Gögnin sótt fyrir Louisiana Marathon

LOUISIANA MARATHON
18.1.2015

Við komum í gærkvöldi til Baton Rouge og sóttum gögnin í dag fyrir maraþonið á morgun. Expo-ið var sæmilega stórt og vel sótt... ég hitti Maniac vin og dundaði mér eitthvað á svæðinu. Ég er nr 741. 

Eftir að hafa sótt gögnin fórum við á startið en markið er líka þar rétt hjá... svo komum við við í búð til að kaupa morgunmat.

Veðrið er yndislegt, sól og um 15°c hiti... ég geri ekki ráð fyrir að veðrið verði vandamál á morgun.

Þá er bara að stilla klukkuna og hafa allt tilbúið fyrir morgundaginn. 

Hlaupa-annáll fyrir árið 2014

GLEÐILEGT NÝTT HLAUPA-ÁR 2015

Árið 2014 var öðruvísi ár í hlaupum fyrir mig. Ég byrjaði árið með því að hlaupa hálft maraþon í Los Angeles... það var lengsta vegalengdin sem var boðið upp á. Hlaupið var skemmtilegt og í hlaupaleiðinni var hringur inn á Dodgers Stadium...
Ótrúlega gaman, því við Lúlli fórum einusinni á leik þar með Jonnu og fleirum.

Ég strengi aldrei áramótaheit, en ég ætlaði að taka mig á og hlaupa meira á þessu ári en einhvern veginn var allt til þess að taka af mér öll hlaupaplön. Ég datt 5 sinnum í hálkunni um veturinn og var fram eftir öllu sumri að ná mér eftir bylturnar... vinstra hnéð hafði snúist einhvernveginn í síðustu byltunni og ég varð að vanda mig þegar ég hljóp og passa að ofgera mér ekki. Ég reyndi að hjóla meira... (þar til því var stolið 1.sept), ég gekk heilmikið með því að taka þátt í Ratleik Hafnarfjarðar og fór allt að 4x að sumum spjöldum og í mars byrjuðum við systur að synda saman á föstudögum. Þá hef ég ekki tölu á því hve oft ég hjólaði upp í Kaldársel og gekk á Helgafell.

Ég hljóp aðeins 13 maraþon 2014 og aðal breytingin frá fyrri árum er að ég fór bara 4 ferðir til USA og í tveim þeirra hljóp ég aðeins eitt maraþon í hvorri ferð. 

Í mars skrapp ég ein yfir helgi til Little Rock. Þar slapp ég fyrir horn að vera stoppuð í hlaupinu... ég var svo heppin að hafa valið EARLY-START, fór klst fyrr af stað, því hlaupið var stoppað vegna ís-regns. ég var þá nýfarin framhjá stopp-staðnum og náði að klára.
Göturnar voru eins og skautasvell.
Öllu flugi var aflýst um tíma eða því seinkað... ég hef sjaldan verið eins fegin þegar ég skilaði bílaleigubílnum, að hafa komist á flugvöllinn.
Innanlandsfluginu mínu seinkaði og hjá Icelandair var búið að loka vélinni en það var opnað aftur fyrir mig, svo það munaði ENGU að ég kæmist ekki heim.

Ég fór í 2 hlaupa-seríu-ferðir þar sem ég hljóp 5 maraþon í 5 fylkjum í hvorri ferð.
Sú fyrri var í maí/júní. þá byrjaði ég á að hlaupa í Indiana 31.maí og svo maraþon annan hvern dag (4,6,8.júní) í MI, IL (í Heartland Series)og NY. Því fylgdi þó nokkur keyrsla og flug frá Chicago til Boston og svo keyrsla upp til Lace Placid. Síðasta maraþonið í þessari ferð var í Maine... alveg efst upp við landamæri Kanada og byrjaði við vestasta odda USA. Þetta er eina maraþonið þar sem er hlaupið yfir landamæri USA og Kanada.
Í miðju maraþoninu 6.júní fékk ég sms um nýtt barnabarn og fréttin breiddist út til allra hlauparanna og hamingjuóskunum rigndi yfir okkur Lúlla.

