Texas Marathon 1.jan. 2017

Metal Sawing Technology Texas Marathon
Kingwood, TX USA
1.jan 2017
http://www.50statesmarathonclub.com/texas.html

Við sóttum númerið í gær og hittum um leið okkar kæru vini Paulu og Steve Boone. Þau eru alltaf jafn frábær. Það er ekkert venjulegt hvað þau hafa mikið fyrir þessum hlaupadegi. Veðurspáin var slæm fyrir hlaupið... hellirigning og tvær þrumur á kortunum. Það hellirigndi alltaf öðru hverju á gamlársdag. Það gerði ekkert til fyrir okkur, við tókum því bara rólega.

Klukkan var stillt á 5 am. Ég svaf ágætlega. Við vorum tilbúin þegar morgunmaturinn byrjaði kl 6 og stuttu seinna vorum við lögð af stað... og máttum ekki seinni vera til að fá sæmilegt bílastæði. Loftrakinn var 100% sagði veðurspáin en það var hætt við rigningu.

Fyrir maraþonið var hefðbundin viðurkenningarathöfn, ef fólk var að hlaupa t.d. 100asta maraþonið eða í 5, 10 eða 15 sinn hjá þeim... þó fólkið fengi ekki verðlaunin fyrr en í markinu eftir hlaupið.
Ég var kölluð upp og fékk afhentan verðlaunagripinn fyrir tvo hringi um USA... Vá hvað ég er stolt af þessum grip.

Marathonið var ræst kl 8am. Sama leiðin var hlaupin 4x og ég þekkti hana vel... yfir 3 götur, 2 undirgöng og yfir 11 svell-sleipar trébrýr, kringum vatn og til baka sömu leið. Hálkan á brúnum var verst, rakinn var svo mikill að ég var mörgum sinnum næstum farin á hausinn, stígarnir voru líka sleipir og ekki bættu blaut laufblöðin stöðuna... ég hef aldrei hlaupið í öðrum eins raka og svo var óvenju heitt.

Ég get ekki kvartað, ég fann ekki til í fætinum, veðrið hélst "þurrt", ég hitti ótrúlega marga sem ég þekki, ég fékk viðurkenninguna mína og geðveikislega flottan verðlaunapening.

Þetta maraþon er nr 207 og er sjöunda maraþonið sem ég hleyp í Texas. 
Garmin mældi tímann 6:43:29 og vegalengdina 42,56 km.
ég kom nr 242 í mark

Ég set fleiri myndir á Facebook

Þetta maraþon var að sjálfsögðu hlaupið til heiðurs afmælisbarni dagsins Emilíu Líf langömmu dúllunni minni sem er 5 ára í dag.

 

Space Coast Marathon, Cocoa Beach 27.nóv. 2016

Space Coast Marathon & Half Marathon
Cocoa, FL USA
27.nóv 2016

http://www.spacecoastmarathon.com

Við keyrðum frá Orlando til Cocoa Beach í gær, laugardag, sóttum númerin okkar og tékkuðum okkur inn á Days Inn. Þessi ferð hefur verið óslitin verslunarferð og við héldum áfram að versla áður en við tókum saman fötin og dótið fyrir morgundaginn. 

Klukkan var stillt á 3am... og við sváfum allar ágætlega. Eftir hefðbundinn undirbúning töltum við yfir á Best Western til að taka rútuna... Það vantaði aðeins upp á skipulagningu rútumálanna en við komumst í tæka tíð á startið.

Berghildur og Edda voru skráðar í hálft maraþon sem startaði kl 6am en ég var í starti 6:30. Þær voru að fara í fyrsta sinn rétta hálfmaraþon leið.

Fyrri hlutinn af minni leið var nokkuð erfiður, þar eru meiri smábrekkur en verst var að þar var stafalogn sem gerði steikarhita... ég var alveg að fara að ákveða mig að taka "the wormhole" það er stytta niður í hálft... en þá dró ský fyrir sólu og ég fékk blástur....

Seinni helmingurinn af leiðinni var betri, alltaf blástur og skuggar á milli. Ég hitti fullt af vinum bæði Maniökum og 50Statum... Alltaf svo gaman hjá okkur og eitthvað til að tala um.

