Gögnin sótt í Texas fyrir "End of the World Marathon"

Eins og sést á hinni bloggsíðunni þá gekk ferðalagið hingað ekki snurðulaust fyrir sig. En við erum komin til Humble Texas og verðum hér í 2 vikur.
Eftir hádegið í dag sóttum við gögnin fyrir maraþonin næstu tvo daga. Á morgun er ,,End of the World Marathon" og hinn daginn verður ,,Day after the End of the World Marathon".

Eftir að hafa sótt gögnin fengum við okkur að borða á Golden Corrall og fórum á hótelið... tími til að taka það rólega.

Á hausnum

Vala var veik, svo ég fór ein út eh og hljóp suður fyrir Straumsvík...

Ég vandaði mig mjög því það var aðeins hálka en á leiðinni til baka, þegar ég beygði inn í hverfið fór ég á hausinn. Ó eins og ég ætlaði ekki að detta NÚNA, akkúrat þegar ég er að fara út... EN, ég er með blóðugt margskorið hné, stórt mar og skurði framan á sköflungnum og rifu á hendinni... meiri óheppnin þetta - en það er ekkert annað en að þrauka þetta af.

Vel mörkuð útilegukind 11,8 km ;D

Með Völu á mánudaginn var

Þetta er orðin ótrúlega skrítin bloggsíða... það sem ég skrifa gerðist annað hvort í gær eða fyrradag... ástæðan er að ég stend á haus -á milli ferða- það er svo margt sem ég þarf að gera á þessum 10 dögum.

Við Vala hlupum á mánudaginn... engin hálka eða neitt sem hélt aftur af okkur. Við áttum því góðan hring í myrkrinu. Það var aðeins kalt en ekkert til að gera VEÐUR út af... hehe...

Ég var eitthvað í rugli með klukkuna en Hrafnistan er alltaf eins 12,5 km  

Las Vegas Marathon 2.des.2012

Zappos.com Las Vegas Marathon & Half Marathon
Las Vegas, NV USA 2. Dec. 2012
/runrocknroll.competitor.com/las-vegas

Maraþonið byrjaði kl 3 eh... Nú þurfti ekki að vakna um miðja nótt. Við erum enn á vitlausum tíma hér og svo svaf ég ekkert svo vel, þannig að við vorum orðin dauðþreytt áður en maraþonið var ræst. 

Maniac-myndatakan var við Welcome sign Las Vegas kl 11:30 

Ég hafði ekki tekið eftir því fyrr en eftir að ég skráði mig að tímatakmörkin voru 4:30 - frá síðustu yfir ráslínu... sem er ekki nálægt mínum tímum undanfarið. það var ekkert annað að gera en að hafa plan B ef ég þyrfti að taka skerðingu/styttingu. 

Hlaupið var ræst á réttum tíma og ég svindlaði mér í hólf nr. 2 til að bæta við tímann sem ég hefði til umráða. Plan B var að bæta þeim mílum sem vantaði við eftir að ég væri komin í mark - til að maraþonið væri fullgilt.

Við fórum af stað í björtu en 4:15 er komið myrkur í Vegas. Lýsingin var góð í miðbænum en annarsstaðar voru einstaka kastarar til að sýna misfellur í götunum. Mér gekk nokkuð vel til að byrja með en síðan gerði æfingaleysið vart við sig... og ég fór að ganga aðeins á milli...  

Hinni auglýstu leið hafði verið breytt, það var kynnt í expo-inu og ég sá hvernig þeir styttu leiðina með því að loka fyrir einstaka botnlanga á ákveðnum tímapunktum. Ég lenti í einni þannig styttingu í bakaleiðinni, 3 mílur voru skornar af leiðinni... sem ég bætti upp eftir að ég kom í mark.

