Gögnin sótt í Bennington Vermont

Það var ekki mikið að gera í listasafninu í Bennington þar sem gögnin voru afhent. Þar voru nokkrir fallegir elgir - reyndar eru elgir út um allan bæ.

Ég fékk poka með ýmsum tilboðsrenningum og prufum og síðan númerið mitt 393.

Það er alveg hætt að vera með flögur, nú er nemi aftan á númerunum sem er mikið þægilegra.

Við fengum okkur að borða. Nú skal slappa af fram að hlaupi.
Það eru 2 mílur héðan á startið en hlaupið endar síðan í einhverjum bæ maraþoni fyrir norðan.

Ég hef ákveðið að taka EARLY START kl 7 eins og margir aðrir Maniac-ar og 50-States hlauparar... myndataka verður kl 6:35 en ég held það sé nóg að vakna kl 4:45 

Aftur stutt á milli ferða

ég kom heim á þriðjudagsmorgni 7.maí og var ótrúlega lengi á öfugum tíma... það er svo mikill munur við Seattle.

  8.maí hjólaði ég í Reykjavík og fl samtals 39,2 km
13.maí Hljóp Hrafnistuhringinn í góðum gír með Völu, veðrið var gott og við góðar.
14.maí fór ég á Helgafell með elstu krökkunum í æskulýðsstarfinu. Fengum frábært veður þó það væri aðeins kaldur blástur.

Í dag hjólaði ég 10,3 km... niður í bæ og eitthvað fleira í frábæru veðri... en var smá vindkæling.

Á morgun flýg ég til Boston og verð 9 daga í hlaupaferð um VT, NH, RI og MA.

Tacoma City Marathon WA, 5.5.2013

Michelob Ultra Tacoma City Marathon & Half-Marathon, Relay, 5K Tacoma, WA USA
5.maí 2013
http://www.tacomacitymarathon.com

Klukkan hringdi kl 3 en ég hafði ekki sofið mikið síðustu klukkustundirnar af áhyggjum yfir klukkunni, hélt hún myndi klikka af einhverjum ástæðum. Ég var búin að ákveða að byrja í fyrra startinu kl 6 og þurfti því að taka strætó um kl 5. 

Allt gekk eins og í sögu og ég var komin út 4:15... í miðbæinn um 4:30, keyrði aðeins um til finna stæði, og fann eitt rétt fyrir ofan þar sem maraþonið endar. Bussinn beið rétt hjá og keyrði okkur á upphafspunkt.

Það var frekar kalt á litla flugvellinum þar sem hlaupið byrjaði og amk hálftíma bið eftir fyrra starti. Það borgaði sig samt fyrir mig að taka það til að hlaupa klukkutíma styttra í sólinni.

Hlaupaleiðin var ný, svo enginn hafði reynslu af henni, en öllum fannst hún erfið, mikið af bröttum brekkum upp og niður. Fyrst var kalt en síðan fór hitinn upp í 80°f

ég var merkilega góð miðað við 2 erfið maraþon um síðustu helgi, en gekk samt eitthvað á leiðinni. Joe sem er með The marathon show á netinu, tók viðtal við mig á leiðinni, ég hef hitt hann nokkrum sinnum og hann hafði tekið viðtal við mig í Joplin (Mother Route 66) og er nú með nafnið mitt á besta stað á bolnum sínum :) Ég verð að muna að setja linkinn inn á síðuna.

Mér gekk ótrúlega vel, var klukkustund fljótari en í seinna maraþoninu um síðustu helgi og ég get ekki annað en verið ánægð með það. ég virðist vera að ná mér eftir þennan langvarandi vírus sem ég fékk í vor.

Eric Barnes og kona hans tóku á móti mér í markinu, hann ætlaði að hlaupa Laugaveginn i sumar en verður að fresta því til næsta sumars.

Þetta maraþon var 10 ára afmælishátíð hjá Marathon Maniac og bærinn klæddur GULU.
Þetta maraþon er nr 156
Garmin mældi það 42,44 km og tímann 5:43:18 

Gögnin sótt í Tacoma WA

Ég var í búðarrápi frá kl 8 í morgun. Expoið var opið í mest allan dag en ég vildi ekki fara of snemma, Maniac-fundurinn byrjaði kl 4. 