Í ágúst hljóp ég heilt maraþon í Reykjavík 18. árið í röð. Að hugsa sér... ég sem ætlaði aldrei að hlaupa heilt á Íslandi. Ég byrjaði að skokka 1991 og hljóp þá 7 km í Reykjavík, næstu 5 ár á eftir hljóp ég hálft maraþon en hef síðan alltaf hlaupið heilt. Ég var stolt mamma og amma þennan dag, því við vorum 3 ættliðir sem hlupum. Ég maraþon, sonurinn hálft maraþon í fyrsta sinn og Matthías fór í Latabæjarhlaupið.

Í síðari hlaupa-seríu-ferðinni hljóp ég 3 maraþon (11,12,14.okt) í The Appalachian Series... Þessi hlaup voru BLAUT... ég held ég hafi aldrei hlaupið í öðru eins úrhelli. Helgina eftir (18,19.okt) hljóp ég 2 maraþon í sól og kærkominni blíðu. Þannig að ég fór 5 maraþon í 5 fylkjum á 9 dögum.

Síðasta ferð ársins var til Orlando með systrunum Eddu og Berghildi. Þær komu með mér 2013 og nú hlupu þær báðar hálft maraþon í fyrsta sinn. Þetta var Space Coast Marathon á Cocoa Beach og við erum búnar að kaupa næstu ferð... Það er ekki aftur snúið fyrir þær.

Í árslok 2014 eru maraþonin orðin 182. Nokkrar hlaupaferðir eru þegar pantaðar og hlaupin skipulögð með annan USA-hring í huga. Sem stendur á ég eftir 13 fylki í öðrum hring. Fylkin sem eru eftir eru Hawaii, Alaska, Oregon, Montana, Idaho, New Mexico, Kansas, Louisiana, Alabama, Georgia, Ohio, Kentucky og North Carolina.
Draumurinn er að klára þau 2015 ef vinnan væri ekki að þvælast fyrir manni.

Space Coast Marathon, Cocoa Village, FL 30.11.2014

Space Coast Marathon & Half Marathon
Cocoa, FL USA. 30.nóv 2014
http://www.spacecoastmarathon.com

Klukkan vakti okkur kl 2:45 am... við sváfum þokkalega.

Við vorum með okkar morgunmat sem við röðuðum í okkur, klæddum okkur í hlaupagallann, teypuðum tærnar og smurðum okkur með vasilíni og sólarvörn nr 50. 

Kl 4:45 sóttum við morgunmatarpoka í lobbyið og fórum í rútu-röðina við Best Western hér við hliðina. Það er nokkur spotti niður á Cocoa og þægilegt að geta farið með rútu og þurfa ekki að hugsa um bílastæði.

Þegar við komum á staðinn, var klósettröðin fyrst á dagskrá, svo hitti ég Nancy sem gaf okkur hálsklúta í Space-þema.

Við vorum allar skráðar í HEILT maraþon og fórum því saman af stað. Við byrjuðum í myrkri en það birti fljótlega og hitnaði. Á fyrsta horninu datt kona beint fyrir framan mig og ég týndi Eddu og Berghildi.

Af því fyrri helmingur leiðarinnar er 6,5 mílur upp með ströndinni og til baka, þá sáumst við aftur áður en ég fór síðan 6,5 mílur niður með ströndinni og til baka.

Ég hitti marga Maniaca og 50 Staters. Veðrið var eiginlega OF GOTT, við giskuðum á 28-30 stig.
Sólin skein glatt og nú vantaði örlitla svalandi hafgolu og fáein ský.
Æfingaleysið kom fram á seinni helmingi hlaupsins, en mest allan tímann var bæklaða táin mín að gera uppsteit og það orsakaði sennilega að síðustu mílurnar jaðraði við krampa í hægra læri og á sköflungi.

Berghildur og Edda voru báðar að hlaupa hálft-maraþon í fyrsta sinn og gerðu það með glæsibrag. TIL HAMINGJU MEÐ ÞAÐ.
Þetta er í annað sinn sem ég hleyp á afmælisdeginum mínum, síðast hljóp ég í Seattle 2008 og ég sá á Maniac-hlaupasíðunni að þar var hlaupið í nokkurra stiga frosti í dag.

Eftir maraþonið fórum við Edda aðeins í sólbað á ströndinni áður en við fórum í sturtu. það var frábært.

Þetta maraþon er nr 182 hjá mér.
Garmurinn mældi vegalengdina 42,85 km og tímann 6:38:02
Ég á enn eftir 13 fylki í öðrum hring um USA.