Lúlli áttaði sig ekki á því að ég gæti komið í mark undir 5 tímum og við fórum þess vegna á mis... Á meðan ég bætti mér upp mínar mílur, gekk hann óvart í öfuga átt að bílastæðinu, þar sem við ætluðum að hittast ef við sæjum ekki hvort annað við markið eða þar sem maður gengur út af mark-svæðinu og hann endaði með að ganga um 10 mílur samtals um daginn og ætti nú að fá pening fyrir það 

Garmin mældi leiðina 22,9 mílur og tímann 4:47:04
og ég bætti við 3,3 mílum og tímanum 44:23.... samt. 5:31:27

Las Vegas var 5. Rock´N´Roll maraþonið mitt á þessu ári og ég fékk sérstakan verðlaunapening fyrir það... Now I´m a Rock-Star 

Gögnin sótt í Las Vegas 1.des. 2012

Við sóttum gögnin á Venetian, Sands Expo... og það var nú bara maraþon út af fyrir sig að ganga alla þessa hringi og ganga frá bílastæðahúsinu í expo-ið. Það var stórt og mikið expo og ég skannaði hvort það væri eitthvað spennandi til sölu - hefði keypt pin-merki hlaupsins en það var svo löng röð að ég sleppti því.

Síðan keyrðum við til Lilju og Joe og þar var dekrað við okkur. Maraþonið byrjar kl 3 eh... svo ég þurfti ekki að fara snemma að sofa.

Ég er nr 55527

Fljúgandi hálka

Ég hitti Völu við Sjúkraþjálfarann og við hlupum okkar kæra Hrafnistuhring. Það var frost en við gátum brosað það af okkur... enda logn. Ég var á amerísku snilldar broddunum mínum er Vala var á skautum... eða þannig lagað. Það ætti að BANNA þessa gorma - þeir virka eins og skautar. 

Á morgun flýg ég til Denver og síðan til Los Angeles og keyri þaðan til Santa Barbara og svo eftir 2 daga til Las Vegas. Ég er að hala inn FIMMTA Rock'N'Roll-inu á þessu ári...

Þetta er sería sem mig hefur lengi langað til að taka en af því að þetta er svo dýrt - fer ég ekki fleiri en 5 hlaup á árinu.

Hrafnistan í dag... 12,5 km eins og venjulega  

Allt í góðum gír

Vá hvað maður er blessaður  í bak og fyrir. Við Vala hlupum Hrafnistuna eftir myrkur, komum við hjá öndunum því Vala var með brauð 

Það var búið að spá brjáluðu veðri en við vorum bara í Mallorca-fílingi... svo heitt og kósý í öllum þessum fötum... ég held ég hafi aldrei hlaupið eins mikið klædd - í eins góðu veðri... Það besta var að við gleymdum okkur gjörsamlega - hefðum getað farið 2 hringi óvart hehe...

Hrafnistan 12,5 km með sælusvip  

Allt í lagi :D

Til að sleppa allri óvissu um hlaup með Völu í þessari viku, þá ákvað ég að prófa mig í dag... Það var nístingskuldi og vindur. Málið var að hlaupa í björtu, hægt og rólega og ætla ekki of langt. 

Ég lagði af stað innan hverfisins en leið svo vel að ég endaði með að fara að afleggjaranum að Straumi og til baka. Ég lagði af stað á broddum en Reykjanesbrautin var auð svo ég tók þá undan. Ég er bara sátt við útkomuna og vona að allt sé komið í samt lag... og ég til í slaginn með Völu á miðvikudag.

9,2 km í næðings-frosti :D 

Æj... ekki núna...

Við Vala hittumst MJÖG hressar rétt fyrir kl 5 og skuttluðumst Hrafnistuhringinn okkar í góðum gír... þar til við vorum við endann á Fjarðargötunni  þá fékk ég sting í hægri mjöðm og verk niður allan fótinn... ég skaut strax á að ég hefði klemmda taug... þetta var sárt. Eftir smá stund ákvað ég að reyna að skokka hægt áfram og hafa slaka á fætinum og það hafði góð áhrif... en ég var hölt alla leiðina heim.

Æj... ekki núna sagði ég, ég var að enda við að segja Völu að ég væri nú skráð í 5 maraþon... Nú er bara að bíða, biðja og slaka aðeins á - svo ég nái mér.

Hrafnistan 12,5 km og heitar bænir um bata 

Geðveikt að gera...

Þetta er hlaupadagbókin mín... svo það er betra að muna eftir að skrásetja gjörðirnar... í gær hljóp ég Hrafnistuhringinn ein, Vala var upptekin við annað og komst ekki. Kannski hleypur hún með mér á morgun í staðinn...

Veðrið var gott en í fyrsta sinn í haust fann ég fyrir myrkrinu... ég hef verið að hlaupa um miðjan daginn og sloppið við það. Það var hlýrra en ég hélt og var því overdressed...

Hrafnistan með bros á vör 12,5 km