í gegnum markið, en þeir sem voru ekki með garmin... ???

 

Garmin mældi leiðina með viðbót 26,1 mílu og tímann 6:32:55

Þetta maraþon er nr 160 

New England Challenge #3 Rhode Island 22.5.2013

RED ISLAND MARATHON

Warwick, Rhode Island

Wednesday May 22, 2013 - 6am Start
Nine laps of a 2.7 mile loop (24.3 miles), plus a short out and back of 1.9 miles for the Marathon distance of 26.2 miles.
http://www.newenglandchallenge.org/redisland.html

Þetta er í eitt af afar fáum skiptum sem ég merki ekki startið á Garmin daginn áður. Flestir sem ætla að hlaupa á morgun gista á þessu hóteli. Og við erum svo heppin að morgunmaturinn byrjar 4:30.

Klukkan vakti okkur 3:45 og ég var enn þreytt, hafði ekki sofið vel, ég fór of seint að sofa og það stressar mig rosalega. Við Lúlli ákváðum að hann biði bara á hótelinu, veðurspáin var miklar líkur á rigningu... svo ég klæddi mig samkvæmt því.

Það var litskrúðugt lið Maniac-a og 50 Staters sem hékk á hurðarhúninum við matsalinn 4:30, meira að segja maðurinn sem stjórnar hlaupinu var að spurja til vegar í garðinn sem hlaupið var í.

Við ætluðum að keyra í halarófu en rauð ljós og aðrir bílar sem komu inn í urðu til þess að ég villtist í myrkrinu... fór einhverja mílur afvega en náði að rétta mig af og ná hlaupinu í tíma.

Það er mikið til sama fólkið sem er að hlaupa þessa seríu, þó sá ég ný andlit í dag og aðrir hættir. Í gær hlupum við 5 hringi í dag eru þeir 9... Flestir kalla mig bara "Iceland"

The Marathon Man var þarna, ástrali sem ætlar að setja nýtt met í fjölda maraþona á árinu, ætlar að hlaupa 157, hann hlýtur að búa hérna núna... það halda flestir hér að ég búi í USA. Þá hljóp einfættur maður með fót frá Össur með mér bæði í gær og í dag.

Veðrið hélst skaplegt og því var ég ofmikið klædd í hlaupinu... svo ég gerði þau mistök að fara úr langermabolnum og er nú öll útstungin eftir moskito. 

Garmin mældi vegalengdina 26,21 mílu og tímann 6:37:22
Þetta maraþon er nr 159 

New England Challenge #2 NH The Granite State, 21.5.2013

GRANITE STATE MARATHON
Nashua, New Hampshire
Tuesday May 21, 2013 - 6am Start
http://www.newenglandchallenge.org/granite.html

Klukkan var stillt á 3:30. Við höfðum sofið óvenju vel og lengi. Þegar ég var að tékka okkur út, var hálft hótelið líka að fara, flestir voru Maniacs að fara í hlaupið.

 

Ég held þetta sé í fyrsta sinn sem ég hleyp maraþon á þriðjudegi, er annars ekki viss þar sem ég hef tvisvar hlaupið á nýjársdag í Texas.

Þetta maraþon er nr 2 í seríunni NEW ENGLAND CHALLENGE sem byrjaði í gær.

Við höfðum farið á startið daginn áður... og vorum mætt tímanlega. Veðrið var ágætt og hélst ágætt, einu sinni kom góður rigningarskúr og síðustu tímana var verulega heitt, sennilega fór hitinn yfir 80°F.

 

Leiðin var ekki vel merkt eða mæld... en ég gat stytt síðasta hringinn til að lenda rétt ofan við vegalengdina, með því að snúa við í síðasta hring á drykkjarstöðinni sem var 2 mílur frá upphafsreit. Við vorum á skógarstígum, upp og niður trail, moldar-eða malar stígar.