Atlantic City Marathon NJ 19.10.2014

Atlantic City Marathon & Half Marathon, 10K, 5K Run/Walk
Atlantic City, NJ USA, 19.oct. 2014

http://www.ACMarathon.org

Ég var enn í hlaupagallanum eftir Baltimore þegar ég sótti númerið mitt í Atlantic City New Jersey. Ég rétt hljóp inn í Casino-ið, sótti það og út aftur... Við erum með hótel 2 mílur frá starti sem er kl 8 am... svo ég lét það eftir mér að sofa til kl 6 am. 

Eftir morgunmat og venjulegan undirbúning lögðum við af stað rétt fyrir hálf átta... þetta smellpassaði allt. ég gat rakað saman nokkrum Marathon Maniacs fyrir hópmynd rétt áður en hlaupið var ræst.  

Það er hvergi hægt að leggja bíl hérna nema í bílastæðahúsi og við fengum stæði á 11.hæð í húsi næst starti og marki.
Lúlli kom með og notaði tímann á meðan ég hljóp... til að fara á ströndina og líta í kringum sig. 

Ég var ekki eins brött og í gær og leiðin var ekkert spennandi, ég hafði ímyndað mér hlaup meðfram strandlengjunni en við vorum send eftir "eins og augað eygir" götum í allar áttir... ég fékk skýringuna seinna... það var verið að senda okkur í alla fjóra bæina á strandlengjunni. Þetta virkaði ekki skemmtilega á mig en spretthlaupararnir hafa örugglega elskað svona beina braut.

Við fórum oft fram og til baka og þá hitti ég marga Maniaca og 50 State félaga á leiðinni. EN... maður minn hvað ég var fegin að koma í mark... 5 maraþon í 5 fylkjum á 9 dögum er kannski aðeins of mikið þegar maður æfir nær ekkert.

Þetta maraþon er nr 181
Garmurinn mældi tímann 6:35:22 og vegalengdina 25,79 mílur... vegna þess að gps-ið datt út í göngunum sem við fórum í.

Baltimore maraþon 18.10.2014

Baltimore Marathon & Half Marathon, Team Relay, 5K
Baltimore, MD USA 18.oct. 2014

http://www.thebaltimoremarathon.com

Klukkan var stillt á 3 am... og vorum búin að tékka okkur út af hótelinu og koma dótinu í bílinn, fyrir kl 5. Það var 1,4 mílur á markið.  Við fengum bílastæði á besta stað við markið og við vorum rétt búin að leggja bílnum þegar traffíkin byrjaði að leitað að stæðum. 

Við hölluðum okkur aftur í bílnum í um klst. en þá var kominn tími til að ramba á startið... en það hafði verið fært fram til kl 7 am... um leið og birti. Ég hef hlaupið þetta maraþon áður en ég mundi ekkert eftir leiðinni. 

Það var fyrir algera tilviljun að við duttum inn í grúppumyndina hjá Marathon Maniacs. 

Veðrið var gott, fyrst skýjað en síðan skein sólin á okkur... í fyrsta hluta hlaupsins fékk ég allt í einu yfir mig leiða... langaði að hætta og ég veit ekki hvað... en ég komst fljótlega yfir það...

Þjónustan á leiðinni var til fyrirmyndar... og mér gekk bara vel... þó þetta sé fjórða maraþonið á 8 dögum.
Lúlli beið eftir mér rétt hjá markinu og við keyrðum til Atlantic City í New Jersey þar sem ég hleyp á morgun...

Þetta maraþon er nr 180 og 14 fylki eftir í "second round for the States"
Garmurinn mældi vegalengdina 26,58 mílur og tímann 6:16:07 

The Appalachian Series, Seneca S-Carolina 14.10.2014

 

 

http://mainlymarathons.com/series-3/appalachian-series/
Day 4 (Oct.14): Seneca, South Carolina kl 7:30 

Sjónvarpið hefur varla sýnt annað en viðvaranir vegna veðurofsa í kringum okkur. Við höfum fengið úrhellið en nær engan vind.

Þegar ég skráði mig í þessa seríu, stóð að hlaupin yrðu haldin ,,rain or shine" ég hef ekki fengið neitt ,,shine" enn.

