Governers Cup Helena MT 11.júní 2016

Governers Cup Marathon Helena MT
11.júní 2016
http://www.govcupmt.com 

Í dag náði ég þeim ótrúlega áfanga að hafa farið maraþon í öllum 50 ríkjum USA í ANNAÐ SINN. Það eru ekki mörg ár síðan ég hefði talið það útilokað.

Ég sótti númerið í gær (120). Vala og Hjörtur eru með okkur og allt var svo planað í kringum markmyndatökuna að það vantaði bara að við æfðum hana ;)

Ég stillti klukkuna á 2:50 og fór snemma að sofa... og svaf ágætlega. Eftir hefðbundinn undirbúning fórum við af stað, því ég þurfti að ná amk síðustu rútu á startið kl 4:45.

Hlaupið var ræst kl 6am. Þetta er ekki stórt maraþon... og fljótlega var ég orðin ein. Það var búið að breyta leiðinni síðan ég hjóp hérna síðast en leiðin varð ekki skemmtilegri... langir sveitavegir eins og augað eygir, hlaupið á jarkanum á öðrum fæti í vegkantinum.

Veiki fóturinn gaf sig á miðri leið... en það var ekkert til umræðu annað en að klára. 

Leiðin var ekki skemmtileg og of fáar drykkjarstöðvar... og með litla þjónustu.

Bíðari nr1, Vala og Hjörtur biðu samviskusamlega í markinu með íslenskan fána-borða fyrir mig til að hlaupa gegnum... ÆÐISLEGT 

Þetta maraþon er nr 203, Garmurinn mældi það 26,65 mílur og tímann um 7 klst

EN MARKMIÐIÐ NÁÐIST Í DAG - TVEIR HRINGIR UM AMERÍKU :)

Hreyfing í maí - South Kaibab Trail Grand Canyon

Ég byrjaði mánuðinn á maraþoni í New Mexico... það var mjög svo erfitt, langt og strangt ferðalag og mikil hæð yfir sjávarmáli... en það hafðist :)

 7.maí... Shiprock Marathon NM, 42,2 km
13.maí... 1200 m skrið
14.maí... Helgafell ganga 4,8 km með byrði
16.maí... Esja upp að Steini, 6,7 km með þyngri byrði en síðast
21.maí... Helgafell með Tinnu Sól, 4,8 km ganga
22.maí... Helgafell með Berghildi og Eddu, m/byrðar, 4,8 km ganga
23.maí... Hjólað með Völu, 16,3 km 
27.maí... 1100m skrið

28.maí... Ævintýrið að byrja, flogið til Denver.
31.maí... South Kaibab Trail, gengið frá suður brúninni niður á botn
          í Grand Canyon, 7,1 míla eða 11,4 km...
          Við vorum með 10-12 kg byrði hver og niðurferðin
          tók 4 og hálfan tíma. Gistum á Bright Angel Campground.

https://youtu.be/rLxAEe1h7Bo 
Ævintýraferðin, videó á Youtube.com 

Shiprock Marathon 7.maí 2016

Shiprock Marathon, Farmington, New Mexico
7.maí 2016

http://www.shiprockmarathon.com

Ég sótti gögnin í gær, það voru 30 mílur hvora leið, um 100 km fram og til baka og svo fara rúturnar á startið frá sama stað kl 6am.

Ég reyndi að fara snemma að sofa, enda búin að keyra 310 mílur, frá PUEBLO til Farmington fyrr um daginn... ég stillti klukkuna á 3am.

Ég svaf ágætlega enda þreytt... og hafði ekki áttað mig á mikilli hæð frá sjávarmáli hérna. Farmington er í 5300 feta hæð... sem gerir 1.615 metra hæð og mér var sagt að hæsti punktur í Shiprock maraþoninu væri hærri. 

Eftir að hafa græjað mig eins og vanalega ákvað ég að drífa mig af stað 4:45... ég keyri alltaf hægar í myrkri og svo sá ég öll sektarskiltin í gær ef maður gleymir að lækka hraðann þegar keyrt er i gegnum bæina... ég var rúman hálftíma á leiðinni og lenti þar í langri röð til að leggja bílnum... þegar upp var staðið small þetta allt saman.

Rúturnar keyrðu hlaupaleiðina... og mig langaði helst að fara bara til baka með rútunni... malbikaður sveitavegur sem var ekkert nema brekkur... 

Það var kalt meðan við biðum eftir startinu kl 7 og þá hitti ég nokkra Maniac-a. Það var afar breytilegt veður á leiðinni. Já, fyrst var kalt og vindur í fangið, hlýtt og vindur á hlið, kalt og vindur á ská í bakið, nokkrið dropar og svo heitt... ég var alltaf að fara úr og í jakkann aftur.

Þjónustan á leiðinni var til fyrirmyndar, drykkjarstöð með mílu millibili.

