Twin Lakes Marathon Juneau Alaska, 27.júlí 2023

Þessi ferð var algjör hraðferð, flug 2 daga í röð, maraþon 2 daga í röð og flug heim 2 daga í röð, alls 5 nætur í burtu.. og 8 tíma tímamunur í hlaupunum.. þetta var strembið, þar sem bílaleigubílar voru fáir og uppseldir.. svo ég varð að redda mér öðruvísi.

Ég var dauðþreytt þegar ég kom til Juneau og fór snemma að sofa og vegna hins mikla tímamunar, vaknaði ég um 2:30. Ég hafði samið við leigubílstjóra að sækja mig kl 5:45.. það voru 6 mílur/10 km á startið.. Ég hitti marga sem ég þekki og þrjá sem gista á Áttunni eins og ég, svo ég fékk far til baka og fæ far í fyrramálið.. Jim og Bettie eru á 2.hæð en Henry er í næsta herbergi við mig.. síðan frétti ég að Bill væri líka hérna..

Startið var kl 7 am. Leiðin var nokkuð slétt, malbikaður stígur, 14 ferðir fram og til baka.. Það var þó nokkur bunga á miðjum stígnum sem orsakaði halla hvoru megin en mér tókst að halda mig svolítið á miðjunni.. halli er mjög slæmur fyrir grindarlosið hjá mér.. veðrið gott.. ég sá 2 birni í húsagarði hinu megin við götuna.. ég hélt að enginn annar í hlaupinu hefði verið svo ,,heppinn".. en amk ein kona sá þá.. veit ekki hvort þeir sáu mig.. en annar þeirra, sennilega Yogi endaði á verðlaunapeningnum..

Maraþon nr 271 í dag,
strava mældi leiðina 43,4 km
Alaska.. tékk
4 fylki eftir í 3ja hring um USA

Maraþon í Sanford Maine, 10.júní 2023

Ég var með hótel í nokkurra mín fjarlægð frá startinu, en var sagt upp rétt fyrir brottför að heiman.. og hótelið sem ég fékk var í Wells í 30 mín fjarlægt.. Klukkan var því enn einu sinni stillt á 3am.. því startið í öllum hlaupunum hefur verið kl 5am.. en þá er farið að birta..

Við byrjuðum í rigningarúða eins og í gær, síðan var þurrt í nokkra tíma, en þegar leið á kom góður skúr.. Allt var þó orðið þurrt í lokið.. þetta maraþon var virkilega erfitt, fæturnir á mér voru orðnir stokkbólgnir, ég var í compression sokkum en þeir náðu ekki að halda við bólguna, kominn sviði í yljarnar, ökklarnir stífir og skórnir orðir mjög þröngir..

Leiðin var 14 ferðir með 5 stærri brekkum í hverri ferð.. Þetta var síðasti dagurinn í New England seríunni.. og ég varð að komast í gegnum það til að krossa við Maine..  Það þarf varla að taka fram að ég var DEAD-LAST í hlaupinu og fékk aftasta vagninn að launum..
þegar ég kom heim kom í ljós að ég var með sinaskeiðabólgu framan á fætinum það marraði í vöðvanum.. Það mun taka tíma að lagast..

Þetta maraþon er nr 270
Strava mældi vegalengdina 43.16 km
5 fylki eftir í 3ja hring um USA. 

Maraþon í Claremont, New Hampshire 9.júní 2023

Við vorum á sama hóteli og fyrir hlaupið í gær þegar ég keyrði til Vermont, nú voru nokkrar mínútur á startið.. sem er í Monadnock Park í Claremont NH. 

Eins og áður var klukkan stillt á 3am.. og eftir að hafa teypað tærnar og annan venjulega undirbúning fórum við á startið.. Lúlli kom með því eftir hlaupið var löng keyrsla til Maine..
Þetta var trail maraþon í Monadnock Park í New Hampshire í dag, og leiðin innihélt eina bratta og erfiða brekku (x16).. Við fengum fáeina regndropa í upphafi en fengum dembu í lokin..

Eftir hlaupið tók við löng keyrsla til Wells í Maine.. þar sem við gistum fyrir síðasta maraþonið..