Það var tiltölulega stutt á startið svo ég stillti klukkuna á 5:30. Days Inn var með morgunmat frá kl 6 am svo þetta smellpassaði.
Um leið og við fórum út úr dyrunum á hótelinu byrjaði að rigna og rigningin jókst stöðugt... þriðja rigningarmaraþonið í röð.

Vá, maður... ég hef aldrei hlaupið í hvílíku úrhellis-hellt-úr-fötu-úrhellis-grenjandi rigningu. Hlaupið var ræst á réttum tíma í dag voru 14 hringir.
Göngustígarnir urðu að stórfljótum og grasið utanvið var bara verra. Sumir gerðu grín og hlaupu með sundgleraugu og sundfit á höndunum... 

Lúlli beið heima á hóteli og tók vídeó af úrhellinu. Það versta við svona úrhelli er að maður brennur svo undan fötunum, margir voru komnir með ljót nuddsár því vasilínið tollir ekki á húðinni. 

Ég komst í gegnum daginn -  og þakkaði Guði fyrir að ég var ekki skráð í síðasta hlaupið í seríunni, í Georgíu á morgun... þeir sem hlaupa á morgun þurftu að fara rennblautir af stað þangað strax eftir hlaupið í dag. Ég náði mér í 3 fylki í seríunni, WV, VA og SC

Garmin mældi tímann 6:50:55 og vegalengdina 26,47 mílur. 
Þetta maraþon er nr 179 og 15 fylki eftir í öðrum hring. 

The Appalachian Series, Bluefield Virginia 12.10.2014

http://mainlymarathons.com/series-3/appalachian-series
Day 2 (Oct.12): Bluefield, Virginia start kl 7:30

Klukkan var enn stillt á 5 am... ég svaf ekki vel, var hálf vakandi alla nóttina, fyrst var ég með pirring í hægri mjöðm og niður fótinn og síðan var bröltið í Bíðaranum að trufla mig. Ég hvíldist samt eitthvað og fannst ég ekki sérstaklega þreytt í morgun.

Ég fékk mér beyglu áður en við fórum í morgunmatinn því hann var engin undirstaða fyrir daginn. Það var helli-rigning úti og ég fékk far með Ilu á startið. Við vorum færri í dag en í gær (eða mér fannst það) og allir söfnuðust undir partý-himininn.

Ég var með regnkápu eins og flestir því úrhellið var ótrúlegt. Það rigndi fyrstu 4 hringina hjá mér og síðustu 3... en hringirnir voru 12 í allt. TAKA TVÖ sama leið og í gær. 

Ég var ekkert viss um að ég myndi hlaupa mikið í dag en ég var ótrúlega brött... Clint sagði okkur að hann hafi talið brekkurnar í þessum 12 hringjum og þær voru yfir 170. GAMAN GAMAN að fá að vita þetta fyrirfram þó ég hafi farið hringinn í gær.

Garmin mældi leiðina 43,6 km eins og í gær og tímann 7:02:51
Þetta maraþon er nr 178 og 16 fylki eftir í öðrum hring um USA. 

The Appalachian Series, Bluefield West Virginia 11.10.2014

Við keyrðum frá Manassas til Bluefield í gær og náðum í númerið mitt, ég er nr 83 og borðuðum pasta með hinum hlaupurunum - þetta varð að REUNION-pastaparty því ég þekkti helminginn af fólkinu... allt hlaupavinir allstaðar að í Ameríku. Við erum líka flest á sama hótelinu. Verðurspáin er ekki glæsileg... rigning.

http://mainlymarathons.com/series-3/appalachian-series/ 
Day 1 (Oct.11): Bluefield, West Virginia  start kl 7:30

Ég reyndi að fara snemma að sofa... það er ekkert mál þegar maður er í 4 tíma tímamismun og hefur keyrt í 6 klukkutíma. Klukkuna stillti ég á 5 am... við vorum ekki viss hvort hótelið ætlaði að byrja fyrr með morgunmatinn... en þeir gerðu það. Það voru um 4 mílur á startið og allir glaðir því það var sæmilega þurrt.

