Loksins farin að skokka

Loksins farin að skokka... eða hvað það nú heitir... ég færist alla vega úr stað ;)

Veðrið leit dásamlega vel út, út um gluggann, en það var 6°c frost þegar ég fór út en það hlýnaði eitthvað á meðan ég var úti. Ég fór suður fyrir Straumsvíkina. Þrekið er nú ekki mikið eftir nær 3 vikna stopp og veikindi. En nú mátti ég bara ekki draga þetta lengur ef ég ætla að hlaupa þessi maraþon sem ég er skráð í í apríl og maí.

Straumsvíkin 8,5 km 

Bannað að hlaupa þessa viku

Mér leist ekkert á hvað ég var stoppuð af kvefi á mánudag, svo ég fór til læknis. Hann sagði að ég væri með sýkingu í hálsi, setti mig á pensilin og bannaði mér að hlaupa í þessum kulda... Í dag er allt á kafi og ég hefði ekki farið út þó mér væri borgað fyrir það... og ég hlýt að vera orðin gömul !!! ég ætla að hlýða lækninum.

Síðastu dagar

Það er alltaf að lengjast á milli færslna. Ég hef verið uppfull af kvefi síðustu viku - ég sem fæ varla kvef en þetta kvef hefur skapað þyngsli í öndun. 

Þar sem það hefur verið mikið að gera hjá mér hefur bloggið orðið útundan... ég sem nota þetta sem hálfgerða dagbók.
21. febr. í roki og rigningu suður fyrir Straumsvík, náði þar 7 km og var fegnust að komast inn í hlýjuna heima, þegar ég kom til baka.
23.febr. fór ég hring um Ástjörnina og Vallarhverfið í roki og rigningu... fór aðeins 7 km... var að prófa hvort ég væri að lagast - en nei, ég var ekki að lagast. 
25.febr. fór ég Hrafnistuhringinn með Völu í roki og rigningu... í alvöru það þarf að skipta um veður ;) og það gekk ágætlega. 

28.febr. tók ég þríþraut á þetta, hjólaði, skokkaði og gekk samtals 18,3 km... það var rok og rigning eina ferðina enn... og ég enn með hóstann í hálsinum... og held kvefið hafi fest sig betur, eftir kuldann og bleytuna - það verður að fara að skipta um veðurlag.

Hrikalega þreytt inní mér !

Við Vala hittumst á okkar tíma og skokkuðum hringinn okkar. Veðrið var betra á meðan við vorum saman en eftir að hún fór heim, rigndi og hvessti á mig. Við fundum greinilegan mun á hvað dagurinn lengist. Núna vorum við komnar að Sjúkraþjálfaranum aftur þegar það dimmdi.

12,5 km í dag :) 

Fékk ábendingu frá bílstjóra

Ég hljóp út fyrir hádegið, það var sólskin og gott veður, samt nokkurra stiga frost. Þar sem dagurinn var svo bjartur gleymdist endurskinsvestið. Ég hljóp upp Krísuvíkurveginn og var á leiðinni til baka þegar trukkabílstjóri stoppaði og benti mér á að vera í einhverju meira sýnilegu, þ.e. endurskins... Auðvitað fellur maður alveg inn í umhverfið í öllu svörtu og skiptir þá engu hvort það sé dagur... Ég þakkaði honum fyrir ábendinguna því hún var gerð fyrir mig... 

Það var kalt ofaní lungun svo ég fór hægt og var lengi.... 12,7 km 

Bjartur hringur :)

Við Vala hlupum Hrafnistuhringinn saman. Veðrið var frábært, aðeins kalt en algerlega hálkulaust og það besta - það var bjart næstum allan hringinn. Ég held að dagurinn lengist meira í þennan enda, þ.e. fram á kvöldið, hehe... hvílíkur munur :)

12,5 km í dag :)  

Update fyrir síðustu viku

Það var extra mikið að gera hjá mér síðustu viku... ég hljóp bara tvisvar og gleymdi að blogga um það.

Á mánudaginn hittumst við Vala og hlupum Hrafnistuhringinn í ágætis veðri en mikilli hálku. Sannkallað brodda-færi. Sá hringur var og er alltaf jafn langur eða 12,5 km.

Það var síðan ekki fyrr en á laugardag sem ég komst út í hitt skiptið... þá hljóp ég á móti roki og rigningu upp Krísuvíkurveginn upp að Bláfjallaafleggjara... og þá leiðina er allt upp í móti svo það var mikill léttir að snúa við og fá vind og regn í bakið og hlaupa niður á við... Þessi leið mældist 11,7 km.

Næst er það á mánudaginn :) 

Móð og másandi

Veðrið var stillt og ekki of kalt svo ég ákvað að athuga hvernig ég væri stemmd. Röddin er að koma aftur en bara rétt svo, verð að passa mig hvernig ég beiti henni.

Það þýðir samt ekki að hanga heima og bíða... ég ákvað að taka smá anda-í-gegnum-nefið-hring. Það virkaði vel svona hálfa leiðina. Hringurinn var í kringum Ástjörnina og inn í hverfið fyrir ofan okkur. Ekkert til að tala um, hefði þurft að vera lengra en þegar maður reynir að vera skynsamur verður maður kannski ofur-skynsamur. Það góða er að ég fór út og gat neglt tvær flugur í einu höggi - því ég var að skipuleggja ratleik í huganum ;)

6,2 km í dag... lítið... en meira en ekkert ;) 

Þegjandi hás...

Ég hef ekki hlaupið í viku... síðasta miðvikudag hljóp ég ekki því mér fannst ég svo skrítin í hálsinum... og í æskulýðsstarfinu í Vogum á fimmtudagskvöldið spiluðum við Varúlf - ég var sögumaður. Á leiðinni heim uppgötvaði ég að röddin var farin...

Röddin er ekki komin enn... en ég fór samt út í dag, tók smá hring um hverfið. Það var alltof kalt til að hlaupa svona, svo hringurinn endaði í 5,4 km

Það verður bara betra næst :) 

Bara þrumu gott veður

Ég var ein í dag, hafði afboðað Völu vegna tannlæknatíma en svo þurfti tannsi að flýta tímanum og þá gat Vala ekki mætt.

Veðrið var ágætt, aðeins kalt og smá vindur... en hálkan var varasöm. Í byrjun var bjart svo ég finn að daginn er farið að lengja... og verður munur þegar það verður hægt að fara hringinn í björtu því sum staðar er erfitt að sjá veginn í myrkrinu eins og til dæmis við hafnargarðinn.

Hrafnistuhringur 12,5 km