Þetta maraþon er nr ??
Strava mældi leiðina 43.96 km
6 fylki eftir í 3ja hring um USA

 

Maraþon, Toonerville Trail í Vermont 8.júní 2023

Nú erum við búin að eiga viku frí.. höfum aðeins skoðað okkur um og farið á nýja staði.. Seinni maraþon hrinan byrjar í dag.. Klukkan var eins og venjulega stillt á 3 am.. Við gistum í Claremont NH og ég var 20 mín að keyra á startið í dag í Springfield í Vermont.. 

Hlaupið var ræst kl 5am en þá var að byrja að birta.. Hitastigið var þægilegt, svalara en í síðasta maraþoni í síðustu viku.. það var úðarigning fyrstu tímana, en það stytti upp og eftir það komu stöku dropar..
Leiðin var nokkuð flöt, meðfram fallegri á.. við sluppum alveg við reykinn af skógareldunum í Kanada.. 

Þetta maraþon er nr ?
Strava mældi vegalengdina 43,2 km
7 fylki eftir í 3ja hring um USA

Mainly Marathon í Fair Hills. Elkton Maryland 1. júní 2023

Ég gat verið á sama hóteli fyrir þetta maraþon og maraþonið í gær í Delaware. Ég var eftir mig.. ekki spurning.. Ég vaknaði aftur kl 3 am.. lagði af stað kl 4 am enda 20 mín keyrsla á startið.. 

Hlaupið var ræst kl 5 en þá var þegar farið að birta aðeins. Undirlagið var slæmt, möl.. það var nær enginn skuggi á leiðinni.. og margar brekkur.. sem varð til þess að bakið á mér neitar að fara í þriðja maraþonið á morgun.. Hitinn í dag fór upp í 90°F

Eftir hlaupið sótti ég Lúlla á hótelið og keyrði til Pennsylvaniu.

Maryland - tékk

8 fylki eftir í 3ja hring um USA

Mainly Maraþon í Delaware 31.maí 2023

Við flugum út til Baltimore 29.maí.. og keyrðum til Delaware.. þegar ég ætlaði daginn áður að finna startið í Lums Pond State Park kom ég að lokuðu hliði.. 

Ég stillti klukkuna á 3am.. og fór snemma að sofa. Græjaði mig og fót út kl 4am, 20 mín keyrsla á start.. keyrði að aðal innganginum í garðinn, nú var allt opið. Startið var kl 5am í myrkri en birti fljótlega.

Leiðin var ágæt, einn þriðji var á möl og grasi, einn þriðji var skógarstígur og restin var á malbiki.. Heilt maraþon var 16 ferðir fram og til baka. Hitinn var ekki til vandræða og nægur skuggi á leiðinni..

Delaware -tékk

Strava mældi maraþonið - 46,56 km

9 fylki eftir í 3ja hring um USA

Mainly Marathon, Bluefield W-Virginia 29.mars 2023

Eins og áður var klukkan stillt á 3:30.. og hlaupið nokkrar mílur í burtu. Þegar ég vaknaði vissi ég ekki hvort ég ætti að fara, blaðran undir táberginu sprungin og helaumt að stíga niður.. en mín tók verkjatöflur og tróð sér í skóna.

Ég hef hlaupið þetta hlaup áður en var búin að gleyma brekkunum.. 14 talsins á leiðinni fram og til baka og amk 3 þeirra háar og brattar.. já góðan daginn.. 168 brekkur.. margir voru farnir að beita ýmsum aðferðum til að fara niður þær.. Hitinn var um frostmark þegar við byrjuðum.. vægast sagt erfiður dagur en hafðist.

Meira seinna.

Maraþonið mældist 43,74 km

West-Virginia er 40. fylkið í 3ja hring um USA

Mainly Marathon Mills River N-Carolina 27.mars 2023

Klukkan var stillt á 3:30 en ég var vöknuð löngu áður.. hafði sofið ágætlega.. Eftir venjulegan undirbúning tékkaði ég mig út.. það voru um 7 mílur á startið..

Hlaupið var ræst kl 6:30 og 16 marflatir hringir fyrir fullt maraþon.. Fyrsti klukkutíminn er alltaf í myrkri.. en síðan fór sólin að skína. Hitinn fór sennilega í 85°F, því hann var í 80 þegar ég var búin.. 

