LITA-partý 27.8.2011

Síðasta laugardagskvöld hélt ég formlega upp á áfangann að hafa hlaupið maraþon í öllum 50 fylkjum USA...

Dagurinn á eftir fór í að gera vídeo sem ég setti síðan á YouTube... maður minn hvað maður er að verða mikill tæknigúrú... hehe 

http://www.youtube.com/watch?v=mHvg95X2kIE
(muna að hafa hljóðið á)

Þeir sem svöruðu boðinu og mættu á staðinn skemmtu sér frábærlega vel... en einmitt það hámarkaði ánægju mína yfir að hafa tekist að klára þetta :)

Reykjavíkurmaraþon 20.8.2011

 http://www.marathon.is/reykjavikurmaraton/500-reykjavikurmaraton-2011

Gögnin voru sótt í gær... og farið samviskusamlega í pastaveisluna... einu skiptin sem ég borða pasta fyrir maraþon eru hér... síðan var úrið hlaðið, fötin tekin saman, flagan sett á skóinn og allt gert tilbúið. Fór að sofa um hálf 11.

Vaknaði tveim tímum fyrir hlaup 6:30, en fórum frekar seint af stað inneftir. Við leggjum alltaf á sama stað og hittum yfirleitt sama fólkið við startið.
Í pastaveislunni hafði farið á mis við hinn eina erlenda Marathon Maniac (David Holmen) sem kom til að hlaupa maraþon en hitti hann svo við rásmarkið. Bíðari nr 1 mundaði vélina... af öllum þessum fjölda vorum við tvö Maraþon Maniacs - hinir voru bara venjulegir hlauparar 

Það var svo mikið að gera hjá mér að ég gleymdi síðasta pissi  og varð að afgreiða það á fyrstu stoppistöð... veðrið var í það ,,besta" ég fór tvisvar úr bolnum á leiðinni 

Það væri ósanngjarnt af mér að vera ekki ánægð með hlaupið, hár blóðþrýstingur hefur plagað mig síðustu viku, í fyrradag (178/112), áður en ég fór af stað (176/96) en eftir maraþonið (106/64). Síðan fékk ég tvisvar tak aftan í lærið á síðustu vikum og dró þá úr æfingum en hjólaði samt sem áður.
Ætlunin var því að hlaupa rólega... Á tíunda km ákvað stingurinn að taka sig upp, ég hægði á mér og hljóp áfram og hann var horfinn við 24 km-keiluna. 

Lúlli hitti mig síðan við Nauthólsvík/flugvöllinn og hjólaði með mér síðustu 13 km...  það hefur hann gert undanfarin ár. Venus var í körfunni á hjólinu og stjórnaði ferðinni 

Þetta maraþon er nr. 131, tíminn minn 5:08:42 og maraþonið mældist 42,04 km.

Ég er rosalega stolt af því að 3 af börnunum mínum og 3 barnabörn fóru 10 km vegalengdina  

Ein eins og vanalega :)

Ég hef verið ein að hlaupa að undanförnu, mánudagarnir hafa gjörsamlega misfarist hjá okkur Völu, ég er virkilega farin að sakna hennar :)

Ég hljóp skammtinn í blíðunni fyrir hádegið. Hjólaði eftir hádegi og um kvöldið á bæjarhátíðinni í Vogunum. Góður dagur og á morgun verður annar góður dagur þegar við Berghildur tökum síðustu 2 spjöldin í Ratleik Hafnarfjarðar :)

Hrafnistan 12,5 km og hjólaði 21,6 km  

Hreyfing frá morgni til kvölds

Fór snemma út á hlaupa í morgun, fór Hrafnistuhringinn í þessari guðdómlegu blíðu sem hefur verið undanfarið. Fór fljótlega á eftir að hjóla með manninum. Við hjóluðum í Kópavog og um Kópavog. það var farið að kólna þega við komum heim og þá passaði að skella kvöldmatnum í ofninn. Þetta er bara snilld.

Hlaup 12,5 km og hjól 35 km 

Hlaupið og hjólað :)

Við Berghildur ætlum að nota fyrripartinn á morgun í ratleikinn svo ég hljóp Hrafnistuna mína í morgun. Veðrið var svo frábært og margir úti að hreyfa sig.

Eftir hádegið hjóluðum við hjónin af stað til Reykjavíkur að heimsækja pabba á hjartadeildina, en það sprakk hjá Lúlla og hann varð að taka strætó með hjólið frá Arnarnesinu. 

Hlaup 12,5 og hjól 35 km  

Hrafnistuhringur, hvað annað

Mér finnst svo gaman að hjóla að ég píndi mig snemma út að hlaupa svo ég gæti farið fyrr að hjóla... ótrúlegt en satt.

Hrafnistuhringurinn er í áskrift hjá mér... hvað annað er hægt að hlaupa ? jú jú... en nei Hrafnistan er farin samviskusamlega, eins og það séu lög fyrir því. ég átti 3 km eftir heim... og eins og hestarnir farin að fara allt of hratt... þá fékk sting aftan í vinsta lærið eins og í síðustu viku - svo ég hægði á mér og þá fann ég aðeins minna fyrir þessu.

Hrafnistan 12,5 km :) 

Styttist í maraþonið

Ég get ekki montað mig af miklum æfingum fyrir Reykjavíkurmaraþon... eins og ég var ákveðin að fjölga hlaupadögum og lengja vegalengdir... EN NEI... mín hefur ekki staðið sig í því... en ég hef bæði hjólað og gengið í staðinn.

Hrafnistan var farin í dag... í ágætis veðri... en ég var hrikalega þreytt fyrstu kílómetrana en það lagaðist síðan. Ég finn að hjólið hefur styrkt mig og ÉG ELSKA AÐ HJÓLA :)

Hrafnistan 12,5 km og hjól 23,6 km í dag  

Hreyfing í Júlí

Það verður að segjast eins og er að ég hef verið frekar slök í hlaupunum í júlí... Hlaupadagbókin segir að ég hafi bara hlaupið 117,2 km... sumir hlaupa þetta á viku en ég hef bætt þennan ,,skort" upp með því að hjóla og ganga.

Hlaup 117,2 km - hjól 714 km - ganga 56,9 km