Var komin á staðinn kl. 2:15 og borgaði í bílastæði í 4 tíma. Þetta dróst allt fram úr hófi, fundurinn átti að byrja kl 4 en kl 5:30 var hann ekki byrjaður.
Í tengslum við þetta maraþon er haldið upp á 10 ára afmæli Marathon Maniacs.
Til að nota tímann voru dyra-vinningarnir gefnir fram í anddyri og ég held að allir hafi fengið vinning.

Maniac-inn sem tekur útvarpsviðtölin á hlaupum var í bol með nöfnum einhverra Maniac-a og mitt var á besta stað :)

Ég fór þegar bílastæðið var að renna út og brunaði heim á hótel. Tók saman hlaupagallann og stillti klukkuna á kl 3.

Gettysburg North-South Marathon 28.4.2013

2L Coaching Services Gettysburg North-South Marathon, Gettysburg, PA USA
http://www.gettysburgnorthsouthmarathon.com

28.apríl 2013

Keyrði hingað frá Delaware í gær og nennti ekki að sækja gögnin eða tékka á starti og marki í gær. Setti það bara í Garmin og sá að allt var innan 1 mílu radíus.
Klukkan var stillt á 3:40, eins gott að fara enga vitleysu núna og missa ekki af bílastæði við markið. Þegar ég skráði mig þurfti ég að velja hvort ég héldi með norðri eða suðri og ég valdi norður. 
Ég hafði vaknað mjög tímanlega, enda þurfti ég að bera mig út, tékka mig af hótelinu, borða og græja mig.

Ég var tilbúin og fór út um kl 6. Gögnin áttu að vera nálægt starti og marki en manni skildist að það væri eitthvað lítið um bílastæði þarna. Þarna hittust margir maniacar sem hlupu í DE í gær - aðalspurningin var ,,Hvað fórstu oft á hausinn í gær"

Ég hafði ekkert spáð í leiðina en það höfðu hinir gert því þetta var víst ný leið. LANGIR og LEIÐINLEGIR margra mílna langir sveitavegir með ROLLING HILLS. Ekki gott eftir erfitt trail-maraþon.

Ég kom mér fljótlega upp kerfi - ganga upp, skokka niður... ég var merkilega góð í upphafi en síðan þreyttist ég fljótt og beið bara eftir að klára þetta blessaða maraþon. Ég hljóp fram á tvær stelpur sem voru farnar að ganga og skokka til skiptis og þær buðu mér með...

Við bættum síðan öllum í hópinn sem við hlupum fram á, sumir voru orðnir mjög sárir eins og ég. Við kláruðum samt saman... Í markinu fengum við að vita að "norður" hafði verið dregið út og allir sem völdu það fengu áletrað glas.

Gettysburg Maraþonið mældist  26,5 mílur eða 42,6 km og tíminn 6:43:58
Þetta maraþon er nr 155 og eitt af þessum sem er nóg að fara ,,ONCE IN A LIFETIME" 

Strax eftir hlaupið keyrði ég til Mount Laurel í New Jersey :) 

Church Triple Crown Trail Marathon, Newark DE 27.4.2013

Head of Christiana Presby. Church Triple Crown Trail Marathon & Half Marathon, 10K, 5K Newark, DE USA

27.apríl 2013

http://www.udel.edu/johnmack/traildawgs/tc

Maraþonið sem ég ætlaði ALDREI að hlaupa - það hljóp ég í dag. Ég man þegar ég var að leita að maraþoni í Delaware sem síðasta fylkinu - þá féllust mér hendur þegar ég las lýsinguna á þessu utanvega-hlaupi. Ég hafði greinilega gleymt því... Nú hef ég komist að því að hvert orð var satt.

Það var ekkert expo, númerið bara afhent við startið. 
Ég hafði tékkað á staðsetningunni daginn áður... ekki gott að fara á rangan stað og missa af hlaupinu fyrir það. Ég fór snemma að sofa og svaf ágætlega.

Klukkan var stillt á 5, græjaði mig og var búin að tékka mig út af hótelinu kl. 6:15.