Þetta hlaup var erfitt, enginn skuggi á leiðinni, stígurinn var með vatnshalla sem veldur spennu og verkjum í lífbeininu hjá mér, því ég er með grindarlos, aðrir finna ekkert fyrir smá halla.. Ég þreyttist í bakinu eins og venjulega.. en verst var að fyrir síðasta hringinn uppgötvaði ég blöðru undir táberginu.. EN þetta hafðist, ég kláraði.

Meira seinna.

Maraþonið mældist 44,19 km

N-Carolína er 39. fylkið í 3ja hring um USA

Mainly Marathon Seneca S-Carolina 26.mars 2023

Ég tók 2 daga í að keyra frá DC til Seneca S-Carolinu.. Eins og venjulega mætti ég illa sofin á staðinn.. og að auki 2 klst of snemma. Ég hélt að startið væri kl 5:30 en það var 6:30.. þeir sem skrá sig á staðnum eiga að mæta klst fyrir hlaup.. ég skráði mig og fór aftur á hótelið..

Þetta var brekkuhlaup.. leiðinni hafði verið breytt vegna flóða.. við fórum 14 x sömu leið fram og til baka.. 42 brekkur upp og 42 brekkur niður.. sem var farið að taka í í lokin. Veðrið var hlýtt, rigndi um klst rétt fyrir hádegið en síðan þurrkaði sólin allt

Meira seinna. 

Hlaupið mældist 44,67 km 

South Carolina er 38. fylkið í 3ja hring um USA.

Áramóta-annáll fyrir árið 2022

GLEÐILEGT ÁR 2023

Ég óska öllum Guðs blessunar, gæfu og góðs gengis á árinu 2023 um leið og ég þakka fyrir árið sem er að líða. 

Annáll þessa árs er, eins og í fyrra skrifaður heima í Hafnarfirði.
LOKSINS var sóttvarnar-takmörkunum aflétt og ég gat farið til USA að hlaupa.. Hello America, here I come.. Í fyrstu ferð flaug ég til Orlando og keyrði til Alabama og hljóp 1 maraþon.. Í apríl fór ég 2 maraþon, í maí tók ég aftur 2 og 3 í júní.. 

Ég átti síðan aðgang í júlí fyrir San Francisco en flugvélin lenti hér á CODE RED vegna bilunar og flugi frestað um sólarhring.. en þá var ferðin ónýt fyrir mér.. Ég skrifaði þeim út og fékk að hlaupa VIRTUAL.. Þessi aðgangur var síðan 2020 en Vala ætlaði með mér í þá ferð.. Við ætluðum að hlaupa 5 km saman daginn fyrir maraþonið.. Svo við Vala hlupum saman 5 km (virtual) á laugardeginum, og á sd hljóp ég rúmlega 20 hringi í kringum Hvaleyrarvatn fyrir maraþonið.. Síðasta maraþon ársins var síðan 1.okt í ferð okkar Völu til USA.

Ég átti aðgang í Tokyó maraþonið í mars 2020 en því var aflýst og ég gat fengið öruggt númer í mars 2021.. sem var frestað til 17.okt 2021.. því var aflýst og aðgangur minn fluttur til 5.mars 2023.. Það er sorglegt að segja frá því að ég þurfti að endurnýja aðganginn í nokkurra daga glugga, ég var erlendis þegar hann opnaðist en ég taldi að ég næði því þegar ég kæmi heim, en tímamunurinn við Japan var svo mikill að ég var KLST of sein.. Þetta var BÖMMER ársins.. ég sem komst inn í gegnum lottóið í 3ju tilraun og búin að eiga pöntuð hótel í 5 ár.. fer ekki til Tokyo..

Ég átti líka aðgang frá 2020 í Anchorage Alaska en það lenti á menningarnótt þetta árið og þennan dag hljóp ég ekki neitt vegna brúðkaups Lovísu og Gunnars.

Ég hjólaði, gekk og skokkaði með Völu, fór nokkrar ferðir á Helgafellið, tók ratleikinn með systrum og synti með þeim á föstudögum ef ég var á landinu.

Maraþonin eru komin í 262 + 1 virtual
Ultra-hlaup 10, 9 Laugavegir og 1 Þingvallahlaup
Fylkin í 3ja hring um USA eru komin 37
maraþonlönd 27
Heimsálfur 5
4/6 Majors

GLEÐILEGT NÝTT HLAUPÁR 2023