Það var ekki búið að ræsa hlaupið þegar rigningin mætti. Við vorum í garði á fylkismörkum West- Virginia og Virginia... við förum því sömu leiðina 2 daga í röð og getum skráð maraþonin á bæði fylkin. Reglurnar eru að ef hlaup byrjar í einu fylki og endar í öðru getur fólk valið á hvort fylkið hlaupið er skráð. Ég þarf bæði fylkin í minni annarri ferð yfir fylkin.

Við fórum 12 sinnum sama hringinn... sem var ekkert nema brekkur. Í byrjun voru allir svo hressir en þegar á leið hætti maður að heyra ,,keep it up" eða ,,way to go" og heyrði í staðinn ,,these hills are getting steeper" eða ,,they´ve turned in to mountains".... Brekkurnar fóru virkilega illa með mig og í bleytunni voru laufin svo hál... svo er ég eitt brunasár eftir fötin.

Þessi hlaupasería er hlaupin í fyrsta sinn núna og þó nokkrir sem ætla að hlaupa alla dagana 5... ég ætla að láta mér nægja 3 daga.

Garmin mældi vegalengdina 43,6 km og tímann 7:26:35 
Þetta maraþon er nr 177 og 17 eftir í öðrum hring um USA

Bay of Fundy International Marathon Maine 15.júní 2014

Bay of Fundy International Marathon
& 10K Lubec, ME USA

One marathon - Two countries. 15.júní 2014.

http://www.bayoffundymarathon.com  

Ég vaknaði við klukkuna 3:30 og gekk í að gera allt þetta venjulega fyrir hlaup. Á meðan ég var að teypa tærnar heyrði ég að það var ausandi rigning úti... Það þýddi smá breytingu... redda plastpoka til að vera í og Lúlli ákvað að vera eftir og tékka sig út kl 12... og hanga einhvers staðar þangað til ég kæmi til baka. 

Ég fór því ein norður og var rúman hálftíma á leiðinni. Á miðri leið keyrði ég út úr rigningunni og sá hana ekki meir. Ég var mætt við skólann fyrir kl 6 am og tók rútu á startið.

Startið kl 7am var við vita sem er austasta kennileiti USA.
Hlaupið var þaðan um 6 mílur að brúnni til Kanada... yfir brúna og 10 mílur á nyrsta tanga hennar að vitanum þar, sömu 10 mílur til baka, yfir landamærin og svo í mark. Leiðin var EIN BREKKA... ótrúlegt hvað ég er seig að finna þessi brekkuhlaup.

Það góða var að ég hafði hvílt hnéð í viku og gat skokkað inn á milli alla leiðina... og svo tók ég fullt af myndum. Þegar ég hljóp yfir landamærin sagði ég eins og James Bond: Nothing to declare - just a cello. 

Þetta er fimmta og síðasta maraþonið í þessari ferð - þau voru í 5 fylkjum... og ég held að þetta sé ljótasti verðlaunapeningur sem ég hef fengið... en kannski á hann að tákna eitthvað sem ég skil ekki ??? bakhliðin hefur mynstur eins og ígulker... en þessi bær hélt ég að væri þekkur fyrir humarveiði.

Eftir maraþonið, var ég keyrð til að sækja bílinn og svo keyrði ég til Machias að sækja Lúlla svo við gætum keyrt til Manchester NH. Þetta mun taka allan daginn... Áætluð heimferð er á morgun EN það er verkfall hjá flugvirkjum. 

Maraþonið er nr 175, garmurinn mældi vegalengdina 26,6 mílur og tímann 6:03:51 

Gögnin sótt fyrir Bay of Fundy ME og Kanada.

Við keyrðum hingað frá Manchester NH í dag... 7 tíma keyrsla til Lubec sem er við landamæri Kanada, alveg niður við sjó - Atlandshafið. Ég fékk bolinn í grunnskóla Lubec en varð að fara yfir landamærin, til Kanada að sækja númerið.

Á landamærunum varð ég að tilkynna mig sem hlaupara... Það var svolítið fyndið að Garmurinn datt algerlega út á landamærunum... sýndi ekki einu sinni vegakerfið.

Í Herring Park í Kanada fengum við númerið, biðum eftir maraþon-máltíð og svo snérum við til baka, alla leið niður í Machias, 30 mín í suður af Lubec... því það varð breyting á gistingu á síðustu stundu. 

Þá er bara að koma sér fyrir, stilla klukkuna og stilla upp hlaupadótinu. Veðurútlitið átti að vera hagstætt.