Tveir fyrir einn...

Á miðvikudaginn hljóp ég Hrafnistuhringinn snemma og ein því við Vala gátum ekki hlaupið saman kl 6. Veðrið var ágætt og gott að fara hringinn snemma.

Hrafnistan 12,5 km

Í dag hljóp ég eftir Reykjanesbrautinni þar til kaldur vindur var farinn að hafa áhrif á mig... þá snéri ég við og var komin í skjól fyrir vindinum eftir smá stund, þetta er besta áttin í Hafnarfirði.
Þetta var bara hressandi :D

12,8 km í dag... 

Eins og hundur af sundi...

Ég hef ekkert skrifað síðan ég hljóp Haust-maraþonið... En ég hljóp 13 km með Völu mánudaginn 29 okt... frekar hratt hlaup en gott... síðan hætti ég mér út í brjáluðu veðri 1.nóv... ég vissi að það væri sama í hvaða átt ég myndi hlaupa - ég myndi fjúka aðra leiðina og berjast móti vindinum hina leiðina... en þann daginn tók ég fram nýja skó - tilbúin að fara aðeins styttra í tilkeyrslunni (9 km).

Í dag hljóp ég upp Krísuvíkurveginn, upp að "mottu" sem er ákveðinn staður hjá mér... Það var slagveðurs-rigning og nokkur vindur en hann var á hlið báðar leiðir. Ég hefði ekki getað verið blautari þó ég hefði dottið í sjóinn þegar ég kom heim...

En 14 km í dag - bara gott  

Haustmaraþon FM 20.10.2012

Ég skráði mig á fimmtudaginn, fékk leyfi til að fara fyrr af stað eins og svo oft áður. Fór því snemma að sofa í gær... en get ekki sagt hvenær ég loksins sofnaði.

Klukkan var stillt á 3:45 og þá sveiflaði maður sér framúr... Eftir frekar stuttan undirbúning var rokið út í bíl og ég hljóp af stað um kl 5... Það var svarta myrkur og hálka á göngustígum eftir kvöldrigninguna.

Það var ekkert annað í boði en að láta sig hafa það - ég er á landinu ;)

Á meðan að myrkrið var, fann ég minna fyrir hálkunni... en ég þarf nú að rannsaka hvaða bæjarfélag ætti að lýsa upp göngustíginn á Ægissíðunni... Hvílíkt myrkur, ég reyndi eins og ég gat að sjá göngustíginn en sá ekki einu sinni fæturna á mér... og óttinn við að detta gerði mig stjarfa... eftir að sólin kom upp og margar -næstum-því-byltur- varð ég að færa mig út fyrir göngustíginn.

Ég þakkaði Guði vel og lengi að komast heil í mark.
Þetta maraþon er nr 148
Garmin mældi vegalengdina 42,59 km og tímann 5:37:51 

Það var óvænt ánægja að fá bikar  en það er örugglega bara af því að þær eru allar í útlöndum  

Vala veik...

Vala lét mig vita snemma svo ég gæti farið þegar ég vildi... það var ágætt. Ég hljóp upp að Hvaleyrarvatni og til baka... Veðrið var gott, sólskin og nær logn... það var aðeins svalt... en gott.

Náði að fara 9,1 km, sátt með það   

Krísuvíkurvegurinn :)

Mér leist ekkert á rigninguna fyrri part dagsins í gær og fór því ekki út fyrr en um hálf 4. Leiðin lá upp Krísuvíkurveginn... hljóp 7 km uppeftir til að ná amk 14 alls. Það hékk þurrt allan tímann og bjart... hvað verður það lengi ?

En hlaupið var bara gott... 14,04 km og ég bara sæl með það :)  

Með Völu í grenjandi rigningu

Við þurfum að skipta um dag í þessari viku því Vala var í Berlín um helgina... Það var grenjandi rigning í allan heila dag... kannski rigndi eitthvað aðeins hægar á meðan við hlupum amk var rigningin ekki til trafala. Við höfðum nóg að tala. Hrafnistuhringurinn var farinn eins og vanalega - og maður tók varla eftir leiðinni... hehe... bara sett í gír og síðan er þetta sjálfvirkt

Hrafnistan 12,5 km  

Endalaus gleymska í gangi

Ég gleymdi að skrifa að ég hefði hlaupið Hrafnistuhringinn á föstudag... nú er ég með nýtt úr og það mældi hringinn 12,5 km en stundum vantaði km upp á mælinguna á því gamla... því var eitthvað farið að förlast... 