Þetta maraþon er nr 206, garmurinn mældi það 42,91 km og tímann 6:26:51

Aþenu maraþon 13.nóv 2016

Athens Marathon


(Greece) & 10K, 5K Athens, Greece
13.nóv. 2016

http://www.athensauthenticmarathon.gr/

Í fyrsta sinn í Grikklandi og gaman að hressa upp á grískuna...

Við vorum svo heppin að það voru fleiri hlauparar á hótelinu og hótelið framreiddi morgunmatinn 2 tímum fyrr (kl.5) svo við gætum borðað fyrir hlaup.
Klukkan hringdi kl 4 am og þetta var ein af þeim nóttum sem ég hvíldist ekkert... ég er ekki einu sinni viss hvort ég svaf eitthvað.

Við lögðum af stað fyrir kl 6 því síðasta rúta á start frá Sygrou Fix átti að fara kl 6:15. Lúlli labbaði með mér. Hvílíkur straumur af rútum og þeir sem þekktu til voru ekkert að spá í tímann. Í rútunni sat ég við hliðina á konu sem býr í Melbourne Ástralíu... hún var 18 tíma í flugi fyrir hlaupið... hún var búin að stúdera leiðina vel og upplýsti mig.

Það var svakaleg örtröð á leikvanginum í Marathon fyrir hlaupið og ræst í hollum, ég þurfti að bíða 40 mín í básnum. Fyrstu 8 km voru sléttir, næstu 24 km voru brekkur, allar upp nema tvær og þaðan lá leiðin niður...

Ég get ekki kvartað, gekk bara ágætlega... gekk eitthvað í brekkunum og þá þá þreytist ég alltaf í bakinu... ég hélt að heltin ætlaði að taka sig upp en ég slapp við það... mjöðmin fékk smá álag af veghallanum en það hvarf við Panodil... þjónustan á leiðinni var góð og leiðin sjálf auðvitað EINSTÖK... þetta er mekka maraþonsins... Hið eina sanna.

Lúlli lenti í smá veseni, göturnar voru lokaðar fyrir umferð svo hann varð að ganga á endamarkið... en hann stóð eins og hetja við markið þegar ég kom - enda er hann "Bíðari nr 1"

Þetta maraþon er nr 205, Garmurinn mældi vegalengdina 42,61 km og tímann 6:21:06

Reykjavíkur Maraþon 20.ág.2016

Reykjavik Marathon & Half Marathon, 10K, 3K, Relay
Reykjavík City, Iceland
20.august 2016
http://www.marathon.is/reykjavik-marathon

Ég brá út af venju og sótti númerið á fimmtudeginum. Númerið mitt er 1243. Nú er bara að reyna að haga sér eins og sá sem á að hvíla sig - en það er alltaf erfitt.

Ég komst nokkuð snemma í rúmið í gærkvöldi og svaf nokkuð vel. Klukkan var stillt á 5:45 Morgunmaturinn var hefðbundinn og venjulegur undirbúningur er alltaf öðruvísi þegar maður er á heimavelli og þekkir allar aðstæður. Ég var búin að gefa það út að líklega yrði þetta síðasta heila maraþonið mitt í Reykjavík... heilt maraþon 20 ár í röð í Reykjavík er bara ágætt... en það kemur víst ekki í ljós fyrr en á næsta ári.

Maraþonið var ræst 8:40 og Lúlli beið við Fríkirkjuna til að mynda startið. Edda og Inga Bjartey voru við 1 km fyrir CCU. Veðrið var hið besta - það er ekki oft sem ég hef sett á mig sólarvörn 50 fyrir Reykjavík enda byrjuðum við í 13°c hita sem hækkaði í 16°c ef ekki meira þegar á leið.
Ég sá enga Marathon-Maniacs fyrr á leiðinni... og ég hafði alveg gleymt að athuga með hópmyndatöku... það er greinilegt að ég stend mig ekki.

Ég hitti Lúlla í kringum 30 km og hann hjólaði með mér í löglegri fjarlægð þar til km var eftir. Mér gekk bara ágætlega, þjónusta hlaupsins hefur batnað á ýmsum hlutum leiðarinnar þar sem drykkjarstöðvum var fjölgað enda full þörf á því þegar veðrið er svona gott. 