 

Garmin mældi leiðina 26,29 mílur og tímann 6:26:38
Þetta maraþon er nr 158

 

Fleiri myndir á Facebook :)

Shires of Vermont Marathon 19.5.2013

Shires of Vermont Marathon
Bennington, VT USA, 19.maí 2013
http://ShiresofVermontMarathon.com

Klukkan átti að vekja okkur 4:50 en við vorum vöknuð. Ég svaf ágætlega en alla nóttina var ég að fyllast af kvefi. Gott að vera nálægt startinu og þurfa ekki að vera 40 mín í amerískum strætó til að komast á startið.

Við fórum um kl 6:20 á startið, því það var áætluð Maniac-og 50 Staters-myndataka kl 6:35. Auðvitað voru flestir af þeim sem völdu fyrra-start annað hvort Maniacs eða 50 Staters.

Það var ræst kl 7, veðrið vel hlýtt og rakt, spáð rigningu upp úr hádegi... hlaupaleiðin var mjög falleg, snyrtilegir garðar og hús við sveitavegi sem enginn á leið um nema þeir sem eiga heima þarna. Þess vegna var leiðin mjög einmannaleg.

Ég hengdi mig á hjón sem hlupu eftir Gallaway, 1 mín hlaup - 1 mín ganga. Ég hef 3 maraþon framundan næstu daga svo það þýðir ekkert að æsa sig. Þetta gekk mjög vel eða þar til löngu brekkurnar byrjuðu í kringum 10 mílu, þá týndi ég þeim.

Tvisvar á leiðinni var langur hluti leiðarinnar á möl og rigningarúði en mér tókst að klára áður en demban byrjaði. Ég komst heilu og höldnu í mark, fékk mér að borða og kaffi og tók strætó til baka þar sem Bíðari nr 1 beið samviskusamlega eftir mér :D

Garmin mældi leiðina 26,68 mílur og tímann 6:03:59
Þetta maraþon sem er nr 157 var hlaupið til heiðurs Matthíasi ömmukrútti sem er 4 ára í dag :)

Gögnin sótt í Bennington Vermont

Það var ekki mikið að gera í listasafninu í Bennington þar sem gögnin voru afhent. Þar voru nokkrir fallegir elgir - reyndar eru elgir út um allan bæ.

Ég fékk poka með ýmsum tilboðsrenningum og prufum og síðan númerið mitt 393.

Það er alveg hætt að vera með flögur, nú er nemi aftan á númerunum sem er mikið þægilegra.

Við fengum okkur að borða. Nú skal slappa af fram að hlaupi.
Það eru 2 mílur héðan á startið en hlaupið endar síðan í einhverjum bæ maraþoni fyrir norðan.

Ég hef ákveðið að taka EARLY START kl 7 eins og margir aðrir Maniac-ar og 50-States hlauparar... myndataka verður kl 6:35 en ég held það sé nóg að vakna kl 4:45 

Tacoma City Marathon WA, 5.5.2013

Michelob Ultra Tacoma City Marathon & Half-Marathon, Relay, 5K Tacoma, WA USA
5.maí 2013
http://www.tacomacitymarathon.com

Klukkan hringdi kl 3 en ég hafði ekki sofið mikið síðustu klukkustundirnar af áhyggjum yfir klukkunni, hélt hún myndi klikka af einhverjum ástæðum. Ég var búin að ákveða að byrja í fyrra startinu kl 6 og þurfti því að taka strætó um kl 5. 

Allt gekk eins og í sögu og ég var komin út 4:15... í miðbæinn um 4:30, keyrði aðeins um til finna stæði, og fann eitt rétt fyrir ofan þar sem maraþonið endar. Bussinn beið rétt hjá og keyrði okkur á upphafspunkt.

Það var frekar kalt á litla flugvellinum þar sem hlaupið byrjaði og amk hálftíma bið eftir fyrra starti. Það borgaði sig samt fyrir mig að taka það til að hlaupa klukkutíma styttra í sólinni.

Hlaupaleiðin var ný, svo enginn hafði reynslu af henni, en öllum fannst hún erfið, mikið af bröttum brekkum upp og niður. Fyrst var kalt en síðan fór hitinn upp í 80°f

ég var merkilega góð miðað við 2 erfið maraþon um síðustu helgi, en gekk samt eitthvað á leiðinni. Joe sem er með The marathon show á netinu, tók viðtal við mig á leiðinni, ég hef hitt hann nokkrum sinnum og hann hafði tekið viðtal við mig í Joplin (Mother Route 66) og er nú með nafnið mitt á besta stað á bolnum sínum :) Ég verð að muna að setja linkinn inn á síðuna.