Vala er í Berlín... Í dag hljóp ég að Voga-merkinu sunnan við tvöföldunina á Reykjanesbrautinni. Veðrið var ágætt, fékk vindinn á móti suðureftir og því þægilegt að hafa hann í bakið á leiðinni til baka. Vegalengdin mældist 14,7 km... jájá, bara ágætt :D 

Kalt í dag...

Ég gleymdi að skrifa um okkur Völu á mánudaginn, en þá hitti ég hana eins og dagskráin kveður á um... það var frábært veður þá og við nutum okkar, höfðum ekki hist í 2 vikur... það koma nefnilega göt í mánudagana okkar þegar ég er einhversstaðar úti að hlaupa. Við fórum Hrafnistuhringinn okkar.

Í dag hljóp ég ein upp Krísuvíkurveginn, rétt upp fyrir Bláfjallaafleggjarann... Maður minn það var kalt úti... vindurinn var í bakið upp eftir en í fangið á leiðinni til baka.

Náði að fara 11,8 km í dag :) 

Rock N Roll Denver Marathon 22.9.2012

Rock N Roll Denver Marathon & Half-Marathon, Relay Denver, CO USA, 22. Sept. 2012.
http://runrocknroll.competitor.com/denver 

 

Maraþonið var ræst kl. 7:15... sem þýddi að ég varð að stilla klukkuna á 4:00. 

Við erum auðvitað á kol-vitlausum tíma hérna, svo það þurfti ekki að berja mig í rúmið milli kl 6 og 7... og ég svaf ágætlega.
Við vöknuðum öðru hverju í nótt en gátum bæði sofnað aftur og vorum vöknuð áður en klukkan hringdi. 

Hinn venjulegi undirbúningur tók stuttan tíma, morgunmatur og tær teypaðar, föt, skór, númer og fylgihlutir - allt á sínum stað. Það eina sem var óvenjulegt er að við höfðum ekki farið á staðinn, bílastæðahúsið þar sem okkur var sagt að geyma bílinn.
Við hefðum kannski betur gert það - það var 2ja mílna löng ganga á startið... það voru laus stæði á leiðinni, sem hefðu verið í göngufæri frá starti og marki fyrir Lúlla.... En hlaup sem hafa upphafs-og endapunkt í miðju borga, skarta ekki stórum bílaplönum í næsta nágrenni og svo eru allar götur yfirleitt lokaðar í kring.

Ég hitti 3 Maniacs, Bob, Steve og Margaret fyrir hlaup og missti af hópmyndatöku, en hitti síðan einhverja fleiri á leiðinni. 

Bíðari nr 1, beið sem sagt við markið ALLAN tímann... ætti að fá verðlaunapening fyrir það ;) og honum var hætt að lítast á blikuna - ég var svo lengi.

Maraþonið hafði 6 tíma takmörk og ég var búin að segja Lúlla að ég myndi sennilega nota allan þann tíma. Denver er "the mile high city" sem sagt í 1642 metra hæð yfir sjávarmáli og maður finnur fyrir lofthæðinni á göngu... og svo er það víst staðreynd að ef fólk æfir ekki - þá hefur það ekkert úthald. Ofan á allt var glampandi sól og hitinn 26°c í upphafi og endaði í 32°c 

Þetta maraþon er nr 147 hjá mér, garmurinn varð geðveikur í hlaupinu, mældi ekki fyrstu 4 km... mældi 38,66 km eða frá því er ég skipti yfir í mílur... en hann klikkaði ekki á tímanum 6:24:46 

Gögnin sótt í Denver

Við flugum inn í gær, vöknuðum alltof snemma, versluðum aðeins í morgun og sóttum gögnin eftir hádegið... Expo-ið var í Convention Center og það var ekkert smá mál að fá stæði einhversstaðar... Mér var hætt að lítast á þetta því maraþonið byrjar á þessum bletti.

Expo-ið var nokkuð stórt... það eina sem ég keypti eins og svo oft áður, var pin-merkið... Það eru ekki öll maraþon með merki en ég kaupi þau sem eru til sölu... Við komum hins vegar út með fulla poka af góssi... mest af pakka-pökkuðum túnfiski.

Ég fékk nokkuð góðar upplýsingar um hvar bílastæðin verða og hvernig á að komast þaðan á startið. Ég verð nr. 13116.  Nú er bara að hvíla sig og reikna út hvenær maður þarf að vakna og koma sér af stað :)