Þetta maraþon er nr 204,
Garmurinn mældi það 42,72 km og tímann 5:58:40

Governers Cup Helena MT 11.júní 2016

Governers Cup Marathon Helena MT
11.júní 2016
http://www.govcupmt.com 

Í dag náði ég þeim ótrúlega áfanga að hafa farið maraþon í öllum 50 ríkjum USA í ANNAÐ SINN. Það eru ekki mörg ár síðan ég hefði talið það útilokað.

Ég sótti númerið í gær (120). Vala og Hjörtur eru með okkur og allt var svo planað í kringum markmyndatökuna að það vantaði bara að við æfðum hana ;)

Ég stillti klukkuna á 2:50 og fór snemma að sofa... og svaf ágætlega. Eftir hefðbundinn undirbúning fórum við af stað, því ég þurfti að ná amk síðustu rútu á startið kl 4:45.

Hlaupið var ræst kl 6am. Þetta er ekki stórt maraþon... og fljótlega var ég orðin ein. Það var búið að breyta leiðinni síðan ég hjóp hérna síðast en leiðin varð ekki skemmtilegri... langir sveitavegir eins og augað eygir, hlaupið á jarkanum á öðrum fæti í vegkantinum.

Veiki fóturinn gaf sig á miðri leið... en það var ekkert til umræðu annað en að klára. 

Leiðin var ekki skemmtileg og of fáar drykkjarstöðvar... og með litla þjónustu.

Bíðari nr1, Vala og Hjörtur biðu samviskusamlega í markinu með íslenskan fána-borða fyrir mig til að hlaupa gegnum... ÆÐISLEGT 

Þetta maraþon er nr 203, Garmurinn mældi það 26,65 mílur og tímann um 7 klst

EN MARKMIÐIÐ NÁÐIST Í DAG - TVEIR HRINGIR UM AMERÍKU :)

Shiprock Marathon 7.maí 2016

Shiprock Marathon, Farmington, New Mexico
7.maí 2016

http://www.shiprockmarathon.com

Ég sótti gögnin í gær, það voru 30 mílur hvora leið, um 100 km fram og til baka og svo fara rúturnar á startið frá sama stað kl 6am.

Ég reyndi að fara snemma að sofa, enda búin að keyra 310 mílur, frá PUEBLO til Farmington fyrr um daginn... ég stillti klukkuna á 3am.

Ég svaf ágætlega enda þreytt... og hafði ekki áttað mig á mikilli hæð frá sjávarmáli hérna. Farmington er í 5300 feta hæð... sem gerir 1.615 metra hæð og mér var sagt að hæsti punktur í Shiprock maraþoninu væri hærri. 

Eftir að hafa græjað mig eins og vanalega ákvað ég að drífa mig af stað 4:45... ég keyri alltaf hægar í myrkri og svo sá ég öll sektarskiltin í gær ef maður gleymir að lækka hraðann þegar keyrt er i gegnum bæina... ég var rúman hálftíma á leiðinni og lenti þar í langri röð til að leggja bílnum... þegar upp var staðið small þetta allt saman.

Rúturnar keyrðu hlaupaleiðina... og mig langaði helst að fara bara til baka með rútunni... malbikaður sveitavegur sem var ekkert nema brekkur... 

Það var kalt meðan við biðum eftir startinu kl 7 og þá hitti ég nokkra Maniac-a. Það var afar breytilegt veður á leiðinni. Já, fyrst var kalt og vindur í fangið, hlýtt og vindur á hlið, kalt og vindur á ská í bakið, nokkrið dropar og svo heitt... ég var alltaf að fara úr og í jakkann aftur.

Þjónustan á leiðinni var til fyrirmyndar, drykkjarstöð með mílu millibili.

Þetta mjög svo erfiða maraþon er nr 202,
Garmin mældi það 42,57km og tímann 6:39:43
Nú er bara EITT fylki eftir í hring nr 2 um USA
Governers cup, í Helena Montana 11.júní nk.

