Hrikalega duglegar stelpur

Soffía skrifaði í athugasemdir hvað hún hljóp... glæsilegt,  verð að redda mynd af henni.  

Ég er búin að fá sms frá Þórdísi og Rannveigu, báðar búnar að hlaupa í dag.  það er ekkert sem stoppar þessar gellur .... en ég geyspa bara og langar mest undir sæng.  Hvað er að gerast ? 

Ég held ég láti það bara eftir mér að vera heima og ná þessu sléni úr mér.  Gallinn við að vera heima.. er að maður slappar ekki af.... af því að ég er eftir á í lestri og les í kapp við tímann.... hraðar en minniskubburinn tekur við, sem er ekki nógu hagstætt.

En dagurinn í dag kom eftir gærdaginn og ég býst við að það komi annar dagur á morgun... það klikkar ekki frekar en vanalega.

Hljóp ekki í dag...

Þórdís hringdi, hún var búin að hlaupa, ég fékk fréttir af hinum... þær eru allar svo duglegar, hreinustu hetjur... ég er ábyggilega sú eina sem hljóp ekki í dag.  Mér leið eitthvað svo asnalega, vona að ég sé ekki að verða veik....

En hvað sem því líður, þá reynir maður að hetjast líka, lesa og standa sig í náminu, það kemur annar dagur eftir þennan dag.... það hefur ekki klikkað fram að þessu...

Frábært hlaup

Við gerðum eins og síðasta sunnudag, hlupum heiman frá Þórdísi og allt öfugt í dag.  Við vorum 3, Þórdís, Rannveig og ég.  Ég veit að Soffía ætlaði austur eh og fór enn fyrr af stað eða kl 8.... og hefur væntanlega hlaupið 20 km eins og við.  Anna Rós og Magga fóru 19 km. 

Þannig að glæsilegra getur þetta varla verið.  Veðrið var frekar kalt, mælirinn í bílnum sagði 2 °C  en það hvorki rigndi eða snjóaði.... frekar hlýnaði. 

Það er frábært að byrja fyrr þegar við förum langt til að vera búnar fyrir hádegi.... ekki spurning.... að gera það líka næsta sunnudag þegar við eigum að hlaupa 28 km. 

11.vikan

Nú breytum við til Byltur.  6 vikur eru þar til við hlaupum úti í DC... við getum þetta með bros á vör.    Ég set frí á mánudögum aftur, en ef þið getið ekki hlaupið á þr. miðv. eða fimmt. þá hafið þið tækifæri til að nota mánud. í staðinn.  Við skulum reyna að halda okkur við 5 daga í viku.  Ef það er of mikið... þá er hægt að ganga kraftgöngu, hjóla eða synda einn dag í viku.   En hér kemur planið....

sunnudagur...... 16.sept..... 20 km.    Garðabær, Hafnarfjörður, Álftanes  (mæli með að fara kl. 9)

mánudagur ............... frí

þriðjudagur ............... 8 km     Setbergshr. m/lengingu

miðvikudagur ...........  12 km    Garðabær   m/Hrafnistu

fimmtudagur ............   7 km     Ásland / brekkur

Föstudagur ..............   frí

laugardagur .............. 7 km      Norðurbær

Ég vona að það léttist brúnin á okkur, hittumst hressar og glaðar ... Við getum þetta.

Breyttar áherslur...

Sem betur fer erum við sveigjanlegar.... Byltur ! nú verður breytt til. 

Ég finn að.. nú þegar vegalengdir eru farnar að þyngjast... að hlaupagleðin er farin að fjúka út í buskann, kílómetrarnir eru orðnir að skyldu og tímaþröng spennir okkur og kemur fram í auknum hraða, sem er líka farinn að þreyta okkur. 

Þar sem við erum ekki að fara á Ólympíuleikana eða á heimsmeistaramót, ætla ég að leyfa mér að breyta prógramminu, gefa okkur meiri tíma, hægja aðeins á okkur og vonandi fá hlaupagleðina aftur.

Ég veit að konur voru með væntingar og vilja til að hlaupa á undir 5 tímum í Washington DC..... og við getum það alveg.... þó við breytum um.  Við græðum ekkert á því að fara út útkeyrðar eða hálf-laskaðar. 

Á morgun föstudag er frí.  Þær sem hafa ekki hlaupið eftir prógramminu og vilja hlaupa á laugardag, gera það, en frá sunnudegi kemur ný vika, sem verður aðeins léttari.    

Við ætlum að hafa gaman að þessu..... það er markmiðið, er það ekki !

Svaf varla....