Maniacar voru búnir að ákveða tíma fyrir grúppumynd. Það var hægt að velja um hálft, heilt, 10 km eða 5 km.
Hlaupið var ræst kl 7:40...
Þeir sem fóru heilt fóru tvo geðveikis-hringi. Hlaupið var eftir troðningum sem voru stórhættulegir þegar maður fór að þreytast. Rætur trjánna og grjótnibbur stóðu upp úr götunni.
Ég fór á hausinn í fyrri hringnum, meiddi mig sem betur fer ekki.

Við héldum hópinn mörg í fyrri hring, því oft var aðeins hægt að vera í einfaldri röð. Leiðin var rosalega erfið, ekkert nema brattar brekkur upp og niður og 4 sinnum á leiðinni þurfti að vaða á í hné. Skórnin voru ekki fyrr orðnir þurrir en maður þurfti að vaða aftur. Sumstaðar þurfti að klofa yfir fallna trjádrumba. Maður minn hvað ég átti fullt í fangi með að fylgjast með því að villast ekki í öðrum hring (Á leiðinni út voru rauðar merkingar en til baka bláar.) þegar ég var orðin ein en síðustu 5 km vorum við tvær saman.

Þetta maraþon er nr 154
Maraþonið mældist 27,3 mílur eða 43.5 km á mínu Garmin og tíminn 7:33:08
NEVER AGAIN 

Eftir hlaupið keyrði ég beint til Gettisburg PA - annað maraþon á morgun :)

Skýrsla mánaðarins ;)

Það liggur við að ég skammist mín fyrir hvað ég hef lítið hlaupið... og hef sjaldan eða aldrei verið skráð í eins mörg maraþon og einmitt núna. Þó ég hafi ekki haldið mína skýrslu eins og ég hef ætlað þá hef ég samt hreyft mig aðeins úr stað undanfarið.

3. apríl hjólaði ég 43,2 km eftir Reykjanesbrautinni,
4. apríl hjólaði ég 13,7 km um Vogana, setti meðal annars upp ratleik fyrir krakkana í æskulýðsstarfinu.
5. apríl hljóp ég 8,5 km, ein og óbeisluð út á Langeyri og til baka.
8. apríl hljóp ég 12,5 km með Völu, Hrafnistuhringinn :)
13. apríl hljóp ég  13,1 km, upp Krísuvíkurveginn
15. apríl hljóp ég 12,5 með Völu, Hrafnistuhringinn,
21. apríl hjólaði ég 26 km eftir annasama viku,
22. apríl hljóp ég 12 km með Völu 

Auðvitað er þetta ekki nóg, ég þarf að æfa meira, en ég er alls ekki búin að ná mér eftir vírusinn sem ég fékk í vor. Ég er enn svo andstutt og þreytt.

Sumarið er handan við hornið :)

Vá hvað það er mikill munur hvað það birtir snemma og er bjart lengi. Í gær fór ég aðeins of seint út að skokka... og var aðeins of lengi, munaði engu að ég kæmi of seint í æskulýðsstarfið... en þetta rétt small saman.

Í dag var verðið svo gott að við Lúlli gátum ekki stillt okkur og hjóluðum eftir Reykjanesbrautinni, næstum að Vogum...

2.apríl - 12 km skokk eftir Krísuvíkurvegi
3.apríl - 43,2 km hjól eftir Reykjanesbraut 

Loksins með Völu

Við Vala hlupum saman í gær, jeminn hvað ég er enn þung eftir veikindin... hrikalega þung í lungunum... ef það er nokkuð hægt að lýsa þessu ástandi. 

Við fórum Hrafnistuhringinn og veðrið var frábært.
12.5 km í dag - það er ekki tekið af manni ;) 

On the road again

ÉG vona svo sannarlega að ég komist upp úr þessum veikindum fljótlega... ég er enn með hósta öðru hverju og líður eitthvað öðruvísi en vanalega.
Síðasta fimmtudag hljóp ég upp Krísuvíkurveginn og snéri við eftir rúma 8 km... veðrið var gott og ég fór rólega, þetta var prufa sem tókst ágætlega. 

Í gær (mánudag) hljóp ég suður fyrir Straumsvík og fór lengra en ég ætlaði í upphafi, eða að skiltinu fyrir Hvassahraun... Þetta var aðeins of mikið í bili, ég er bara ekki búin að ná mér - var ótrúlega þreytt á leiðinni til baka en ánægð þegar ég kom heim.

21.mars 16 km
25.mars 16,3 km