Lake Lowell Marathon 9.apr.2016

Lake Lowell Marathon & Half Marathon, 10K, 5K
Nampa, ID USA
8.apríl 2017

http://www.lakelowellmarathon.com

Það var langt og strangt ferðalag hingað... og svo verður ferðin mjög stutt - bara hlaupið og verslað. Ferðalagið að heiman og á hótelið var um 18 tímar.

Það er langt síðan ég fór að pakka "korter fyrir ferð" og í síðustu 2 ferðum gleymdi ég ýmsu AF HLAUPADÓTINU heima og nú gleymdi ég hlaupabolnum... ég verð að fara að skrifa gátlista !!!
Ég gisti stutt frá startinu og þetta er lítið hlaup.

Klukkan var stillt á 4am... fór samt ekki af stað fyrr en kl 6... Númerið var afhent við rásmarkið... ég fékk nr 65

Hlaupið var ræst kl 7 og við tóku beinir og langir vegir út í sveit... meðfram vatninu sem hlaupið heitir eftir, yfir stíflu framhjá sveitabæjum og ræktarlandi...

IDAHO er kartöflu fylkið en ég sá engin kartöflugrös... en ég fann hreiður með 4 eggjum, komin 11,8 mílur út.

Hlaupin var sama leið fram og til baka... það voru 7 drykkjarstöðvar á leiðinni, sú áttunda við snúninginn ss 15 drykkjarstöðvar með frábærri þjónustu.

Hitinn var 43F þegar var startað en um 80F þegar ég kom í mark.

Þetta maraþon er nr 201.
Ég hafði eytt öllu út af Garmin og úrið er víst í lagi... það mældi vegalengdina 26,23 mílur og tímann 6:39:34... og ég er sátt við það.

Nú á ég 2 fylki eftir í öðrum hring um USA...

7.maí... Shiprock Marathon í New Mexico og
11.júní... Governers Cup í Helena Montana

Marathon nr. 200 - Dust Bowl Series # Ulysses Kansas 25.mars 2016

Dust Bowl Series #3 Ulysses Kansas
25.mars 2016

http//.www.mainlymarathon.com/dustbowl

Við komum inn í seríuna á þriðja degi... svo ég sótti númerið rétt fyrir ræsingu. Ég er nr 13. Ég þekkti fullt af hlaupurum en svo bætast alltaf nýir við. Larry heimsmethafi, Matthew, Rema, Margaret, Ila, Vincent, Clyde, Frank og margir fleiri. Clint tilkynnti fyrir hlaupið að þetta væri tvö-hundruð-asta maraþonið mitt.

Ég var ekki vel upplögð, búin að vera á sýklalyfi við kvefinu og fékk í magann af því, þreytt eftir veðurteppuna í Denver og langa keyrslu hingað... hitinn var rétt undir frostmarki þegar við vorum ræst og grófur stígurinn slæmur undir fæti... en þegar svona er tilkynnt þá verður maður að komast í gegnum það og engar afsakanir.

Það voru margir sárfættir frá gærdeginum og margir heil-maraþonar gengu allan tímann. Ég fór ekki úr jakkanum fyrr en eftir 4-5 tíma þegar fór að hitna og þá var ég orðin verulega þreytt í bakinu af að ganga á þessum stíg... sem einhverntíma hefur verið malbikaður og malarborinn en bara grófu steinarnir standa upp úr núna. 

Hlaupið var ræst kl 7:30. Við fórum fram og til baka 14x sömu leiðina og þó Margaret ætti eina ferð eftir þá vildi hún endilega hlaupa með mér í markið þegar ég var búin. 

Þetta maraþon er nr 200 - hver hefði trúað því  
Garmin dó á leiðinni, spurning orðin um nýtt úr og sólgleraugu sem brotnuðu nýlega... eða er kominn tími til að hætta ??? Nei, er 13 ekki bara óhappatalan mín

Red Rock Canyon Marathon NV 20.febr. 2016

Red Rock Canyon Marathon Las Vegas Nevada
20.febr 2016
http://www.calicoracing.com  

Ég sótti númerið í Sun Coast Casino í gærkvöldi... lítið expo en allt voðalega vinsamlegt. Við fórum beint heim á hótel, ég komst að því að ég hafði sett vitlausar hlaupabuxur í töskuna, gleymt tásuplástrinum heima og kannski týnt peysunni minni í dag... ég ákvað að hlaupa í þessum buxum, ég fann gamlar plástursleyfar í hólfinu framan á töskunni og peysan var úti í bíl :)

Klukkan var stillt á 3 am og farið að sofa...