Ótrúlegt ... ég svaf varla fyrir þessum lægsta punkti sem ég setti inn í Reykjavíkurmaraþoni... fór inn á grafið aftur og reyndi að hitta nákæmlega á lægsta punkt.... sem sagði að á 31,2 km væri hæðin -46 metrar.... og ég held að þetta geti bara ekki staðist, en ég er auðvitað enginn sérfræðingur.   

Spurning hvort maður ætti að gera sér leið þangað til að mæla hæðina aftur.... að vísu sýnir grafið að maður hlaupi í sjónum, en það ætti ekki að skipta máli.

Því miður komst ég ekki að hlaupa í dag, var eitthvað stíf í annarri hásininni eftir Setbergshringinn og er því ekkert að æsa mig í dag, það hlýtur eitthvað að gefa eftir... þegar maður æfingalaus fer maraþon 3 helgar í röð og byrjar á 20 km æfingu. 

En það er ekki málið ef maður hefur bara hlustunarpípuna á skrokknum og tekur mark á þeim óhljóðum... hvers konar kvarti og kveini sem maður heyrir.

7 glæsilegar

Það mættu þrjár nýjar konur í dag ... ég ræsti minniskubbinn, en hann er svolitla stund að hitna... svo ég man ekki hvað þær heita.  Svo komu Rannveig, Ingileif og Þóra Hrönn þannig að við vorum sjö.  Við fengum frábært veður...... svo blessaðar.  Fórum Setbergshringinn sem er 6 km. ég náði mér í aukakm. með því að hlaupa niður að Lækjarskóla.

ATH. engin þeirra ætlar að hlaupa á morgun (þriðjudag)

Þegar ég kom heim þurfti ég að hlaða úrið og þá kíkti ég á síðustu maraþon um leið.  Var svona að bera þau saman.  Úrið mælir víst hæð yfir sjávarmáli... sem ég hafði ekki tekið eftir fyrr.

Í Reykjavík...var byrjunarhæð 4 metrar.... fór hæst í 15 metra og lægst í -50 metra.

Í Wyoming var byrjunarhæð 2146 metrar.... fór hæst í 2618 metra og lægst í 1854 metra.

Í New Mexico var byrjunarhæð  1744 metrar... fór hæst í 1843 metra og lægst í 1466 metra.

Þetta segir ekki alla söguna en gefur nokkra hugmynd um þær hremmingar sem ég hreppti í þessum hlaupum...   Að hugsa sér að maður skuli þar að auki borga stórfé fyrir.   

Hvað sem því líður er Bíðari nr.1 farinn að pæla í komandi ferðum.  Spurning hvort tillögur hans verði ekki rækilega ritskoðaðar héðan í frá.  

Alltaf svo blessaðar

Ég sendi sms á hópinn í gærkvöldi.

Þórdís var sú eina sem svaraði að hún ætlaði að hlaupa.... og það hentaði henni að fara kl. 9.  Við hlupum þess vegna heiman frá henni.... hringurinn varð alveg nýr við þetta, bæði var hann hlaupinn öfugt og byrjað ,,inn í honum miðjum"

Við fengum frábært veður, við erum alltaf svo blessaðar með veður.  Við hlupum nákvæmlega 20 km. eins og planið sagði..... frábært

Hundarnir hennar Þórdísar fögnuðu okkur, þeir voru ekki með rós..... það er spurning hvort hún ætti að skipta yfir í kétti ??? 

10. vikan í planinu

Fyrirgefið kæru Byltur, ég svaf yfir mig í dag.... mætti ekki í hlaupið í morgun... ég er á kolvitlausum tíma.  En nú er ekkert sem heitir... næsta vika bíður, byrjum á morgun af fullum krafti.

sunnudagur   9.sept........ 20 km

mánudagur ..................... 10 km

þriðjudagur .....................   8 km

miðvikudagur .................. 14 km

fimmtudagur ................... 10 km

laugardagur ...................    6 km

Ekkert að gefa eftir...... Hverjar mæta á morgun kl 10 ? ég lofa að mæta.... MUNIÐ AÐ MÆTA MEÐ DRYKK....... Hverjar eru bestar ?  SVAR: Byltur

Komin heim

 

Við komum eldsnemma.  Það var strax rokið í að taka upp úr töskum og ganga frá.  Var síðan mætt í skólann fyrir hádegi..... var allan daginn að gæla við að hlaupa með ykkur brekkurnar kl 18, en af því að ég kom ósofin úr fluginu.... þá nennti ég ekki,    ... þið verðið að fyrirgefa ...

Hmmm.... En á laugardaginn verður ekki til afsökun, hvað sem ég þarf að lesa mikið fyrir skólann .... MÍNAR KÆRU BYLTUR, þá skal hlaupið eftir prógramminu um helgina. 

Hverjar ætla að mæta kl 10 ?