Þetta mjög svo erfiða maraþon er nr 202,
Garmin mældi það 42,57km og tímann 6:39:43
Nú er bara EITT fylki eftir í hring nr 2 um USA
Governers cup, í Helena Montana 11.júní nk.

Hreyfing í apríl 2016

Ég hef barist við eymsli aftan í vinstra hæl síðan í janúar í fyrra... en eftir Red Rock Canyon í Las Vegas í febr færðust meiðslin yfir á hinn hælinn... þetta var ofvaxið mínum skilningi og mér datt helst í hug að ég hafi hlíft veika fætinum extra vel í öllum brekkunum en ofgert hinum...
Hvað um það... stuttu seinna les ég færslu á facebook-síðu FM um Theódór sjúkraþjálfara sem gerði kraftaverk á hæl einhvers. Ég pantaði strax tíma og fékk 6.apr og er nú í meðferð með hælinn... vona að ég losni við þennan vanda sem fyrst... og ég reyni að fara samviskusamlega eftir fyrirmælum.

 1.apr... 1100m skrið
 4.apr... 19,6 km hjól m/Völu
 9.apr... Lake Lowell Marathon ID, 42,2 km
11.apr... 16,3 km hjól m/Völu
15.apr... 1200m skrið
18.apr... 16,3 km hjól m/Völu
21.apr... Helgafell m/Völu, ganga 4,8 km.. með poka á baki
22.apr... 600m skrið
24.apr... 14,3 km hjól
25.apr... Hjólað í Kaldársel (19,8 km)og gengið á Helgafell (4,9km) með 5 kg í poka.

Lake Lowell Marathon 9.apr.2016

Lake Lowell Marathon & Half Marathon, 10K, 5K
Nampa, ID USA
8.apríl 2017

http://www.lakelowellmarathon.com

Það var langt og strangt ferðalag hingað... og svo verður ferðin mjög stutt - bara hlaupið og verslað. Ferðalagið að heiman og á hótelið var um 18 tímar.

Það er langt síðan ég fór að pakka "korter fyrir ferð" og í síðustu 2 ferðum gleymdi ég ýmsu AF HLAUPADÓTINU heima og nú gleymdi ég hlaupabolnum... ég verð að fara að skrifa gátlista !!!
Ég gisti stutt frá startinu og þetta er lítið hlaup.

Klukkan var stillt á 4am... fór samt ekki af stað fyrr en kl 6... Númerið var afhent við rásmarkið... ég fékk nr 65

Hlaupið var ræst kl 7 og við tóku beinir og langir vegir út í sveit... meðfram vatninu sem hlaupið heitir eftir, yfir stíflu framhjá sveitabæjum og ræktarlandi...

IDAHO er kartöflu fylkið en ég sá engin kartöflugrös... en ég fann hreiður með 4 eggjum, komin 11,8 mílur út.

Hlaupin var sama leið fram og til baka... það voru 7 drykkjarstöðvar á leiðinni, sú áttunda við snúninginn ss 15 drykkjarstöðvar með frábærri þjónustu.

Hitinn var 43F þegar var startað en um 80F þegar ég kom í mark.

Þetta maraþon er nr 201.
Ég hafði eytt öllu út af Garmin og úrið er víst í lagi... það mældi vegalengdina 26,23 mílur og tímann 6:39:34... og ég er sátt við það.

Nú á ég 2 fylki eftir í öðrum hring um USA...

7.maí... Shiprock Marathon í New Mexico og
11.júní... Governers Cup í Helena Montana

Marathon nr. 200 - Dust Bowl Series # Ulysses Kansas 25.mars 2016

Dust Bowl Series #3 Ulysses Kansas
25.mars 2016

http//.www.mainlymarathon.com/dustbowl

Við komum inn í seríuna á þriðja degi... svo ég sótti númerið rétt fyrir ræsingu. Ég er nr 13. Ég þekkti fullt af hlaupurum en svo bætast alltaf nýir við. Larry heimsmethafi, Matthew, Rema, Margaret, Ila, Vincent, Clyde, Frank og margir fleiri. Clint tilkynnti fyrir hlaupið að þetta væri tvö-hundruð-asta maraþonið mitt.

Ég var ekki vel upplögð, búin að vera á sýklalyfi við kvefinu og fékk í magann af því, þreytt eftir veðurteppuna í Denver og langa keyrslu hingað... hitinn var rétt undir frostmarki þegar við vorum ræst og grófur stígurinn slæmur undir fæti... en þegar svona er tilkynnt þá verður maður að komast í gegnum það og engar afsakanir.