Við erum á svo vitlausum tíma að ég sofnaði strax en var vöknuð áður en síminn hringdi. Lúlli ætlar að koma með og bíða á start/marki. Við borðuðum okkar morgunmat, ég náði að teypa tærnar með leyfunum og við vorum komin út í bíl 4:45 og settum Garmin á SunCoast Casino en þaðan fara rúturnar og við ætlum að elta... það er svo mikið niðamyrkur utan borgarinnar að ég treysti mér ekki til að finna sjálf rétta staðinn... sem eru einhver "gatnamót"

Við náðum að elta rútuna kl 5 á staðinn... heppin að hafa gert þetta. Kl 6:15 eða við birtingu var hlaupið ræst. Ég var búin að heyra/lesa um brekkur sem væru "brutal" og það var ekki ýkjur... ég held að ég hafi aðeins farið í EITT sem var verra... eða kannski ekki.

Ég var frosin úr kulda fyrstu míluna en svo kom blessuð sólin og var mest um 30c í hitapollum. Leiðin var ekkert nema skelfilega erfiðar brekkur en þjónustan á leiðinni var frábær og hamborgara veisla í markinu.

Þetta maraþon er nr 199...
Garmin mældi leiðina 26,32 mílur og tímann 6:52:21...
Mig vantaði ekki Nevada fyrir næsta hring um USA svo enn eru 4 fylki eftir. 

Mississippi Blues Marathon, Jackson MS, 9.jan.2016

Mississippi Blues Marathon
9.jan 2016
http://www.msbluesmarathon.com/ 

Ég var eins óráðin (hvort ég ætti að hlaupa) og hægt var í gær þegar ég sótti númerið. Ég er slæm í hælnum eftir síðasta maraþon og mig langaði ekki til að eyðileggja næstu maraþon... því fór ég eiginlega til að spurja hvort ég mætti breyta í hálft á miðri leið ef mér litist ekki á blikuna. Þetta er í 3ja sinn sem ég hleyp þetta hlaup, en nú hafa þeir breytt um stað á starti/marki og leiðinni.

Ég var ákveðin að fara af stað... veðurútlitið var ekki gott, grenjandi rigning. Ég stillti klukkuna á 3 am, við þurftum líka að tékka okkur út fyrir hlaupið. Það voru nokkrar mílur í miðbæinn og við fengum gott stæði svo Lúlli gæti verið í bílnum á meðan.

Hlaupið var ræst kl 7 í rigningu, það stytti fljótlega upp og ég pakkaði regnslánni saman og geymdi... eins gott því tvisvar komu langar úrhellis-dembur en svo heit sól á milli að það sem var blautt - varð þurrt.

Mér gekk ágætlega og ákvað að skrölta alla leiðina... sem var ekkert nema brekkur. Hællinn var sæmilegur, kannski bjargaði mér að ég setti auka innlegg í skóna og ég var í stífum sokk sem hélt við.

Á 16.mílu hitti ég Sharon frá LA, hún var að strögglast við, enda aðeins bækluð í baki og við gegnum saman restina... það endaði með að það fóru allir fram úr okkur og við urðum síðastar. Hún hafði byrjað klst fyrr, ásamt Matthew, Larry Macon og fleirum sem ég þekki.

Þetta maraþon er nr 198
Á mílu 20 dó úrið mitt, ég veit ekki hvort það varð rafmagnslaust eða hvort það þoldi ekki þrumuveðrið... svo ég veit hvorki hvað vegalengdin hefði mælst og verð að bíða eftir útgefnum tíma frá hlaupinu. 
Skráður tími á mig er: 7:24:03 og það besta er að ég versnaði ekkert í hælnum.

Eftir hlaupið keyrði ég um 200 mílur til New Orleans :)

PS. Það var viðtal við mig á ,,local TV í Jackson" en ég sá það ekki þegar það var sýnt í fréttunum kvöldið 8.jan... ég get kannski fundið slóðina seinna :)