Mér gekk ótrúlega vel, var klukkustund fljótari en í seinna maraþoninu um síðustu helgi og ég get ekki annað en verið ánægð með það. ég virðist vera að ná mér eftir þennan langvarandi vírus sem ég fékk í vor.

Eric Barnes og kona hans tóku á móti mér í markinu, hann ætlaði að hlaupa Laugaveginn i sumar en verður að fresta því til næsta sumars.

Þetta maraþon var 10 ára afmælishátíð hjá Marathon Maniac og bærinn klæddur GULU.
Þetta maraþon er nr 156
Garmin mældi það 42,44 km og tímann 5:43:18 

Gögnin sótt í Tacoma WA

Ég var í búðarrápi frá kl 8 í morgun. Expoið var opið í mest allan dag en ég vildi ekki fara of snemma, Maniac-fundurinn byrjaði kl 4. 

Var komin á staðinn kl. 2:15 og borgaði í bílastæði í 4 tíma. Þetta dróst allt fram úr hófi, fundurinn átti að byrja kl 4 en kl 5:30 var hann ekki byrjaður.
Í tengslum við þetta maraþon er haldið upp á 10 ára afmæli Marathon Maniacs.
Til að nota tímann voru dyra-vinningarnir gefnir fram í anddyri og ég held að allir hafi fengið vinning.

Maniac-inn sem tekur útvarpsviðtölin á hlaupum var í bol með nöfnum einhverra Maniac-a og mitt var á besta stað :)

Ég fór þegar bílastæðið var að renna út og brunaði heim á hótel. Tók saman hlaupagallann og stillti klukkuna á kl 3.

Gettysburg North-South Marathon 28.4.2013

2L Coaching Services Gettysburg North-South Marathon, Gettysburg, PA USA
http://www.gettysburgnorthsouthmarathon.com

28.apríl 2013

Keyrði hingað frá Delaware í gær og nennti ekki að sækja gögnin eða tékka á starti og marki í gær. Setti það bara í Garmin og sá að allt var innan 1 mílu radíus.
Klukkan var stillt á 3:40, eins gott að fara enga vitleysu núna og missa ekki af bílastæði við markið. Þegar ég skráði mig þurfti ég að velja hvort ég héldi með norðri eða suðri og ég valdi norður. 
Ég hafði vaknað mjög tímanlega, enda þurfti ég að bera mig út, tékka mig af hótelinu, borða og græja mig.

Ég var tilbúin og fór út um kl 6. Gögnin áttu að vera nálægt starti og marki en manni skildist að það væri eitthvað lítið um bílastæði þarna. Þarna hittust margir maniacar sem hlupu í DE í gær - aðalspurningin var ,,Hvað fórstu oft á hausinn í gær"

Ég hafði ekkert spáð í leiðina en það höfðu hinir gert því þetta var víst ný leið. LANGIR og LEIÐINLEGIR margra mílna langir sveitavegir með ROLLING HILLS. Ekki gott eftir erfitt trail-maraþon.

Ég kom mér fljótlega upp kerfi - ganga upp, skokka niður... ég var merkilega góð í upphafi en síðan þreyttist ég fljótt og beið bara eftir að klára þetta blessaða maraþon. Ég hljóp fram á tvær stelpur sem voru farnar að ganga og skokka til skiptis og þær buðu mér með...

Við bættum síðan öllum í hópinn sem við hlupum fram á, sumir voru orðnir mjög sárir eins og ég. Við kláruðum samt saman... Í markinu fengum við að vita að "norður" hafði verið dregið út og allir sem völdu það fengu áletrað glas.

Gettysburg Maraþonið mældist  26,5 mílur eða 42,6 km og tíminn 6:43:58
Þetta maraþon er nr 155 og eitt af þessum sem er nóg að fara ,,ONCE IN A LIFETIME" 

Strax eftir hlaupið keyrði ég til Mount Laurel í New Jersey :)