Það voru margir sárfættir frá gærdeginum og margir heil-maraþonar gengu allan tímann. Ég fór ekki úr jakkanum fyrr en eftir 4-5 tíma þegar fór að hitna og þá var ég orðin verulega þreytt í bakinu af að ganga á þessum stíg... sem einhverntíma hefur verið malbikaður og malarborinn en bara grófu steinarnir standa upp úr núna. 

Hlaupið var ræst kl 7:30. Við fórum fram og til baka 14x sömu leiðina og þó Margaret ætti eina ferð eftir þá vildi hún endilega hlaupa með mér í markið þegar ég var búin. 

Þetta maraþon er nr 200 - hver hefði trúað því  
Garmin dó á leiðinni, spurning orðin um nýtt úr og sólgleraugu sem brotnuðu nýlega... eða er kominn tími til að hætta ??? Nei, er 13 ekki bara óhappatalan mín

Æfingar í mars

Veðrið hefur ekki verið hliðhollt til æfinga, þess vegna er sundið á föstudögum snilld, hreyfing með Völu annað hvort úti eða inni á mánudögum og svo erum við nýbúnar að draga fram hjólin.

 4.mars... 1200 m skrið
 7.mars... 8,1 km skokk, Hrafnistuhringur með Völu í roki og rigningu, varð aftur hölt á hægra fæti.
11.mars... 1200 m skrið
14.mars... 18,3 km hjól m/Völu
17.mars... hjól 6 km
18.mars... 1200 m skrið
25.mars... The Dust Bowl Series, Maraþon í Ulysses Kansas, 43 km

Æfingar í febrúar 2016

Það var dásamlegt að komast aftur út að hlaupa en færðin hefur verið leiðinleg undanfarið... 

 1.febr... 8,11 km Hrafnista frá Sjúkraþjálfaranum m/Völu
 4.febr... 8 km inni á bretti í GB.
 5.febr... 1200 m skrið
 8.febr... 8,1 km á bretti í GB
11.febr... 8 km á bretti í GB
12.febr... 1200 m skrið 
15.febr... 6 km á bretti m/Völu
17.febr... 4 km á bretti í GB
20.febr... Red Rock Canyon Marathon í Las Vegas Nevada
26.febr... 1100 m skrið
29.febr... 8,1 km Hrafnistuhringur með Völu

Red Rock Canyon Marathon NV 20.febr. 2016

Red Rock Canyon Marathon Las Vegas Nevada
20.febr 2016
http://www.calicoracing.com  

Ég sótti númerið í Sun Coast Casino í gærkvöldi... lítið expo en allt voðalega vinsamlegt. Við fórum beint heim á hótel, ég komst að því að ég hafði sett vitlausar hlaupabuxur í töskuna, gleymt tásuplástrinum heima og kannski týnt peysunni minni í dag... ég ákvað að hlaupa í þessum buxum, ég fann gamlar plástursleyfar í hólfinu framan á töskunni og peysan var úti í bíl :)

Klukkan var stillt á 3 am og farið að sofa...

Við erum á svo vitlausum tíma að ég sofnaði strax en var vöknuð áður en síminn hringdi. Lúlli ætlar að koma með og bíða á start/marki. Við borðuðum okkar morgunmat, ég náði að teypa tærnar með leyfunum og við vorum komin út í bíl 4:45 og settum Garmin á SunCoast Casino en þaðan fara rúturnar og við ætlum að elta... það er svo mikið niðamyrkur utan borgarinnar að ég treysti mér ekki til að finna sjálf rétta staðinn... sem eru einhver "gatnamót"

Við náðum að elta rútuna kl 5 á staðinn... heppin að hafa gert þetta. Kl 6:15 eða við birtingu var hlaupið ræst. Ég var búin að heyra/lesa um brekkur sem væru "brutal" og það var ekki ýkjur... ég held að ég hafi aðeins farið í EITT sem var verra... eða kannski ekki.

Ég var frosin úr kulda fyrstu míluna en svo kom blessuð sólin og var mest um 30c í hitapollum. Leiðin var ekkert nema skelfilega erfiðar brekkur en þjónustan á leiðinni var frábær og hamborgara veisla í markinu.

Þetta maraþon er nr 199...
Garmin mældi leiðina 26,32 mílur og tímann 6:52:21...
Mig vantaði ekki Nevada fyrir næsta hring um USA svo enn eru 4 fylki eftir. 

Litlar æfingar í janúar 2016

Ég byrjaði árið með Texas maraþoni og 9.jan, Mississippi Blues maraþonið... þannig að það var ekkert æft fyrri helming mánaðarins. Ég kom heim 12.jan og föstudaginn á eftir var sund eins og venjulega... 

15.jan... 1000m skrið
18.jan... 4 km á bretti með Völu og 2 hringir í tækjum
22.jan... 1300m skrið
25.jan... Hrafnistuhringur m/Völu, 8 km
28.jan... 8 km á bretti í GB / ein
29.jan... 1300m skrið